ಅಂಚಿನವುಲಾ ಒಂಜಿ ಕಾಲ ಇತ್ತುಂಡ್ .........

ಅಂಚಿನವುಲಾ  ಒಂಜಿ ಕಾಲ ಇತ್ತುಂಡ್ .........

1).  ಅಸರ್ ಜಗಲಿ .

 

ತುಳುನಾಡು  ಬಿನ್ನಾದಿಗೆಗ್,ಮಾನಾದಿಗೆಗ್  ಪುದರ್ ಪೋಯಿನ ಊರು. ಅಸರ್ ಕೆನೊಂದು ಬತ್ತಿನ ಬಿನ್ನೆ  ಗೊತ್ತಿತಿನಾಯೇ ಆವಡ್, ಪೋಸಬೆ ಆವಡ್ ಬಾಜಲ್ಗ್ ನೀರ್ ಕೊರ್ಪರಾ...?  ಪಂಡುದ್  ಕೇಂಡಾ   ಅಗಲೆನ್ ಅಸರ್ ಜಗಲೆಡ್  ಕುಲ್ಲಾದ್  ನೀರ್ಲಾ-ಬೆಲ್ಲಲ  ಕೊರ್ದು ಕಡಪುಡ್  ಕೊರೊಂದು ಇತ್ತೆರ್.

 

ನೀರುದ  ಒಟ್ಟುಗು  ಬೆಲ್ಲ  ಕೊರ್ನಾಂಡ ದೊಂಡೆದ ಪಸೆ ಜಾಸ್ತಿ ಪೊರ್ತು ಆಜುಜಿ ,ನೀರ್ ಪರ್ನಗ ರುಚಿಲ  ಹೆಚ್ಹಾಪುಂಡು ಪನ್ಪೆರ್.

 

ಅಸರ್ದ  ಬಗೆಕುಲು .

ಚಿತ್ರ: ಸಂಗ್ರಹ

1)ಅಲೆನೀರ್ .

ಅಸರ್ ಕೊರ್ಪಿನೈತಟ್ ಕೆಲವು ಬಗೆ ತೊಜಿದ್ ಬರ್ಪುಂಡು ,ಪೋರ್ತುಗ್ ತಕ್ಕ ,ಮರ್ಯಾದೆಗ್ ತಕ್ಕ  ಅಸರ್ ಕೊರೊಂದಿತ್ತೆರ್ 

ಬತ್ತಿನ ಬಿನ್ನೆ ಪ್ರಾಯೋದು ಮಲ್ಲೆ ಇತ್ತುನ ಹೆರಿಯೇ ಆಂಡ ,ಮಧ್ಯಾಹನ್ನ ದ ಪೋರ್ತುಗಾಂಡ  ಅಗಲೆಗ್ ಅಲೆನೀರ್  ಕೊರ್ವೆರ್.

ಅಲೆಕ್ ವಂತೆ ಉಪ್ಪು, ಕೈ ಮುಂಚಿ ಸೇರ್ಸಾದ್ ಖಾರ ಅಲೆನೀರ್  ಮಲ್ತು ಕೊರ್ವೆರ್.

 

2)ಚಾ - ತಿಂಡಿ 

ಚಿತ್ರ; ಸಂಗ್ರಹ ತುಳು ಕೋಪೆ 

 

 ಬತ್ತಿ ಬಿನ್ನೆ   "ಚಾ"ತ  ಪೊರ್ತು  ಬತ್ತೆರ್ಡ" ಚಾ"ಲ  ಚಾತ  ಬಾಯಿಗ್  ದಾನ್ಯಂಡಲ  ತಿಂಡಿಲ  ಕೊರೊಂದಿತ್ತೆರ್..ಕಾಂಡೆದ  ಪೋರ್ತುಡ್  ಗಟ್ಟಿ ಬಂಜಿಗ್ ಲಾ ..ಬೈಯ್ಯದ  ಪೋರ್ತುಗಾಂಡ  ಬಾಯಾಡವುನ  ತಿಂಡಿ ಲೇನ್  ಕೊರುವೆರ್.

 

3) ಬೊಂಡ  ನೀರ್ 

 ಚಿತ್ರ :ಶಾಂತಾರಾಮ್ ಶೆಟ್ಟಿ 

 

 ಬಿನ್ನೆ  ಮಲ್ಲ ಮಟ್ಟುದಾಯೇ ,ಊರ ಗುರ್ಕಾರೆ ,ಜಾತಿಡ್ ಮಿತ್ತುದಾಯೇ ಆದಿತ್ತುಂಡಾ   ಅಸರ್ದ ಮಲ್ಲ ಮರ್ಯಾದೆ  ಬೊಂಡ ಬರು .ಐಟ್ಲ ಗೆಂದಾಳೆ  ಬೊಂಡ  ಬತ್ತುಂಡ ಅವೆಡ್  ಮಲ್ಲ ಮರ್ಯಾದೆ ವೋಂಡು ?.

ಚಿತ್ರ : ಸಂಗ್ರಹ 

 

ಕೆಲಸದಾಯೆ  ಕೆತ್ತುದು ಕೊರ್ನ್ಯ  ಬೊಂಡೊನು ಇಲ್ಲದ  ಯಜಮಾನೆ  ತಾನೇ ಸ್ವತ  ಕೈಟು  ದೆತೊಂದು ಕೊರಿನಾಂಡ ಅವೆನ್ ವಿಶೇಷ  ಮರ್ಯಾದೆ ಪಂಡುದ್ ಪನೊಂದಿತ್ತೆರ್..... 

 

ಉಂದೆ  ಅತ್ತಾವಂದೆ  ಜೀರಿಗೆ ಕಷಾಯ , ಎಡ್ಮೆದ ನೀರ್ , ಪುನರಪುಲಿತ ಶರಬತ್ ,ಲಿಂಬೆದ ಶರಬತ್  ಇಂಚಿನ ಅರೋಗ್ಯ ವರ್ಧಿ  ಅಸರ್ಲೆನ್   ಕೊರೊಂದಿತ್ತೆರ್......

ಆವು  ಅಂಚಿನ ಕಾಲ ...

 

ಇತ್ತೇ.....

 

ಪೊಸಬಗ್ ನೀರ್ ಕೇಂಡ  ...ಕೊರುವೆರಾ ?

 

ಬಿನ್ನಗ್ ಕೊರ್ಯೇರ್ಡಲ ...

ಪೆಪ್ಸಿ, ಕೋಲ , ಸೋಡಾ  ರಸ್ನಾ ....!.

ಇಜ್ಜಾಂಡ  ಬೈ ಟು   ಚಾ !!