ಬದುಕೊಡು.............. ತಾರೆದ ಮರತ ಲಕ್ಕ!!
ಬದುಕೊಡು.............. ತಾರೆದ ಮರತ ಲಕ್ಕ!!
ತುಳುನಾಡುಡ್ ಪೊಸ ಇಲ್ ಕಟ್ಟುದ್ 'ಒಕ್ಕೆಲ್' ಮಲ್ಪುನ ಪೋರ್ತುಡು ಪೂಜೆದ ಭಟ್ರು ಪನುವೆರ್ .......,
'ಇಲ್ಲದ ಯಜಮಾನೆ ಇಲ್ಲದ ಗೃಹಲಕ್ಷ್ಮಿ ಆಯಿನ ಬುಡೆದಿನೊಟ್ಟು ಸೇರೊಂದು ಇಲ್ಲದ ನಂದಿ ಬಾಕಿಲ್ದ ಸರ್ತೊಗು ಎಡ ಬದಿಟ್ ಬಡಕಾಯಿ ಪಡ್ದಾಯಿದ ನಡುಟ್ ಜಾಗೆದ ಕುಬೇರ ದೇವೆರ್ನ ವಾಸ ಸ್ಥಾನದಲ್ಪ ಈ ಭೂಲೋಕದ ಕಲ್ಪವೃಕ್ಷ ಪಂಡುದೆ ಪುದರಾತಿನ ತಾರೆದ ದೈ ನಡ್ದು ನೀರ್ ಮೈತುದ್ ಕೈ ಮುಗಿಯೊಡು, ಅವು ಬುಲೆವೊಂದು ಬತ್ತಿಲಕ್ಕ ದಿನಾಲ ಕಾಂಡೆ ಲಕ್ಕುದು ತಾರೆದ ಮರನ್ ಸುರುಕ್ಕು ತೂವೋಡು '!.
ಅಂಚನೆ ಇಲ್ಲ ಎದುರ್ಡು ಬಡಕಾಯಿ -ಪಡ್ದಾಯಿಡ್ (north-west ) ತಾರೆದ ಮರ ಬಡಕಾಯಿ -ಮುಡಾಯಿಡ್ (north - east) ತುಳಸಿ ಗಿಡ ಸ್ಥಾಪನೆ ಆವು.
ವಾಸ್ತು ಪ್ರಕಾರ ಇಲ್ಲದುಲಾಯಿ ತಾರೆದ ಮರಡ್ದು ಸಕಾರಾತ್ಮಕ ಶಕ್ತಿ ( possitive energy ) ಬೊಕ್ಕ ತುಳಸಿಡ್ದು ಪ್ರಾಣವಾಯು ಪಸರನೆಡ್ದು ಅರೋಗ್ಯ ಅಭಿವೃದ್ಧಿ ಆಪುಂಡು ಪನ್ಪಿನ ನಂಬಿಕೆ .
ನಮ್ಮ ಊರುಡು ಇಲ್ ಕಟ್ಟನಗ "ಆಯ " ತೂಪಿನ ಕ್ರಮ ಉಂಡು. ಸೂರ್ಯ ದೇವೆರ್ ಇಲ್ಲದ 'ಬೆರ್ಸೊಲ್'ಗು ( ಇಲ್ಲದ ನಡುಕೋಲುಗು) ಸರ್ಕೆ ( ಸಮಾನಾಂತರ ) ಆದ್ ಮುಡಾಯಿಡ್ದು ಪಡ್ದಾಯಿಗ್ ( east to west) ಪೋನಗ ಬೊಲ್ಪು ಸರಿ ಸಮೋಟು ಆಯಾಯ ಕೊಣೆಗ್ ಸಮ ಸರಿಕೆಡ್ ಬೂರೊಡು ಪನ್ಪಿನ ಕಾರಣ. ಇಲ್ಲದ ನಡು ಬಾಕಿಲ್ನ್ ( main door ) ಬಡಕಾಯಿ ಮರ್ಗಿಲ್ಡು ಇಲ್ಲದ ನಡುಕ್ಕ್ ಬರ್ಪಿಲಕ್ಕ ದೀಪೆರ್..... ಉಂದೆಕ್ಕ್ 'ನಂದಿ ದ್ವಾರ' ಪಂಡುದ್ ಲೆಪ್ಪುವೆರ್ , ಈಶ್ವರ ದೇವೆರ್ ನಂದಿ ಸಮೇತ ಈ ಬಾಕಿಲ್ದು ಇಲ್ಲದುಲಾಯಿ 'ಸುಖ ಪ್ರವೇಶ' ಮಲ್ಪುವೆರ್ ಪನ್ಪಿನ ನಂಬೊಲ್ಗೆ. ತೆಂಕಾಯಿ ಬಾಕಿಲ್ದು 'ಯಮೆ' ಸುಲಭೊಡು ಪೊಗ್ಗುವೆಗೆ, ಅಂಚ ಇಲ್ಲಗ್ ತೆಂಕಾಯಿ( south door ) ಬಾಕಿಲ್ ದೀಪಿನ ಕ್ರಮ ಇಜ್ಜಿ.
ಇಂದ್ರನ (ದೇವಲೋಕದ )ಕಲ್ಪವೃಕ್ಷ.
ಭೂಲೋಕದ ಕಲ್ಪವೃಕ್ಷ .
ಭಟ್ರು ಪಂಡೆರತ.........
'ಕಾಂಡೆ ಲಕ್ಕುದು ಕಣ್ ಬುಲಾಯಿ ಸುರುಕ್ಕು ತಾರೆದ ಮರನ್ ತೂವೊಡು ' ಪಂಡುದ್,
ದಾಯೆಗಾದಿಪ್ಪು..... ?
ಆಧ್ಯಾತ್ಮಿಕವಾದ್ ಪನ್ಪಿನಾಂಡ ಪುಲ್ಯ ಕಾಂಡೆದ ಪೋರ್ತುಡು ಮೂಜಿ -ಕೋಟಿ ದೇವೇರ್ನಕುಲು ತಾರೆದ ಮರತ ತುದಿಟ್ ನಿಲೆ ಆದ್ ಇಪ್ಪುವೆರ್ಗೆ. ಅಂಚ ಕಾಂಡೆದ ಪೊರ್ತುಡು ತಾರೆದ ಮರಕ್ ಕೈ ಮುಗಿಯರ್ಡ ಮಾತಾ ದೇವೆರ್ನ ಸಾನಿಧ್ಯ ಒಂಜೆ ಕಡೆಟ್ ತಿಕ್ಕುಂಡು ಪನ್ಪಿನ ಒಂಜಿ ನಂಬಿಕೆ.
ತಾರೆದ ಮರೋನು ತೂವೊಂದು ಪೊಯಿಲಕ್ಕನೆ ಈ ಮರತ ಕೆಲವು ವಿಶೇಷ ಗುಣೋಕುಲು ನಮ್ಮ ಗಮನೊಗ್ ಬರು . ಮಾತ್ರ ಅತ್ ಈ ಗುಣೋಕುಲು ಮನುಷ್ಯ - ಜೀವನೊಗು ಮುಟ್ಟದ ಸಂಬಂಧ ತೋಜಾವೊಂದು ಪೋಪುಂಡು.
ಎತ್ತರೋಗು ಸರ್ತ 'ಸೂರ್ಯಮುಖಿ'ಯಾದ್ ಬುಲೆವುನ ತಾರೆದ ಮೂಲಗುಣ, ಸೀದಾ -ಸಾದ ಆಯಿನಾತ್ ಎತ್ತರೊಗು ಬುಲೆವುನ ಈ ಮರತ ವಿಶೇಷ ಗುಣ. ಜೀವನೋಡು ಸೀದಾ ಸಾದಿಡ್ ತಿಗಲೆ ಕೊರ್ದು ಬದುಕೊಡು, ಎತ್ತರೊಗು ಬುಲೆವೊಡು ಪನ್ಪಿನ ಸಂದೇಶ ನರಮಾನಿಗ್ ತಿಕ್ಕು
ಅಂಚ ಪಂಡುದ್ ಈ ಮರ ಬೇತೆ ಮರಕುಲೆನ ಬೆಳವಣಿಗೆಗ್ ಯಾಪಲಾ ತೊಂದರೆ ಕೊರಂದ್. ತಾರೆದ ಸಿರಿ ಕೊಡಿಕ್ ಒಂಜಿ ಕೋಲು ಕಟಿಯರ್ಡಲಾ ತಾರೆದ ಮರ ನನೊಂಜಿ ದಿಕ್ಕುಗು ತನ್ನ ದಿಸೆನ್ ಬದಲ್ಪುಂಡುಗೆ.(ತಾರೆ ಇಲ್ಲದ ಓಡುದ ಮಾಡುದಂಚಿ ಬರಂದಿಲಕ್ಕ ಮಲ್ಪರೆ ಈ ಕ್ರಮ ಮಲ್ಪುವೆರ್ ) ಅಂಚಾದ್ ನಮ ತುಳುನಾಡುಡ್ ತಾಂಟ್ - ಮೊಂಟು ತಾರೆದ ಮರೊಕುಲೆನ್ಲ ತೂಪ . ಉಂದು ತಾರೆ ತನ್ನ ಮೂಲ ಗುಣೋಟು ಬುಲೆದಿನ ಅತ್ , ಬೇತೆಗ್ಲೆಗ್ ಅನುಕೂಲ ಆವೆರೆಗ್ ತನನ್ ತಾನ್ ಬಗ್ಗವೊಂದಿನ ಗುಣ. ನಿಜ ಬದುಕುಡ್ಲಾ ಬೇತಗ್ಲೆಗ್ ತೊಂದರೆ ಅವಂದಿ ಲಕ್ಕ ನಮ ಬದುಕೊಡು.
ಬಗ್ಗುದು -ತಗ್ಗುದು - ಒಗ್ಗುದು-ತಿರ್ಗುದು ಎತ್ತರೊಗು ಬುಲೆವುನ ತಾರೆದ ಮರ
ಕರಾವಳಿದ ಗಾಳಿದ ಬಿರ್ಸುಗು - ಬರ್ಸದ ಬರ್ಸುಗು ತಿಗಲೆ ಕೊರ್ದು ಉಂತುನ ಈ ಮರ ,ಏತೆ ಎತ್ತರೊಗು ಬುಲೆಂಡಲಾ ಮನುಷ್ಯ ಜೀವೊಗು ತೊಂದ್ರೆ ಕೊರ್ತಿನ ಕತೆ ಕಮ್ಮಿ , "ಏರ್ಲ ತಾರಾಯಿ ಬೂರ್ದು ಸೈತುಜೆರ್ಗೆ" ಪನ್ಪಿನ ವಾಡಿಕೆದ ಪಾತೆರ ಕೇನಿನಾತೆ ಸತ್ಯ . ಅಲ್ಪೊಂಜಿ -ಮುಲ್ಪೊಂಜಿ ಕೋಟಿ - ಚೆನ್ನೆಯೆರ್ನ ಅಪ್ಪೆ ದೇಯಿ ಬೈದ್ಯೆತಿ ಲಕ್ಕಂತಿನಕುಲು ಮಡಲ್ ಬೂರ್ದು ಸೈತೆರ್ ಪನ್ಪಿನ ಬುಡಿನಾಂಡ(ಅವುಲಾ ಕಪಟ ರೀತಿಡ್ ) ಈ ತಾರೆದ ಮರ ತೆಡಿಲ್ - ಮಿಂಚಿನ್ ತನ್ನ ಒಡಲ್ಗ್ ದೆತೊಂದು ನಮನ್, ನಮ್ಮ ಇಲ್ಲನ್ ರಕ್ಷಣೆ ಮಲ್ತಿನ ಪ್ರತಿ ಮರಿಯಾಲೋಡ್ಲ ನಮ ತೂಪ . (ಇತ್ತೆದ ಕಾಲೋಡು lightning conductor ಲು ಇಪ್ಪೆರೆ ಯಾರು...... ದುಂಬು ನಂಕ್ ತಾರೆದ ಮರನೇ ಗತಿ )
ಮೈಸೂಡಿ
ಸಜ್ಜನನ, ಶರಣೆರ್ನ್ ಮರಣೋಗು ಆತ್ ಬಿಲೆ ಉಂಡು
ತಾರಯ್ದ ಚಟ್ನಿ
ಕೊಪ್ಪರ
ತೆಪ್ಪು
ತಾರಯ್ದ ಎಣ್ಣೆ
ತಿಪ್ಪಿ
ಕಲಿ
ಕಡೆತ ಉಸುಲುಪ್ಪ ಮುಟ ಬೇತಗ್ಲೆಗ್ ಅಸರ್ಗ್ ಬೊಂಡ ನೀರ್ ಕೊರು ,ಕೊಪ್ಪರ ಆದ್ ಮಂಡೆಗ್,ನೆತ್ತಿಗ್ ತಂಪ್ಪುದ ಎಣ್ಣೆ ಕೊರು , ಕಜಿಪುದ ಅರೆಪುಗು, ಚಟ್ನಿಗ್, ತಾರಾಯಿಯಾದ್ ರುಚಿ ಕೊರು, ಮನಸುದ ಬೇಜಾರ್ ಮದಪೆರೆ ತೆಲಿ ಬಣ್ಣದ ಕಲಿ ಕೊರು , ಇಲ್ಲದ ಮಾಡುಗು ಪಕ್ಕಾಸ್ ಆದಿಪ್ಪು, ಇಲ್ಲದ ಕಜವುಗು ಮೈಸೂಡಿ ಆದ್ ಮಲಿನ ದೆಪ್ಪು, ತೆಪ್ಪು, ತಿಪ್ಪಿ ಆದ್ ಬೆಂದುರ್ದ ನೀರುಗ್ ಬೆಚ್ಹ ಕೊರು , ಮರಿಯಾಲದ ಅರೆಗಾಳಿಗ್ ತಟ್ಟಿ ಆದ್ ತಡೆ ಕೊರು, ಅರೆಗಾಲದ ದೆಂಬುಗು ಚಪ್ಪರದ ಮದೆ ಆದ್ ನೆರೆಲ್ ಕೊರು, ಮದಿಮೆ - ಮುಂಜಿಗ್ ದುಂಬು ಉಂತುದು ಒಪ್ಪಿಗೆ ಕೊರು, ದೇವೆರ್ನ ಮಂಡೆದ ಮಿತ್ ಅಭಿಷೇಕದ ನೀರಾದ್ ಬರು, ಕಾರ ಮುದೆಲುಗ್ ದರ್ಪುಕಾಯಾದ್ ಆದ್ ,ದೃಷ್ಟಿ ದೆಪ್ಪೆರೆ ಈಡುಗಾಯಿ ಆದ್ ಪುಡಿಯಾವು
ಇಂಚ ಜೀವ ಮಾನ ಇಡಿ ತನ್ನ ಬೇರುಡ್ದು -ತರೆ ಮುಟ್ಟ ಬೇತೆಗ್ಲೆಗಾದ್ ಬದುಕು. ಅವೆದಾತ್ರನೆ ತಾರೆದ ಮರನ್ ಭೂಲೋಕದ 'ಕಲ್ಪವೃಕ್ಷ' ಪಂಡುದ್ ಲೆತ್ತೆರೊ ದಾನ್ಯೊ .
ಇತ್ತೇ ಪನ್ಲೆ ...
ಬದುಕುನೇ ಆಂಡ
ಸೀದಾ ಸಾದಿಡ್
ತರೆ ದೆರ್ತುದು
ಎತ್ತರೊಗು ಬುಲೆದ್
ಸೈಪಿನೈಟ್ ದುಂಬು ನಾಲ್ ಜನೊಕು ಬೋಡಾಪಿಲಕ್ಕ ಬದುಕೊಡು
ತಾರೆದ ಮರತ ಲಕ್ಕ!!
ಪರೊಪಕಾರಾರ್ಥಂ ಇದಂ ಶರೀರಂ !
ಪರೊಪಕಾರಾರ್ಥಂ ಇದಂ ಶರೀರಂ !
ಎಲ್ಲೆಡಿಂಚಿ ಕಾಂಡೆ ಲಕ್ಕುದು ತಾರೆದ ತಾರೆದ ಮರಕ್ಕೊಂಜಿ ಕೈ ಮುಗಿಲೆ ....ಒಂಜಿ ದಿನ ಅತ್ ....ದಿನಾಲ !!
ಬರವು: ಶಾಂತಾರಾಮ್ ಶೆಟ್ಟಿ
ಚಿತ್ರ ಸಂಗ್ರಹ
Comments
Post a Comment