''ತುಳು ಬೂಡು'' ಗೊಂಜಿ ಗೆಲ್ಮೆದ ಪದ !
''ತುಳು ಬೂಡು'' ಗೊಂಜಿ ಗೆಲ್ಮೆದ ಪದ !
ತುಳು ಕೊಂಜಿ ದೇವೆರೆ ಪದ , ಭಜನೆ , ತುಳುಅಪ್ಪೆನ ಬೂಡುದ ನೆನೆಕೆದ ಪದ ಇಂಚಿನವೆನಾಂಡಲಾ ಅಕೇರಿಗ್ ತುಳು ಜನ ಸಂಬಂಧದ ಕಜ್ಜೊಲೆಡ್ಲಾ ಪನೋಡು ಪನ್ಪಿನವೆನ್ಲಾ ನೆಂಪ೦ದೆ ಕನ್ನಡದ ಪ್ರಾರ್ಥನೆಲೆನ್ ಅತ್ತಾ ೦ಡ ಸಂಸ್ಕೃತದ ಶ್ಲೋಕೋಲೆನ್ ಪನರೆ ಸುರು ಮಲ್ತ ! ತುಳುಟ್ ಆ ಮಟ್ಟ್ ದ ಪದಮುಡೆದಿಜಿ ಪನ್ಪಿನ ಉದಾರ್ಮೆಡ್ ಅವು ಅಡೆಗೆ ಮುಗಿಯುಂಡು !
ಗಾಂಧೀ ಕಾಲೊಡೆ ಸ್ವಾತಂತ್ರ್ಯದ ಕೊಂಬನು ಉರ್ಪರೆ ಅಪಗನೆ ನಾರಾಯಣ ಕಿಲ್ಲರ್ ,ಎಸ್ ಯು ಪಣಿಯಾಡಿ ,ಹೊನ್ನಯ್ಯ ಶೆಟ್ರು , ಮೋನಪ್ಪ ತಿಂಗಳಾಯೆರ್ ಇಂಚಿನಂಚಿನ ಮಲ್ಲ ಬರವುದಕುಲು ತುಳುಟ್ ಬೂಡು ಭಕ್ತಿದ , ನೀತಿ ರೀತಿದ ಪದೊಕುಲೆನ್ ಬರೆದ್ ಪುದರಾದಿತ್ತೆರ್ !ನರ್ಕಳ ಮಾರಪ್ಪ ಶೆಟ್ರೆನ ಪರಡೆ ಕಲಿ ಗಂಗಸರ ಬದ್ಕ್ ಮಾರ್ ತಿನುವು ಇಂಚಿನ ತಿರ್ಲುದ ಪದೊಕುಲು ಅಪಗದ ಜವನೆರೆನ ಚಟ್ ಅಬ್ಬೆಸೋಲೆನ್ ಉಂತಪದ್ ಬುಡುಗಡೆತ ಲಡಾಯಿಡ್ ಸೇರ್ಸಾವೊಂದಿತ್ತಗೆ ಪನ್ನಗ ತುಳುಟ್ ಬರವುದ ಬಡಪತ್ ಇತ್ತೀಜಿನ್ಪಿನ ಗೊತ್ತಾವು
ಮೊಕ್ಲೋಟ್ಟುಗೆ ಮಲ್ಲಾಯಿ ಮೋನಪ್ಪ ತಿಂಗಳಾಯೆರೆಗ್ ತುಳು ಬೂಡುಗೊಂಜಿ ಬೂಡು ಗೀತೆ ( ನಾಡಗೀತೆ ) ಬೋಡುಂದು ತೋಜಿಂಡಾ ದಾನಿಯೊ ?
ಬರೆಯೆರ್ ....
ಜಯ ಜಯ ಜಯ
ತುಳುವ ಸೀಮೆ ಅಪ್ಪೆ ನಾಡುಗ್
ಜಯತು ನಂಕ್ ಜನ್ಮ ಕೊರ್ತಿ
ಪುಣ್ಯ ಭೂಮಿಗ್ !!೧!!
ನೇತ್ರಾವತಿ ಕುಮಾರಧಾರಿ ಪುಲನಿ ಫಲ್ಗುಣಿ
ಸೀತಾ ಸ್ವರ್ಣ ಸುದೆಲು ಚಂದ್ರ ಗಿರಿ ಪಯಸ್ವಿನಿ
ಪುದರ್ ಪೋಯಿ ಈ ಸುದೇಲೂ ಘಟ್ಟದ ಮುದೆಲುಡೇ
ಜತ್ತ್ ದ್ದ್ ಬರ್ಪಿ ಪೊರ್ಲು ದಾನೇ ಬೈಲ್ ಸೀಮೆಡೇ ! ೨!
ಮುಡಾಯಿ ಘಟ್ಟ ಸೀಮೆ ಗಡಿಟ್ ಪುಲ್ಯ ಆಪಿನಾ
ಪಡ್ಡಾಯಿ ಕಡಲ ಗಡಿತ ಶೋಭೆ ಪೊರ್ತು ಕಂತುನಾ
ಕನ್ನಡ ಕೊಂಕಾಣಿ ಮರಾಠಿ ಮಲಯಾಳಿ ಬಾಲೆಲೇಗ್ಲಾ
ಉಣುಪು ಪೊದೆಪು ಕೊರ್ದು ಸಾಂಕು ಪುಣ್ಯ ಸಾಧ್ವಿಗ್ !೩!
ಜಯ ಜಯ ಜಯ
ತುಳುವ ಸೀಮೆ ಅಪ್ಪೆ ನಾಡುಗ್
ಜಯತು ನಂಕ್ ಜನ್ಮ ಕೊರ್ತಿ
ಪುಣ್ಯ ಭೂಮಿಗ್ ii
ಪದತುಲಾಯಿ ಜತ್ತ್ ದ್ ತುಳುವ ಮಲ್ಲಿಗೆಡ್ ನಮ್ಮ ಪೆರ್ಮೆದ ತುಳುವೆ ಕೃಷ್ಣ ಕಾರಂತೆರ್ ಈ ಪದೊನು ನಮ್ಮ ಮುದೆಲ್ಗ್ ಕಂತ್ ಕೊರ್ದು ಮೈ ಇರ್ಮನೆ ಮಲ್ದೆರ್ ! ಬರ್ಪಿ ತುಳು ಸಾಹಿತ್ಯ ಸಮ್ಮೇಲೊನೊಡು ಈ ಪಡೋನು ತುಳುನಾಡುದ ಬೂಡುದ ಪದವಾಡ್ ಪಂಡುದ್ ಮೋನಪ್ಪ ತಿಂಗಳಾಯೆರೆನ ಪುದರ್ ನೊರಾ ಲೆತ್ತುದ್ ಅರೆಗ್ ತುಳುವೆರೊಂಜಿ ಮನಸುಡೇ ಮಾನಾದಿಗೆ ಮಲ್ಪೆರೆ ದಾಯೆ ಬಲ್ಲಿ ?
--------------ಶಾಂತಾರಾಮ್ ಶೆಟ್ಟಿ
--------------ಶಾಂತಾರಾಮ್ ಶೆಟ್ಟಿ
Comments
Post a Comment