Manjotti ಮಂಜೊಟ್ಟಿ

ರಡ್ಡ್ ತಾರೆದ ಮರ ತಡೆವೆರಾವಂದೆ ಕಡಲ್ದಬ್ಬರ ಜೀವ ತೇವು ಗೊಬ್ಬರ! ನಿಕ್ಲ ನೀರ ರಾಶಿ ಮೆರೆಯೆರೆ ಎಂಕ್ಲೆನ ಅಪ್ಪೆ ಸೆರಂಗುನು ಒಯ್ಪಡೆ ಒಟ್ರಾಶಿ ! ನಿಕುಲು ಕಡಲಪ್ಪೆನ ಜೋಕುಲು ಎಂಕುಲು ಸಿರಿಯಪ್ಪನೆ ಬಾಲೆಲು ! ಆದಿಪ್ಪು ಜಾತಿ ಬೇತೆ – ರೀತಿ ಬೇತೆ ನೀತಿ ತತ್ತುದು ಬದುಕಡೆ ಅಗರ್ ಮೀರ್ದ್ ಇಂಚಿ ಬರಡೆ ಬೇತೆಗ್ಲೆನ ಜೀವೊದೊಟ್ಟು ಪೊಕ್ಕಡೆ -ಪೊಕ್ಕಡೆ ಗೊಬ್ಬಡೆ ! ನಿಕಲ್ನಾತೆಗೆ ನಿಕುಲು ಬದುಕುಲೆ ಪಾಪದ ಎಂಕ್ಲೆನ್ಲ ಒಂತೆ ಬದ್ಕೆರೆ ಬುಡ್ಲೆ !

ಬಡವುದ ನುಪ್ಪು ಬೆಂದಿನಾಯಗುಪ್ಪು ಎತ್ತರ ಬಾನೊಡು ತಿನ್ಪು ದೀತೆರ್ ದೇವೆರ್ ದಿನ್ನೊಡು ! ಕೈಟಾವಂದ್ ಪಂಡುದ್ ಕುಲ್ಲುಂಡ ಬಂಜಿದ ಬಡವು ಮಾಜುಂಡ ? ಬೆರಿ ಬಗ್ಗಾದ್ ಬೆಂದುಂಡ ಬೇರಿಕಂಟುದಿ ಬಂಜಿ ದಿಂಜಾಂದ ? ತಿನೊದಾಂಡ ಬೆನೊಡು ಬೆಂದುದೆ ಉನೊಡು ಬೆಗರ್ ಸೀಂಟಿನ ನುಪ್ಪು ಬೆಂದಿನಾಯನ ಬಾಯಿಗ್ ಒರಿಂಡಂಚಿ ಪಾಡಿ ಇಲ್ಲ ಕಾಪುನ ನಾಯಿಗ್ ! ತಿಕ್ಕೆರಾವಂದ್ ಪುಂಡಿ ನುಪ್ಪು ಬೆನಂದಿನಾಯಗ್ ಉಪ್ಪೆರಾವಂದ್ ಬಡವು ಬಡಪತ್ ಬೆನ್ಪಿಜೀವೊಗು !!.

ದಿನಾ ಮೀಯೊಂದಿತ್ತೆ .... ಮೈಟಿತ್ತಿ ಕುರೆ ದೆಕ್ಕುದು ದೆತ್ತುಂಡು ಸಾಬುನ್ದ ನುರೆ ಮನಸುದುಲಯಿದ ಪೋವರೆ ಈರೇ  ನೆಲೆ ಅವೊಡಾಂಡು  ದೇವೆರೆ !       

ಪರಿಲಕ್ಕ  ಅಮಲೆರುಂಡು ಪ್ರಾಯ ಕರಿಲಕ್ಕ                                                                       ಅಮಲ್ ಪಿರಿಯುಂಡು                                               ಪುದೆ ಇನಿ ಮಿತ್  ಮಲ್ಲೆ ಕಾರಮುದೆಲ್ ಜಾವೊಡತ್ತೆ  ಎಲ್ಲೆii ಮುಪ್ಪೋಡುಪ್ಪನ  ಜವ್ವನದ ಜೀವ ಸರ ಸಂಚಾರ  ನರನಾಡಿಡ್ ಮೆಂಚಿ ಪಾರುಂಡು ಪಿಲಿ  ಗೊಬ್ಬಾವುಂಡು ಕುಲ್ಲೆರಂಚಿ ಬುಡಂದ್  ii ಅಜಿಪ ಆವನಗ ಬೆಂದು ಸೊಂದಿನ ಜೀವ ಮಾತಾ ಮಂದ ಮಂದ ಮಯ ಮಯ  ಮಾಯೊಡು ಬೂರುಂಡುii ಸೊಂಪ  ಆವನಗ ನನ  ಎಂಚಿ ಸಾವ ? ಪೋಯಿನಲ್ಪನೆ ಒರಗುಂಡು ಕುಲ್ಲಿನಲ್ಪನೆ  ಪರಡುಂಡು ಮಗುರುಂಡುii ಪಿರಿಯಮುಟ್ಟ  ಮಾತ್ರ ಎನ್ನ ಎನ್ನ ಕರಿಬೊಕ್ಕ  ಮಾತಾ ಯೇರ್ನೆರ್ನ ! ii