Manjotti ಮಂಜೊಟ್ಟಿ

ಪಗೆ  ಮದಪೊಡು   ಪಗೆಮಾನಿಗಾಂಡಲಾ ಬಿನ್ನಾದಿಗೆದ  ಮಾನಾದಿಗೆ ಕೊರೊಡುಗೆ ಮಚ್ಚರದ ಕಿಚ್ಚಿನ್ ಬಂಜಿದುಲಾಯಿ ದೀದ್ ನಿಗಿ ನಿಗಿ ಪೊತ್ತೆರೆ ಬುಡೆರಾವಂದ್ ಉಡಲ್  ಪಡಿಲಾವು! ಮೋಕೆ ಬಿತ್  ಕೊಡಿಯಂದ್ ದಿನ ದಿನತ ಅನುಪಾನೊಡು ಬೇನೆ ಮದಪು ದಿಂಜಿ ಮನಸುಡ್ ಮಲ್ಲಿಗೆದ ಕಂಮೆನ ಉದಿಪು ಪೆಟ್ಟುದ  ಕಲೋಟು ಗೆಂದುದ್  ಮಗುರಿನ ಕೋರಿಲಾ ಅಡ್ಯೋರೆಗೆ  ಪೋದು ಬೈಪಿನಿ ಕೈಪೆಡ್  ಮೆರೆಯಿ ಜೀವಾ ಅರಿ ಬಿರ್ಕುನ ಕಾಲೋಗು ಖಾಲಿ ಕೈಟೆ  ಕಾಟೊಗೇರುನಿ ಎಲು  ದಾಂತಿ  ನಾಲಾಯಿ ಬಾಯಿ ತತ್ ಪಾತೆರು ಎದುರಿತ್ತಿನ ಕೂಲಿ ಅಗ್ಗಿದುಂತದು ನೆರು! ಇನಿ ಇತ್ತಿನಾಯೇ ಎಲ್ಲೆ  ಇಜ್ಜೆ ಮೀಸೆ ತಿರ್ಗಾದ್ ಮೆರೆಯಿನಾಯೆ   ದಿಂಜ  ದಿನ ಒರಿಯುಜೆ !

ಯಾನ್ ನೀರ್ ಈ ಪೇರ್, ಮೋಕೆ ತುಲಿತುದ್  ಸಂಸಾರೊಡು   ಬೊಲ್ನೈ  ಉರ್ಕೊಡು ! ಯಾನ್ ಮುಗಲ್  ಈ ಮಣ್, ಕರಾದ್ ನೀರಾದ್ ನಿನನ್ ಸೇರ್ದ್  ಪಚ್ಚೆ ಪೈರಾವೊಡು ! ಯಾನ್  ದೈ ಈ ಪೂ, ಕಾಯಿ ಕಟುದು ಮಟ್ಟೇಲ್ಡ್  ಜೋಕುಲು ಕಿಲಿ ಕಿಲಿಂದ್ ತೆಲಿಪೊಡು ! ಯಾನ್ ಮದ್ದಲೆ ಈ ತಾಳ,  ಚಂಡೆದ ಸ್ವರೋಕು    ದೊಂಡೆ ಸೇರ್ದು  ರಂ ಗದ  ಮಂಚೊಡು ರಂಗಾವೊಡು ! ಯಾನ್ ಪುರಲ್   ಈ ಉಸುಲ್,  ತಂಪು ಗಾನದ  ಸುದೆ ಉಡಲ್ ನಿಲ್ಕೆ ಪರಪೊಡು ! ಯಾನ್ ಕಡಲ್  ಈ ಕಪ್ಪಲ್,   ಸೆರೆತ ಸುಲಿಕ್  ತಿಕ್ಕಂದೆ ಸಂಸಾರ ಕೋಡಿ ಯೆತ್ತೊಡು ! ಬದುಕ್ ಬಣ್ಣದ ಗೊಬ್ಬು ಪಣಿ ಬರ್ಸದ  ಇನೆ ದೊಂಬುಡು ರಂಗ್ ದ ಕಾಮನ ಬಿಲ್ಲುನು ನಿನ ಕಣ್ಣುಡ್ ಯಾನ್ ತೂವೊಡು !!.