ಉಪ್ಪಿನೀರ್ ಅಂಚಿಗ್ ತುದೆತಾ...
ಉಪ್ಪಿನೀರ್ ಅಂಚಿಗ್ ತುದೆತಾ..... ============================== ''ವಾಡದ ದೇಜಪ್ಪಣ್ಣೆ ಸೈತೆರ್ಗೆ ಮಗಾ,,,, '' ಅಪ್ಪೆ ಅಂಚಿಡ್ ಫೋನುಡ್ ಪನ್ನಗ ಸುಮಾರ್ ಪೊರ್ತು ಎನ್ನ ಡೊಂಡೆಡ್ ಸ್ವರ ಆಡಂಗಿಲಕ್ಕ ಆಂಡ ! ''ಯಾನ್ ಬರೋಡೆ ಅಮ್ಮಾ , ಯಾನ್ ಬನ್ನ ಮುಟ ಪುಣ ದೀವೆರಾ ? ''ಮಗಾ .... ದಾಯೆಗ್ ಈತ್ ಅಕ್ಲೆಸ ಬುಡ್ಪಾ ? ಆರ್ ದಾನಿ ನಿನ್ನ ಸಂತಾನ್ದಾರ ? ಅವುಲಾ ಈ ಬೊಂಬಾಯಿಡ್ದ್ ಇಡೆ ಬನ್ನ ಮುಟ ಪುಣ ಕುಮೇವು . ಬೋಡ್ಚಿ , ಯಾನ್ ನಿಕ್ಕ್ ಪನೆರೆಗಾವಂದಿತ್ತುಂಡ್ !'' ಅಪ್ಪೆ ಬಾಯಿ ತತ್ತಿ ಪರಮೋಸೊಗು ಅರೆನೇ ನಾಲ್ ನೆರೊಂಡೆರ್. ಛೆ ! ಇನಿ ದಾಯೆಗಪ್ಪಾ ಫೋನ್ ಮಲ್ತೆ ! ಕಾಂಡೆ ಕಾಂಡೆನೆ ಇಂಚಿ ಸುದ್ದಿ ಕೇನೊಡಾಂಡ ! ಸಂತಾನದಕುಲು ಆತುಂಡಲಾ ಈತ್ ಬೇಜಾರ್ ಆತಂದ್ ! ಆಂಡ ದೇಜಪ್ಪಣ್ಣೆ ಅಂಚತ್ ! ಎಂಕಾರ್ ಸಂತಾನದಕ್ಲೆಡ್ಲಾ ಒಂತೆ ಮಿತ್ !. ಮನಸ್ ಪದಿನೈನ್ ವರ್ಷ ಪಿರ ತಿರ್ಗ್ ತೂಯರೇ ಸುರು ಮಲ್ತು೦ಡು. ಎಂಕಪಗ ಪದ್ರಾಡ್ ವರ್ಷ ! ''ಅಮ್ಮಾ ಎಂಕ್ ಪೊರ್ತು ಆಂಡ್ ಯಾನ್ ಶಾಲೆಗ್ ಪೋದು ಬರ್ಪೆ'' ಬಾಲೆ ಕಂಜಿ ಗೌರಿನ್ ಅಮಸರ ಅಮಸರೋಡ್ ಪೇರೆಲೆದ ಮರಕ್ ಮೇಯೆರೆ ಕಟುದ್ ಇಲ್ಲದ ಎದುರ್ದ ಅಂಬಿ ಅಡ್ದಿನ ಜಾಲ್ಡ್ ಮುಲ್ಲೆಡ್ ಜಗಲೆಡ್ ಪಸರ್ದಿನ ಬೂಕುಲೆನ್ ಕಾಕಿ ಚೀಲದುಲಾಯಿ ದಿಂಜಾವೊಂದು ಪಾರ್ ಬತ್ತುಂಡ ಕೋಡಿದಲ್ಪ ದೇಜಪ್ಪಣ್ಣೆ