ತುಳು ರಾಜ್ಯ ಅಧೀಕೃತ ಬಾಷೆಗ್ ಅಡ್ದಿಯಾದುಪ್ಪುನು ರಾಜಕೀಯ ಇಚ್ಛಾ ಶಕ್ತಿದ ಕೊರತೆ ಮಾತ್ರ

ತುಳು ರಾಜ್ಯ ಅಧೀಕೃತ ಬಾಷೆಗ್ ಅಡ್ದಿಯಾದುಪ್ಪುನು ರಾಜಕೀಯ ಇಚ್ಛಾ ಶಕ್ತಿದ ಕೊರತೆ ಮಾತ್ರ
-------------------------------------------------------------------------------------------------

ತುಳು ಬಾಸೆ  ಎಡ್ಮನೇ ಪರಿಚ್ಛೇಧ ಸೇರೊಡು  ಪನ್ಪಿನ  ತುಳುವೆರೆನ ಬಾರಿ ಸಮಯದ ಅಂಗಲಾಪು. ಅವು ರಾಜ್ಯದ ಅಧೀಕೃತ ಬಾಸೆ ಆವೊಡು ಪನ್ಪಿನ   ಇಂಚಪ್ಪ ತೋಜಿದ್ ಬತ್ತಿನ ಪೊಸ ನಡಕೆ .   ರಾಜ್ಯದ ಬಾಸೆ  ಆಂಡ  ಕೇಂದ್ರ ಸರಕಾರದ ಗಮನೊಗು  ಕನಯೆರೆ ಸುಲಭಗೆ ಪಂಡ್ದ್  ತೆರಿಯೊನಿನ  ತುಳುವೆರ್  ಅಯಿಕಾತ್ರ ಇಂಚಪ್ಪ ಬಾರಿ ಪೊನೆಯೊಂದುಲ್ಲೆರ್  . ಈ ಸಲ ಜನೊಕುಲೆಡ್ ಗೆಂದುದು ಬತ್ತಿನ ಶಾಸಕೆರ್ಲಾ  ದುಂಬುಡ್ಡು  ಜಾಸ್ತಿ ಮನಸ್ ಕೊರ್ದು ಬೆಂದಿನವುಲಾ  ಒಂಜಿ ರೀತಿಡ್ ಸತ್ಯದ ಪಾತೆರ .  ಮುಖ್ಯ ಮಂತ್ರಿಲಾಯಿನ ಬಿ ಎಸ್ ಯೆಡಿಯೂರಪ್ಪ ಮೇರ್   2009  ಉಜಿರೆಡ್ ನಡತ್ತಿನ  ನಮ್ಮ ಪೆರ್ಮೆದ ಡಾ. ವೀರೇಂದ್ರ ಹೆಗ್ಗಡೆರ್ನ  ಕನತ  ತುಳು ವಿಶ್ವ ಸಮ್ಮೇಲನೊಡು  ತುಳುನು ರಾಜ್ಯದ ಅಧಿಕೃತ ಬಾಸೆ ಮಲ್ಪುವೆ  ಪಂಡುದ್ ಕೊರ್ತಿನ ಭರವಸೆ  ಈ ಸಲ ಫಲ ಕೊರು ಪಂಡುದೇ  ಮಾತಾ ತುಳುವೆರ್ ಎನ್ನಿದಿತ್ತೆರ್ .  ಈತೇ ಅತ್ತಾವೆಂದೇ  ಸಂಸ್ಕೃತಿ ಸಚಿವೆರಾಯಿನ ಸಿ ಟಿ ರವಿ ಮೆರೆಗ್ಲಾ ತುಳು ಜನೊಕುಲೆನ ಮಿತ್ತಿತ್ತಿ  ಅಭಿಮಾನಲ  ಈ ನಂಬಿಕೆಗೆ ಬಲ ಕೊರ್ದಿತ್ತುಂಡ್ . ಆಂಡ ಮೊರಾನಿ ನಡತಿನ  ಅಧಿವೇಶನೊಡು  ವೇದವ್ಯಾಸ ಕಾಮತೆರ್ ಕೇನಿನ ಪ್ರಶ್ನೆಗ್  ಸರಿಯಾತಿನ ಅವಕಾಶಲ ತಿಕಿಜಿ , ಸರಿಯಾಯಿನ ಉತ್ತರಲ ತಿಕಿಜಿ . ಸಭಾಧ್ಯಕ್ಷೆರೆಗ್  ಉಂದು  ಒಂಜಿ ರಾಜ್ಯದ ಬಾಸೆದ  ಪುಟ್ಟು ಸಾವುದ ಪ್ರಶ್ನೆ  ಪನ್ಪಿನ  ವಿಷಯಾನೇ ತೆರಿಯಂದಿಲಕ್ಕ ಪಾತೆರೊಂದಿತ್ತೆರ್ .  ಅವೆನ್ ಬುಡ್ಪಾದ್   ಪನರೆ ಪಿದಾಡಿನ  ರಘುಪತಿ ಭಟ್ರೆಗ್ಲಾ  ಅವಕಾಶ ತಿಕಿಜಿ ಪನ್ಪಿನ  ಬೇಜಾರ್ ಸಂಗತಿ.

ವೇದವ್ಯಾಸ ಕಾಮತೆರ್  ತುಳು ಬಾಸೆನ್ ಎಡ್ಮನೇ ಪರಿಚ್ಚೇದೊಗು ಸೇರಾಯರೇ ಅಡ್ಡಿ ದಾದ ಉಂಡು?,  ರಾಜ್ಯದ   ಅಧೀಕೃತ ಬಾಸೆ  ಆಂಡ ಮಾತ್ರ  ಎಡ್ಮನೇ ಪರಿಚ್ಚೇದೊಗು ಸೇರುನಾಂಡ  ತುಳು  ರಾಜ್ಯದ ಅಧೀಕೃತ ಬಾಶೆ ಆದ್  ಉಂಡಾ ? ಇಜ್ಜಿಡ ತುಳು ಬಾಸೆನ್ ರಾಜ್ಯದ  ಅಧೀಕೃತ ಬಾಸೆಯಾದ್ ಘೋಷಣೆ ಮಲ್ಪರೆ   ಜನೊಕುಲೆನ ಒತ್ತಾಯ ಉಂಡು, ರಾಜ್ಯದ ಬಾಸೆ  ಆದ್ ಅಂಗೀಕಾರ ಮಲ್ಪುಲೆ ಪಂಡುದ್ ಕೇನಿನೈಕ್  ಸಂಸ್ಕೃತಿ ಮಂತ್ರಿ  ಸಿ.  ಟಿ.  ರವಿ   ಕೇಂದ್ರ ಸರ್ಕಾರೊಗು  ಇದ ಮುಟ್ಟ 7- 8 ಸಲ ಕಾಗದ ಬರೆತ,  ಸೀತಾ ಕಾಂತ  ಮಹಾಪಾತ್ರ  ವರದಿ ಆಧರಿಸದ್  ಅಂತರಸಚಿವಾಲಯ  ಶಿಫಾರಸ್ ಮಲ್ತಿಲಕ್ಕ  ಕೇಂದ್ರ ಸರ್ಕಾರ  ಕ್ರಮ ದೆತೊನುಂಡು ಪಂಡೆರ್ . ಅರೇನಾ ಲೆಕ್ಕೊಡು  ತುಳು ಬಾಸೆ  ಎಡ್ಮನೇ ಪರಿಚ್ಚೇದೊಗು ಸೇರುನ ಬಾಸೆಲೆಡ್  ಮುಪ್ಪತ್ತ ಎಡ್ಮನೇ ಜಾಗೆಡ್ ಉಂಡುಗೆ  , ಒರಾ ಎಡ್ಮನೇ ಪರಿಚ್ಚೇದೊಗು ಸೇರಿನಾಂಡ  ಬೊಕ್ಕ ಅವು ತನ್ನಾತೆಗೆ ರಾಜ್ಯ ಬಾಶೆ ಆಪುಂಡುಗೆ  .

ಮಂತ್ರಿಲು ಕೊರಿನ   ಈ  ಉತ್ತರ  ಈ ರಾಜ್ಯದ ತುಳುವಗ್ ಸಮಾಧಾನ ಕೊರ್ಪುನಂಚಿನ ಅತ್ತ್ !.
ಉಂದು  ಪುಗೆಲ್ಡ್ ಇತ್ತಿನ ಪುದೆ  ಜಾವಾವುನ  ಪಾತೆರಾ. ರಾಜ್ಯದ  ಮಲ್ಲ ಸಾಂಸ್ಕೃತಿಕ ಸಂಪತ್ತುದ ಬಾಸೆನ್ ಒರಿಪಾವುನ  ರಾಜಕೀಯ ಇಚ್ಛಾ ಶಕ್ತಿ ಬೋಡು. ತುಳುನು ರಾಜ್ಯ ಬಾಸೆ  ಮಲ್ಪೆರೆ  ಬೋಡಾಯಿನಾತ್ ಕಾರಣ ಅಂಚನೆ  ಅವಕಾಶ  ರಡ್ಡಲಾ ಉಂಡು . 
ಮಂತ್ರಿಲು ಮೂಲು ಪಂಡಿನ ಈ ಕೆಲವು ವಿಚಾರೊಲೆನ್ ನಮ ಗಮನೋಗು ದೆತೊನೊಡು

1).  ತುಳು ಎಡ್ಮನೇ ಪರಿಚ್ಛೇದ ಸೇರುನ ಬೊಕ್ಕ ಕರ್ನಾಟಕದ   ಅಧೀಕೃತ ರಾಜ್ಯ ಬಾಸೆ ಆಪಿನ  ಉಂದು  ರಡ್ಡ್ ಬೇತೆ  ಬೇತೆ ವಿಚಾರೊಲು .
ರಾಜ್ಯದ ಅಧೀಕೃತ ಬಾಸೆಯಾದ್  ಒವ್ವೆ ರಾಜ್ಯ ಬಾಸೆನ್ ಘೋಷಣೆ ಮಲ್ಪುನ ಹಕ್ಕ್ ರಾಜ್ಯ ಸರ್ಕಾರದ ಪಂಡ್ದ್ ( state legislature )  ಸಂವಿಧಾನದ  ಅಧಿನಿಯಮ 345 ಪನ್ಪು೦ಡು. ಅಂಚಾದ್ ರಾಜ್ಯದ ಬಾಸೆ ಆದ್  ತುಳುನು ಘೋಷಣೆ ಮಲ್ಪುನೈಕ್  ರಾಜ್ಯ ಸರ್ಕಾರೊಗು ಒವ್ವೆ ರೀತಿದ ಅಡೆ ತಡೆ ಇಜ್ಜಿ . ಇಚ್ಛಾಶಕ್ತಿ, ಆಸಕ್ತಿ  ಇತ್ತುಂಡ ಯಾವು.

2). ಸಚಿವೆರ್ ಪನ್ಪರ್  ತುಳು ಎಡ್ಮನೇ ಪರಿಚ್ಚೇದೊಗು ಸೇರುನೈಟ್   ಮುಪ್ಪತ್ತ ಎಡ್ಮನೇ ಜಾಗೆಡ್ ಉಂಡು , ಅರೇನ ಪಾತೆರ ಪ್ರಕಾರ  ಈ  37 ಬಾಸೆಲು ಸೇರಿ ಬೊಕ್ಕ ತುಳುಕು ಅವಕಾಶ  ತಿಕ್ಕುನು ಪನ್ಪಿಲಕ್ಕ  ಉಂಡು . ಆಂಡ ನಮಕ್ ಇಂಟರ್ನೆಟ್ ಡ್ ತಿಕ್ಕುನ  ಪಟ್ಟಿ ಇಂಗ್ಲಿಷ್ ಅಕ್ಷರದ(Alphabetical) ಪ್ರಕಾರದ ಪಟ್ಟಿ . ಆಯಿನೈಟ್  ತುಳು  ಆ ಜಾಗೆಡ್ ಉಪ್ಪುನು , ಬಾಸೆದ  ಜನಸಂಖ್ಯೆ , ಸಾಹಿತ್ಯ , ಜಾನಪದ ಸಂಪತ್ತು ,ಪ್ರಾದೇಶಿಕತೆ  ಉಂದೆನ್ ಮಾತಾ ಲೆಕ್ಕ ಪಾಡೊಂದು  ಪರಿಚ್ಚೇದೊಗು ಸೇರಾವುನು . ಸಾಲ್ ಸರತಿಡ್  ಉಂತುದು ಸೇರುನತ್ತ್ .
3). ಬಾಸೆನ್ ಆಯಾಯ ರಾಜ್ಯದಕುಲು ಅಧೀಕೃತ ಮಲ್ತೆರ್ಡ  ಆ ಬಾಸೆದ  ಸಾಂಸ್ಕೃತಿಕ ಸಂಪತ್ತು ( cultural heritage ) ಒರಿಯುಂಡು ಪನ್ಪಿನ ಕಾರಣೊಗು ರಾಜ್ಯ ಬಾಶೆ  ಮಲ್ಪುನು .  ಸಿಕ್ಕಿಂ  ಪತ್ತೊಂಜಿ  ಬಾಸೆಲೆನ್ , ಪಶ್ಚಿಮ ಬಂಗಾಳ  ಪತ್ತ್ ಬಾಸೆಲೆನ್ ರಾಜ್ಯದ ಅಧೀಕೃತ ಬಾಸೆ  ಮಲ್ಪನಗ  ಉಂದೇ  ಕಾರಣ  ದುಂಬು ದೀತೆರ್ . ಸಿಕ್ಕಿಂ ಬೊಕ್ಕ ಬಂಗಾಳ  ರಾಜ್ಯದ ಹೆಚ್ಚಿನ ಬಾಸೆಲು  ಆದಿವಾಸಿ ಬೊಕ್ಕ ಬುಡಕಟ್ಟು ಜನೊಕುಲೆನ  ಭಾಷಾ ಸಂಪತ್ತು ಬೊಕ್ಕ ಜಾನಪದ ಸಂಪತ್ತು ಒರಿಯೆರೆಗೋಸ್ಕರ  ಅವೆನ್ ರಾಜ್ಯದ ಬಾಸೆ  ಆದ್  ಮಲ್ಟಿನಿಂದ್  ಕಾರಣ ಕೊರ್ಪೆರ್ . ಆ ದೃಸ್ಟಿಡ್  ತುಳು ಸಂಸ್ಕೃತಿ ಸಂಪತ್ತು ಒರಿಯೊಡಾಂಡ ಅಧೀಕೃತ ಬಾಸೆ  ಆಪಿನ ಅಗತ್ಯ ತೋಜಿದ್ ಬರ್ಪುಂಡು. 
4) ಸಚಿವೆರ್  ಪನ್ಪಿಲೆಕ್ಕ  ಎಡ್ಮನೇ ಪರಿಚ್ಚೇದೊಗು ಸೇರಿನ ಬಾಸೆಲು ಮಾತ್ರ ಅಧೀಕೃತ ರಾಜ್ಯ ಬಾಸೆ  ಆಪಿನಿ ಅತ್ತ್ .
ಪಶ್ಚಿಮ ಬಂಗಾಲದ ಕಂಟಪೂರೀ , ರಾಜ್ ಭನ್ಸಿ , ಕುರ್ಮಾಲಿ , ಸಿಕ್ಕಿಂ ರಾಜ್ಯದ ಲೆಪ್ಚಾ, ಲಿಂಬು  ಅಂಚನೆ  ಪಾಂಡಿಚೆರಿದ  ಅಧೀಕೃತ ಬಾಸೆ  ಫ್ರೆಂಚ್  ಉಂದು  ಒವ್ವುಲಾ  ಎಡ್ಮನೇ ಪರಿಚ್ಚೇದೊಗು ಸೇರ್ದಿನ ಬಾಸೆಲು ಅತ್ತ್ . ಅಂಚಾದ್ ತುಳು ರಾಜ್ಯ ಬಾಸೆ  ಆವೊಡಾಂಡ  ಸುರುಕ್ಕು ಎಡ್ಮನೇ ಪರಿಚ್ಚೇದೊಗು ಸೇರೊಡುಂದು ದಾಲ ಇಜ್ಜಿ. 
5) ಸಚಿವೆರ್ ಕೇಂದ್ರ ಸರಕಾರೊಗು 7-8 ಕಾಗದ ಬರೆತ  ಪನೊಂದುಲ್ಲೆರ್ . ಅಂಚಾಂಡ ಆ ಕಾಗದೊಗು ದಾದಾ ಉತ್ತರ ಬೈದುಂಡ್ ?. ಎಂಚಿನ ಕಾರಣೊಗೋಸ್ಕರ  ಇನಿಮುಟ್ಟ  ತುಳು ಸೇರಂದೆ  ಒರಿಂಡ್ ? , ಬೇತೆ  ವಾ ರೀತಿದ ಪ್ರಯತ್ನ ಮಲ್ಟಿನಾಂಡ  ಸೇರೆರೆ  ಸಾಧ್ಯ ಉಂಡು ? ಪನ್ಪಿನವೇನ್ ಈ ರಾಜ್ಯದ  ತುಳುವೆರೆಗ್ ತೆರಿಪಾವುನ ಜವಾಬ್ದಾರಿ  ಮಂತ್ರಿಲೆಗ್ ಉಂಡು .  ಶಾಸಕೆರ್ಲಾ ಈ ವಿಚಾರೊಲೆನ್ ಸರಕಾರೊಡ್ದು ತೆರಿಯೊಂದು  ಆ ತಾದಿಡ್ ಬೆಲೆ ಮಲ್ಪುಲೆಕ್ಕ ಆವೊಡು . ಬಜೀ ಮೊರಂಪುಗು ಬೆಲ್ಲ ನಕ್ಕಾವೊಂದು ಎಂಕುಲು ಕಾಗದ ಬರೆತ ಪಂಡುದ್ ಪುಗೆಲ್ದ ಪುದೆ ಜಾರಾಯೆರೆ ತೂಂಡಾ ಆವಂದ್. 

 ನಮ್ಮ ತುಳುನಾಡುದ   ಮಾತಾ ಶಾಸಕೆರ್  ಈ ದಿಸೆಟ್  ಸಂಸ್ಕೃತಿ ಮಂತ್ರಿಲೆಡ , ಮುಖ್ಯ ಮಂತ್ರಿಲೆಡ  ಖುದ್ದು ಕುಲ್ಲುದು  ಪಾತೆರ್ದ್  ಅರೆಗ್ ಮನಸ್ಸುಗ್ ತೆರಿಯುಲಕ್ಕ ಪಂಡೆರ್ಡ  ತುಳು  ಅಧೀಕೃತ ರಾಜ್ಯ ಬಾಸೆ  ಆಪಿನ ಮಲ್ಲ ವಿಷಯ ಅತ್ತ್ .  ಬೆರಿ ಪತ್ತುದು  ಈ ಬೇಲೆ  ಮಲ್ತು ಕೊರ್ಪಿನ  ಜವಾಬ್ಧಾರಿ ನಮ್ಮ ನಂಬಿಕೆ  ದೀದ್  ಓಟು ಪಾಡಿನ  ಜನ ಪ್ರತಿನಿಧಿಕ್ಲೆ  ಉಡಲ್ಗ್  ಪೊಗ್ಗೊಡು. 

=====================================================