ಮಡಿಪೆರಾವಂದಿ ತುಳು ಪದ - ಉಪ್ಪಿ ನೀರ್ ಅಂಚಿಗ್

ಉಪ್ಪಿನೀರ್  ಅಂಚಿಗ್  ತುದೆತಾ.....  


''ವಾಡದ ದೇಜಪ್ಪಣ್ಣೆ ಸೈತೆರ್ಗೆ  ಮಗಾ,,,, ''
ಅಪ್ಪೆ ಅಂಚಿಡ್ ಫೋನುಡ್  ಪನ್ನಗ  ಸುಮಾರ್ ಪೊರ್ತು ಎನ್ನ ಡೊಂಡೆಡ್  ಸ್ವರ ಆಡಂಗಿಲಕ್ಕ ಆಂಡ !


''ಯಾನ್ ಬರೋಡೆ  ಅಮ್ಮಾ , ಯಾನ್ ಬನ್ನ ಮುಟ ಪುಣ ದೀವೆರಾ ?

''ಮಗಾ .... ಈ ದಾಯೆಗ್  ಈತ್ ಅಕ್ಲೆಸ ಬುಡ್ಪಾ ?  ಆರ್ ದಾನಿ ನಿನ್ನ  ಸಂತಾನ್ದಾರ ? ಅವುಲಾ  ಈ ಬೊಂಬಾಯಿಡ್ದ್  ಇಡೆ ಬನ್ನ ಮುಟ  ಪುಣ ಕುಮೇವು . ಬೋಡ್ಚಿ  , ಯಾನ್ ನಿಕ್ಕ್ ಪನೆರೆಗಾವಂದಿತ್ತುಂಡ್ !''

ಅಪ್ಪೆ  ಬಾಯಿ ತತ್ತಿನ  ಪರಮೋಸೊಗು  ಅರೆನೇ  ನಾಲ್ ನೆರೊಂಡೆರ್.

ಛೆ ! ಇನಿ ದಾಯೆಗಪ್ಪಾ ಫೋನ್ ಮಲ್ತೆ ! ಕಾಂಡೆ ಕಾಂಡೆನೆ  ಇಂಚಿ ಕಲಿ  ಸುದ್ದಿ ಕೇನೊಡಾಂಡ ! ಸಂತಾನದಕುಲು ಆತುಂಡಲಾ ಈತ್  ಬೇಜಾರ್ ಆತಂದ್ ! ಆಂಡ ದೇಜಪ್ಪಣ್ಣೆ  ಅಂಚತ್ ! ಎಂಕಾರ್ ಸಂತಾನದಕ್ಲೆಡ್ಲಾ ಒಂತೆ  ಮಿತ್ !.



ಮನಸ್ ಪದಿನೈನ್ ವರ್ಷ ಪಿರ ತಿರ್ಗ್ ತೂಯರೇ ಸುರು ಮಲ್ತು೦ಡು.
ಎಂಕಪಗ  ಎಲ್ಯಪದ ಪದ್ರಾಡ್ ವರ್ಷ !

''ಅಮ್ಮಾ ಎಂಕ್ ಪೊರ್ತು ಆಂಡ್   ಯಾನ್ ಶಾಲೆಗ್ ಪೋದು ಬರ್ಪೆ''  ಬಾಲೆ ಕಂಜಿ ಗೌರಿನ್  ಅಮಸರ  ಅಮಸರೋಡ್ ಪೇರೆಲೆದ  ಮರಕ್ ಮೇಯೆರೆ ಕಟುದ್  ಇಲ್ಲದ ಎದುರ್ದ ಅಂಬಿ ಅಡ್ದಿನ  ಜಾಲ್ಡ್  ಮುಲ್ಲೆಡ್ ಜಗಲೆಡ್  ಪಸರ್ದಿನ ಬೂಕುಲೆನ್ ಕಾಕಿ ಚೀಲದುಲಾಯಿ ದಿಂಜಾವೊಂದು  ಪಾರ್ ಬತ್ತುಂಡ   ಕೋಡಿದಲ್ಪ  ದೇಜಪ್ಪಣ್ಣೆ  ಅಪಗನೆ ಜೋಕುಲೆನ್  ಕಾತೊಂದಿಪ್ಪೆರ್ !

''ದಾನಿಂಬೆ ಶಂಕರ  ಈತ್  ತಡ ?!  ನನ ನಮ ಆಡೊಂದು  ಮಾದೊಂದು ಆಯೆರೆ ಪೋದು ಮುಟ್ಟನ  ನಿನ್ನ ಶಾಲೆದ  ಗಂಟೆ ಬೊಟ್ಟುನ ಕೇನುಂಡು ! ಬೊಕ್ಕ ಸರಳಾಯ ಮಾಸ್ಟ್ರು  ಮಂಡೆಗ್ ಕುಟ್ಟಿ ಕೊರ್ಯೆರ್ಡ  ಎನನ್  ದೂರರೆ  ಬಲ್ಲಿ !
 ಬಲ ಬಲ , ನನ  ಒರಾನೆ ಓಂತಿ ಲೈತಿಲಕ್ಕ ಲೈಪಡ , ವಾಡ ಕಂಕನೆ  ಬೂರು  ಬೊಕ್ಕ !''

ದೇಜಪ್ಪಣ್ಣೆ ತೆಲ್ತೊಂದೆ  ಎನ್ನ ಕೈ ಪತ್ತುದ್ ದೋಣಿದುಲಾಯಿ ಒಯಿತೊಂಡೆರ್ !

ಜಲ್ಲ ಪಾಡಿಲಕ್ಕ ವಾಡ   ಮಾದೊಂದು  ಒಚ್ಚೆರೆ ಸುರುವಾಂಡ್ ! ನನ ಅರ್ಧ ಗಂಟೆ ದೇಜಪ್ಪಣ್ಣನ  ರಣ ಪುರಾಣ ಕೇನೋಡು !!

ಯಾನುಪ್ಪುನ  ಕುದುರುಡ್  ಶಾಲೆ ಓಲುಂಡು?  ಕಲ್ಪುನ ಮನಸಿತ್ತುಂಡ  ಉಂದುವೇ ದೇಜಪ್ಪಣ್ಣನ ವೋಡೊಡು  ಕುಲ್ಲುದು  ಆಯೆರೆತ  ಪೇಂಟೆದ ಶಾಲೆಗ್  ಪೋವೊಡು!  ಅಪಗದ  ಶಾಲೆ ಕಲ್ಪುನ  ಬಂಗ ನೆನೆತುಂಡ ಇನಿ ಯಾನ್ ಈತ್  ಮಲ್ಲ ಜನ ಆವೆರೆ ಆತುವಾ ಪಂದ್ ಎನ್ನನಗನೆ   ಮೆಯ್ ಕಿಂಕೊನೊಡಾಪುಂಡು  !
ಉಂದುವೇ ದೇಜಪ್ಪಣ್ಣೆ ಇತ್ತಿಜೆರ್ಡ  ಯಾನ್ ಇನಿ ಬೊಲ್ಲೊಡು  ಮೀನ್ ಪತೊಂದಾ  ಅತ್ತ್ ಡ   ಗುಡ್ಡೆಡ್ ಎರು  ಮೇಪಾವೊಂದಾ ಇತ್ತುವೋಡಾ ದಾನ್ಯೋ ... ?

ಅರ್ಧ ಗಂಟೆದ ಶಾಲೆದ ಸಾದಿಡ್ ಓಲು ತೂಂಡಲಾ ನೀರ್ದ ರಾಸಿ !  ಸುರು ಸುರುಕ್ಕು ನೀರ್ ಡ್  ಗೊಬ್ಬೆರೆ ಕುಷಿಯಾಂಡಲ ದಿನಾಲಾ ಸುತ್ತಲಾ  ನೀರೇ ಆಂಡ   ಎಂಚಿನ ದಿನಾ  ಸಾವುನು ಗೊಬ್ಬುನ ?

ಸಾದಿದ  ಬಚ್ಚೆಲ್ಡ್ ಕುರುಕಟ್ಟುದು ಕುಪ್ಪುಲುದಲಕ್ಕ ಕುಲ್ಲುದಿನ ಜೋಕುಲೆನ್ ತೂದು ದೇಜಪ್ಪಣ್ಣೆ ಸುರುಕು ಯಕ್ಷಗಾನದ ಒಂಜಿ ಪದ ಸ್ವರ ಲಕ್ಕಾಯೆರ್.  ದೇಜಪ್ಪಣ್ಣಗ್  ಆಟ  ಪಂಡ ಜೂವದ ಗಂಟ್ . ಊರುದ  ಬಂಗ್ಲೆ ಮೈದಾನದ  ಒಂಜಿ ಆಟಲಾ  ತೂವಂದೆ ಬುಡಯೆರ್ . ರಾತ್ರೆ ಇಡೀ ಆಟ  ತೂಂಡಲಾ ಕಾಂಡೆ ಸಾಲೆದ ಪೊರ್ತುಗು ಒಂಜಿ ದಿನಲಾ ತಪ್ಪಾದಿನಾರ್ ಆತ್ . ''ಜೋಕುಲೆ ನಿಕುಲು ಸರಿ ಸಾಲೆಗ್ ಪೋದು ಕಲ್ಪುಲೆ  ಇಜ್ಜಂಡಾ  ಎನ್ನಕ್ಕ  ಬೊಕ್ಕ ವೋಡ  ಒಚ್ಹೋಡಾವು''  ಪಂಡುದ್  ಮಾತಾ ಜೋಕುಲೆನ ಬೆರಿ ಬೊಟುದು  ಉಮೇದ್ ಮಲ್ತಿನಾರ್.
ದೇಜಪ್ಪಣ್ಣ ನ  ಭಾಗವತಿಕೆ ಪೋದು  ನಲಿಕೆಗ್ ತಿರ್ಗಾನಗ  ವಾಡ  ಮಾಲೆರೆ ಸುರುವಾಂಡ್ .  ಜೋಕುಲೆನ ಬೊಬ್ಬೆಗ್ ದೇಜಪ್ಪಣ್ಣನ  ಆಟ   ಆರ್ದೋಡೆ ಪಿರಿಂಡ್ !

ಅಂದ್  ಎಂಕ್  ಇನಿಕ್ಕ್ ಲಾ  ಸರಿ ನೆಂಪು  ಉಂಡು ...

ಆನಿ ಶನಿವಾರ , ಶಾಲೆಗ್ ಅರ್ಧ ದಿನ ರಜೆ . ದೇಜಪ್ಪಣ್ಣೆ ವೋಡೊನು ಅರುವೆದ  ಬಾಕಿಲ್ಗ್ ಕನತ್  ಉಂತಾದ್
''ಜೋಕುಲೆ ತೂಲೆಗೆ ... ಅಂಚಿಡ್  ಉಪ್ಪುನೀರ್ ಇಂಚಿಡ್ ತುದೆತ  ಚಪ್ಪೆ ನೀರ್ . ಅರುವೆದ ಬಾಕಿಲ್ಡ್ ಒಂಜಾಯಿ ಬೊಕ್ಕ  ಚಪ್ಪೆ ಒವ್ವು ಉಪ್ಪು ಒವ್ವು ಪನುವರಾ ?   ನಿಕುಲು ಜೋಕುಲುಲಾ ಅಂಚನೇ  ನಿಕಲ  ಬಾಲೆ ಮನಸ್ ತೆಲಿ  ನೀರ್ದಲಕ್ಕ . ಉಪ್ಪು ಚಪ್ಪೆದ ಭೇದ ದಾಂತಿನ  ನಿಕಲ ನಲಿಪಾಟ ತೂಂಡ  ಮನಸ್ ಉರ್ಕಾರುಂಡು. ಈ ಪುಣ್ಯ ತೀರ್ತೋಡು ನಿಕ್ಲೆಗೊಂಜಿ ಪದ ಪಂಪೆ  ಕೇನ್ಲೆ !
ದೇಜಪ್ಪಣ್ಣೆ ಸ್ವರ ದೆರ್ತ್  ಪಂಡೆರ್

*ಉಪ್ಪಿ ನೀರ್ ಆಂಚಿಗ್ ಸುದೆತ  ಚಪ್ಪೆ ನೀರ್ ಇಂಚಿಗ್ .....ಅರುವೆದ ಆ ಕೋ ಡಿ ತೂನಗ .ಭೇದೋನೇ  ಮಾಜಿದ್ ಪೋಯಿಜಾ*

ಎಂಕ್ಲೆನಾ ಐಲೇಸಾದೊಟ್ಟುಗು   ದೇಜಪ್ಪಣ್ಣೆ ಪದ ಪಂದ್ ಮುಗಿಯನಗ ವಾಡ ಕೋಡಿಗ್  ಬತ್  ಎತ್ತುದುಂಡು !

ಆನಿ ರಾತ್ರೆ ಇಡೀ ಚಂದ್ರನ ತಿಂಗೊಲ್ದ ಬೊಲ್ಪುನು ತೂವೊಂದೇ ದೇಜಪ್ಪಣ್ಣೆ ಪಂತಿನ  ಪದೊನು  ಏತೋ  ಸಲ ಕೆಬಿಟ್ಟೆ ಗುಯಿಂ ಗುಯಿಂ ಕೇನೊಂದು ವನಸ್ಲಾ  ಮಲ್ಪಂದೆ  ಅಂಚನೇ ಜಗಲೆಡ್ ಜೆತ್ತಿನಾಯೆಗ್ ಯಾಪಾ ನಿದ್ರೆ ಬೈದುಂಡಾ ದೇವೆರೆಗೇ  ಗೊತ್ತು .

ದೇಜಪ್ಪಣ್ಣನ  ಸ್ವರೋಕಾ  ಅತ್ತ್  ಆನಿದ ಎನ್ನ ಬಾಲೆ ಮನಸುದ ಒರುಕಾ  ಆ ಪದ ಎಂಕ್  ಮನಸ್ ಡ್  ದಿಂಜಿದ್  ಪೋಂಡು !
ಆನಿಡಿಂಚಿ ದಿನಾಲಾ  ದೇಜಪ್ಪಣ್ಣನ  ಬೆರಿ ಪತುದು  ಅವ್ವೆ ಪದ ಪನ್ಪಾಯ , ಅರೇನೊಟ್ಟುಗು ಸೇರ್ದ್ ಮಾತಾ ಜೋಕುಲುಲಾ ಅಂಚಿಗ್ ಇಂಚಿಗ್ ಕಂಟೆಲ್  ಆಡೊಂದು  ರಾಗ ಒಯ್ತಾ . ಎಂಕ್  ಗೊತ್ತಾವಂದಿಲಕ್ಕನೆ  ಯಾನ್ ಆ ಪದತುಲಾಯಿ  ಒಂತೊಂತೆನೆ  ಕರವರೆ  ಸುರುವಾಯೆ !.  

''ಉಂದು  ವಾ ಸಿನಿಮಾದ ಪದ  ದೇಜಪ್ಪಣ್ಣ?'' ಪದ ಮುಗಿ ಬೊಕ್ಕ ಒಂಜಿ ದಿನ ಯಾನ್ ಕೇಂದೇ   ಬುಡಿಯೆ !

ದೇಜಪ್ಪಣ್ಣಗ್ಲಾ  ಈ ಪದತೊಟ್ಟುಗು  ಒಂಜಿ ಮದಪಂದಿ  ನೆಂಪು ಇತ್ತುಂಡುಗೆ ....

 ''ಯಾನ್ ಅಪಗ ಕಮಲನ್ ಮದಿಮೆ ಆಯಿನ ಸುರಂಬೆ ಸಂಕರ  . ತುಳು ಸಿನಿಮೋಲು ಅಪಗ ಬರೊಂದಿತ್ತಿನೆ ಅಪರೂಪ   . ಆಪೋರ್ತುಡು 1978 ಒಕ್ಟೋಬರ್ ತಿಂಗೊಲು ಬತ್ತಿನ *ಸಂಗಮ ಸಾಕ್ಷಿ*   ಸಿನಿಮಾದ ಪದ ಉಂದು ಪಂದ್ ಪನ್ನಗ  ದೇಜಪ್ಪಣ್ಣನ  ಕಣ್ಣರುಟ್  ರಡ್ಡ್ ಪನಿ ನೀರ್ ಜಾರ್ದ್  ಸುದೆತ್ತ ನೀರಿದೊಟ್ಟುಗು ಸೇರ್ದ್ ಪೋಯಿನ ಎನನ್  ಒರಿಯನ್ ಬುಡ್ದು  ಏರೆಗ್ಲಾ ತೋಜಿದಿಜಾ  ದಾನಿಯೋ  ? .

ಇಲ್ಲಡ್  ಅಪ್ಪೆಡ ದೇಜಪ್ಪಣ್ಣನ  ಕಣ  ನೀರ್ದ  ವಿಸಯ ಪನ್ನಗ
''ಕಣ  ನೀರ್ ಬರಂದೆ ಬೊಕ್ಕದಾನೇ ?  ಅಲೆನೊಟ್ಟುಗು ಆಯೆ ಅವು ಒಂಜೇ ಸಿನಿಮಾ ತೂತಿನಿ . ಅವ್ವೆ ಸುರುತ, ಅವ್ವೆ ಕಡೆತ ,  ಸುರುತ ಬಂಜಿಡೆ ಪೆದ್ದುದ್  ಬಾಲೆನ್ ಆಯನ ಕೈಕ್  ಕೊರ್ದು ಆಲ್ ಸೈತಿನತ?.
ಅಪ್ಪೆ ಕಣ  ನೀರ್ದ ಕತೆನ್  ದೊರಿತೆರ್ .

ಆನಿಡ್  ಬೊಕ್ಕ ಯಾನ್ ಯಾಪಲಾ  ದೇಜಪ್ಪಣ್ಣಡ  ಆ ಪದ ಪನ್ಲೆ ಪಂದ್ ನಟ್ಟರೆಗ್  ಪೋಯಿಜಿ.  ಪೋಯೀಜತ್  ಯೆನಡ  ಕೇನರೆ ಆಯಿಜಿ .

 ಕಲ್ತ್ ಮುಗಿದ್ ಬೇಲೆ  ತಿಕುದು ಬೊಂಬಾಯಿಗ್  ಬತ್ತಿ ಬೊಕ್ಕಲಾ  ಅಪಗಪಗ  ಜೋಕುಲು ಶಾಲೆಗ್ ಪೋದು ಬರ್ಪಿನ ತಾದಿಡ್ ತಿಕಿಯೆರ್ಡ್ ಆ ಪದ, ವಾಡ ಮಾದಾವುನ  ದೇಜಪ್ಪಣ್ಣೆ ಕಣ್ಣೆದುರು ಬತ್ತುದ್ ಉಂತೊಂದಿತ್ತೆರ್ ...ಇತ್ತೇ ಎಂಚ ಉಲ್ಲೇರಾ  ದೇಜಪ್ಪಣ್ಣೆ ?!


ಈ ಸಲ ಊರುಗು ಪೋಯಿನಾಯೆ ದೇಜಪ್ಪಣ್ಣನ್  ತೂದು ಬರ್ಕ ಪಂದ್ ಅರೆನ  ಇಲ್ಲದಂಚಿ ಕಾರ್ ಪಾಡಿಯೆ.
 ದೇಜಪ್ಪಣ್ಣನ  ಕಂತಿದಿನ ಕಣ್ಣ ದ್ರಿಷ್ಟಿಡೆ  ಮೇರ್ ನನ ಪಾಕ ಸಮಯ ಒರಿಯಾಯೆರ್  ಪನ್ಪಿನ  ಗೊತ್ತಾವಂದಿತ್ತುಂಡ್.

''ದೇಜಪ್ಪಣ್ಣ ಎಂಚ ಉಲ್ಲರ್ , ದಾನಿ ಈತ್  ಬಚ್ಹಿದರ್ ? ಮರ್ದ್ ಮಲ್ಪುಲೆ  ಹುಷಾರಾಪರ್ ! ಇರ್ನ ಋಣ ಎಂಕ್  ತೀರೆಯೆರಾವಂದಿನ, ಈರ್  ಶನಿವಾರ ಶನಿವಾರ  ಎಂಕ್  ನೀ೦ದೆರೆ  ಕಲ್ಪದುಜರ್ಡ ಯಾನ್ ಯಾಪನೇ  ತುದೆತ  ಬೊಳ್ಳದ ನೀರುಡ್ ಕಂತ್ ದ್  ಪೋತುವೆನ ದಾನ್ಯ ?    '' ಪಂಡುದ್ 5000 ಅರೆನ  ಕೈಕ್ ದೀಯನಗ  ಅರೆನ ಕಣ್ಣ ನಿಲಿಕೆ  ನೀರ್.

''ಶಂಕರಾ ಯಾನ್ ಇನಿ ಮುಟ್ಟ  ಎರೆಡಲಾ ಕಾಸ್ ಗ್  ಕೈ ನೀಟಿನಾಯೆ ಅತ್ತ್ ಮಗಾ ,  ನಿನನ್ ಶಾಲೆಗ್ ಲೆತೊಂದು ಪೋತೆಡ  ಐಕ್  ಕಾಸ್ ದೆತೊಂದೆ  . ಧರ್ಮೊಗತ್ತ್  ! ಐಕ್ಕಾತ್ರ ಇತ್ತೇ ಈ ದಾಲಾ ಕಾಸ್ ಕೊರೊಡುಂದು  ಇಜ್ಜಿ.''
ದೇಜಪ್ಪಣ್ಣಗ್ ತೆಮ್ಮದ ಬರಸುಡ್  ದುಂಬು ಪಾತೆರ್ರೆ ಆಯಿಜಿ .


ಅರೆನ ನೆನಪುಗಾಂಡಲಾ  ಈ ಸಲ ಸಂಗಮ ಸಾಕ್ಷಿದ ಆ ಪದತ  ಕ್ಯಾಸೆಟ್ ದೆತೊನೊಡೆ

ಕ್ಯಾಸೆಟ್ ಅಂಗಡಿದ ಪಟ್ಟಾಭಿಡ  ನೆನಪುಡು ಕೇಂಡೆ

''ಸಂಗಮ ಸಾಕ್ಷಿ ತುಳು ಸಿನಿಮಾದ ಪದ  ತಿಕ್ಕುವಾ ?''

''ಅವು ಓಲು  ತಿಕ್ಕುಂಡುಯೆ  ಅವು ಮಾತಾ ಪರಾತ್ ಪಟ್ಟ್ ಕಟುದು ಪೋತುಂಡು . ದುಂಬುದ ಗ್ರಾಮೊಫೋನುದ  ಪದಕುಲು . ತಿಕುಂಡಲಾ ಆತ್  ಸರಿ ಕೇಣುಲಕ್ಕ ಉಪ್ಪುಜಿ . ನಮ ಬೆಳ್ತಂಗಡಿದ ವಸಂತ ಬಂಗೇರೆ  ಮಲ್ತಿನತಾ ಆ  ಸಿನಿಮಾ .ಕನ್ನಡದ ಸುಂದರ್ ಕೃಷ್ಣ ಅರಸ್  ಡೈರೆಕ್ಟ್ ಮಲ್ದಿನ . ಎಂಕ್  ಸರಿ ಗೊತ್ತುಂಡು  ಅವು ಅಮೃತ ಸೋಮೇಶ್ವರ್ ಬರೆತಿನ ಪದ ,ಎಸ್ .ಪಿ  ಬಾಲಸುಬ್ರಮಣ್ಯಂ ಪಂತಿನತೆ . ಮ್ಯೂಸಿಕ್ ಕೊರ್ತಿನಿ ನಮ್ಮ ದಯಾನಂದ ಗರೋಡಿ . ಆ ಪಿಚ್ಚರ್ ಅಪಗ ಕುಡ್ಲಡ್ ರಡ್ಡ್ ವಾರ ಬಲ್ದುಂಡು  ತೋಜುಂಡು . ರಡ್ಡ್ ದಿನ ಕೊರ್ಲೆ  ನಮ್ಮ ಒಂಜಿ ಜನಟ  ಐತ ಒಂಜಿ ರೆಕಾರ್ಡ್ ಪ್ಲೇಟ್ ಉಪ್ಪೊಡು.ಇತ್ತುಂಡ ಈರೆನ ಭಾಗ್ಯ . ದೆತ್ತ್    ದೀಪೆ.''
ಒಂಜೇ ದಂಬುಗು ಸಿನಿಮಾದ ಮಾತಾ ಚರಿತ್ರೆ ಬಗಿಲಿಯೆರ್  ಪಟ್ಟಾಭಿ !

 ಪಟ್ಟಾಭಿ ಪಂಡಿಲೆಕ್ಕನೆ ರಡ್ಡ್ ದಿನೊಟು ಸಂಗಮ ಸಾಕ್ಷಿದ  ಉಪ್ಪಿ ನೀರ್ ಎನ್ನ  ಅಂಗೈಟ್  ಇತ್ತುಂಡು ! ಬೊಂಬಾಯಿಗ್ ಪಿರ ಬತ್ತಿ ಬೊಕ್ಕ  ಏತ್  ಸಲ ಕೇಂದಿಪ್ಪು !. ಕೇನಿನಾತ್  ಸಲ ದೇಜಪ್ಪಣ್ಣನ ವಾಡ  ಮಾದುನ   ಶಬ್ದ ಮನಸ್ದ ಉಲಾಯಿ ತೆಲಿ  ನೀರ್ದ  ಒಸರ್ ಊಜಾವೊಂದಿತ್ತುಂಡ್ !



 ತಡೆವೆರಾವಂದೆ ಬೈಯ್ಯಗ್ ಕುಡೊರ  ಅಪ್ಪೆಗ್ ಫೋನು ಮಲ್ತು ಕೇಂಡೆ

''ಅಮ್ಮಾ ದೇಜಪ್ಪಣ್ಣನ ಸಾವುದ  ಬೇಲೆ  ಮಾತಾ ಮುಗಿಂಡಾ?.''
''ಆಂಡ್ ಮಗಾ .. ನನ  ಈ ರಾತ್ರೆ ಇಡೀ ಅರೆನನೇ ಕನ  ಕಟ್ಟಡ ! ಬೇಗ ವನಸ್ ಮಲ್ತ್  ಜೆಪ್ಪು !!''

 ವನಸ್ ಸೇರ್ಜಿ, ಜೆಪ್ಪೆರೆ ನಿದ್ರೆ ಬರೊಡೆ ?
 ರಾತ್ರೆದ  ಬಾನೊಡು ತಿಂಗೊಲ್ದ ಬೊಲ್ಪುನು ತೂವೊಂದು ಕುಡೋರ ಕೇಂಡೆ

*ಉಪ್ಪಿ ನೀರ್ ಆಂಚಿಗ್ ಸುದೆತ  ಚಪ್ಪೆ ನೀರ್ ಇಂಚಿಗ್ .....ಅರುವೆದ ಆ ಕೊಡಿ ತೂನಗ .ಭೇದೋನೇ  ಮಾಜಿದ್ ಪೋಯಿಜಾ ?*

 
ಎಲ್ಯಪ್ಪುಡು  ದಿನಾ ಶಾಲೆದ - ನಾಲಕ್ಷರದ  ಸಾದಿ ತೋಜಾಯಿನ ದೇಜಪ್ಪಣ್ಣ , ಭೂಮಿಡ್   ಈರೆಂಕ್   ಸೂರ್ಯೆ ಚಂದ್ರೆರಲಕ್ಕ ಬೊಲ್ಪು ಸಂಪತ್ತ್ ! ಎನ್ನ ಉಡಲ್ದುಲಾಯಿ ಪರಪುನ ಏತೋ ಕನೊಕುಲೆನ್  ಜಲ್ಲ  ಪಾಡ್ದು  ಕಡಲ್ಗ್  ಸೇರಾಯಿನಾರ್, ದಿನಾ ಈ ಪದ ನನ ಕೇನುವೆ , ಅರುವೆದ ಆ ಬಾಕಿಲ್ಡ್  ಈ ಪದ ತೊಟ್ಟುಗು  ಈರ್   ಎನ್ನ ಮನಸುದ  ತುದೆಟ್ ಸಿರೆ ನೀರ್ ಉರ್ಕಾವೊಂದು ವೋಡ  ಒಚ್ಹೊಂದು , ಮಾದಾವೊಂದು ಮದಪಂದಿ  ನೆ೦ಪಾದ್ ಉಪ್ಪುವರ್ ,
ಈ ಜೂವೊಡು ದೊಕ್ಕೆ ಉಪ್ಪ  ಮುಟ್ಟ !!.

 ವಾಡ  ಒಚ್ಚುನ ದೇಜಪ್ಪಣ್ಣನ್ ನೆನೆತ್ತೊಂದು ಸಾಲೆದ ಚೀಲವುನು  ಪುಗ್ಗೆಲ್ಗ್ ಪಾಡೊಂದು ಆಯೆರೆ  ಸಾಲೆ  ಈ ಕಲ್ಪರೆ ಪೋಪಿನ  ಬಾಲೆ  ಮನಸ್ ಡೊರ   ಈ ಪದೊನೊರ ಕೇನುವರಾ ?



ಶಾಂತಾರಾಮ್ ಶೆಟ್ಟಿ