ಊರೊರ್ಮೆ ಪುದರಾವೊಡು!
ಪುದರಾವೊಡು!
ಪಚ್ಚೆ ಬೈಲ ಕಟ್ಟಪುಣಿತ ಕರೆ ಬರಿ
ಸೆಲಿನೀರ ತುದೆ-ಕೆದುತ ಅರು ಬರಿ
ಒರ್ಮನೆ ಬೀಜೊಂದಿತ್ತಿನ
ತುಳುವ ಕಮ್ಮೆನದ ಎರಿಮೂರಿ
ಇನಿ ಏಳ್ ಕಡಲಾಯರೆ (ಕಡಲ ಆಯರೆ)
ಪಸರಿದಿನ ಏತೊಂಜಿ
ಇಂಪು-ತಂಪು-ಪೊರ್ಲು ತೂಯರೆ !
ತುಳುವಪ್ಪೆಗೆ
ಅಪಗ ಬಂಗದನೇ ಬದ್ಕ್ ಇತ್ತಿನಿ
ಬಂಜಿಗಿತ್ತಿಜಿ ಕೈ ಅಮರ್ದ್ ತಿನರೆ
ತಟ್ಟೆಡಿತ್ತಿಜಿ ಬರ್ಚಿದ್ ಬೆಂಜನದ ನುಪ್ಪುನುನರೆ
ಮಿರಿ ಮಿರಿತ ಜರಿ ಅರುತ ಪಟ್ಟೆ ಸೀರೆ ಇತ್ತಿಜಿ
ಇಲ್ಲ ಜಾಲ್ ಕಡತ್ ಊರು ಪಿದಾಡರೆ !
ಅರೆ ಬಂಜಿ ಅರೆಕುಂಟು
ಮಾತಾ ಅರೆ ಬರೆ
ಇನಿ ತೂವನಗ ಎಂಚಿನ ಅಬ್ಬರೊ
ಸೊಲ್ಮೆ ಸಂದಾವೊಡು ನಿಕಲೆಗ್
ಊರುಬುಡುದು ಪೊಯ್ಯದೂರುಡು
ಸೊಂದು ಬೆಂದಿನ - ಬೆಂದ್ ಗೆಂದಿನ
ಅರಬೆರೆ ಬೂಡುದ ತಂಕದ ತುಳುವೆರೆ !
ತುಳುವೆರೆ ಜೋಕುಲು
ಏಳೂರುಡು ಪುದರಾವೊಡು
ತುಳುವಪ್ಪೆನ ಪುದರ್ ಊರೂರು
ಪರಡೊಡು - ಪರಪೊಡು-
ಪಾರೊಡು - ರಾವೊಡು
ಪುಲ್ಲಿ ಬಾಲೆಲು ಅಲೆನ ಮಟ್ಟೆಲ್ಡ್
ಪದ ಪಾಡ್ಡನ ಡೆನ್ನನ ಪಂದ್ ನಲಿಪುನ
ತುಳುವಪ್ಪೆ ಕಣ್ಣಲಿತ್ ತೂವೊಡು !!
Comments
Post a Comment