ಪನೆರಾವಂದಿನ ಒಂಜಿ ಬೇನೆ

ತುಳುವಪ್ಪೆ ಯಾನ್
ಮಟ್ಟೇಲ್ಡ್ ಮಾನಾದ್  ಮಲ್ಲೆ ಮಲ್ತಿನ
ಗಂಜಿ ತೆಲಿತೊಟ್ಟುಗು
ಮಂದ ಪೇರುನು
ಕುಂದ ಕೊರ್ತಿನ

ತುಳುವೆ ಪೆಲಕಾಯ್ದ ಲಕ್ಕ
ಮೆದುವಾದ್ ಮೆರೆಯರ್
ಕರ್ಮಾರ್ದ  ಮರತಲಕ್ಕ
ಕಡಕ್ಕಾದ್  ಬುಲೆಯರ್
ಬಿರ್ಸೆರುಂದೆ ಪುದರಾಯಾರ್!

ಊರೂರು  ತಿರ್ಗಿನಕುಲು
ಪೋಯಿನಲ್ಪ  ಬತ್ತಿನಲ್ಪ
ಬೇರೂರ್ದು
ಬೇಗರ್ ಸೀಂಟುದು
ಬೆಂದಿನಕುಲು -ಸೊಂದಿನಕುಲು

ಅಪ್ಪೆ ಪನ್ಪಿನ  ಮೋಕೆ
ಮದಪಂದೆ
ಇತ್ತಿನಲ್ಪ  ನೆಂಪು ಮಲ್ತೊಂದೆ
ಮಣ್ಣಪ್ಪೆನ  ಪರಕೆ ತೀರಯರ್
ಕಣ ನೀರ್ ಸೀಂಟಿಯರ್.

ನನ  ದುಂಬುಗೆಂಚ  ಮಗ
ಎನ್ನ ಪುಲ್ಲ್ಯಾಡ್ಲು?
ಪಾತೆರೇರ  ಎನ್ನ ಬಾಸೆ
ತೀರವೆರಾ ಎನ್ನ ಆಸೆ ?
ಕರಿ  ಪತ್ತಂದೆ  ಅಮಾಸೆ !

ನಡಪಾವೆರಾ  ಕಟ್ಟು ಕಟ್ಟಳೆ
ರೀತಿ ರಿವಾಜಿನ್ ?
ಕಡಪಾಯೇರ  ನಾಡ ಗಡಿನ್
ಊರ ಪೊರ್ಲುನು
ನೀತಿ -ರೀತಿನ್ ?

ಮದಪಯರತ್ತ  ದೈವ ದೇವೆರೆನ್
ನಾಗ ಬನಕುಲೆನ್
ಪಚ್ಹ ಪಜಿರುನ್
ಪೊದ್ದಿದಿನ
ಕಂಡ  ಬರಿನ್
ತಾರೆ-ಬಾರೆ -ಕಂಗು ತೊಟೋನು.

ಉಂಗಾವಯರತ್ತಾ
ಬಾಕ್ಯಾರ್- ಮಜಲುನು
ಬೊಟ್ಟು- ಗುಡ್ದೆನ್
ಸಿರಿಯಪ್ಪೆನ ಮೈಕಂಟುದಿನ
ಪಚ್ಚೆ  ಪಟ್ಟೆ ಸೀರೆನ್.

ಮನಸುದುಲಾಯಿ ಉಂಡು
ಪನೆರಾವಂದಿನ  ಬೇನೆ.
ಇನಿಕಿತ್ತಿನ ಅಬ್ಬರೊನೇ
ನನ ದುಂಬುಗಾವ
ಒರ್ತರೊನೆ?. 

ನಿಗುಲೆನ್ನ ಜೋಕುಲು
ಅಪ್ಪೆ ಮನಸ್ ತೆರಿದಿನಕುಲು
ನಿಗಲ ಜೋಕುಲಾಂಡ
ಇನಿ ಮುಟ್ಟ
ಅಜ್ಜಿನೊರಲಾ  ತೂವಂದಿನಕುಲು


ತೆರಿಪಾವರ ಅಗಲೆಗ್
ನಿಗಲಪ್ಪನೆ
ಬೇನೇನ್
ಒರಿಪಾವರ ಬಾಲೆಲೆ
ತುಳು ಅಪ್ಪೆನ ಪುದರುನು ?


ಶಾಂತಾರಾಮ್ ಶೆಟ್ಟಿ