manjanna paardana
ಅಗೋಳಿ ಮಂಜಣ್ಣ ಪಾರ್ದನ:
ಕಡಲ ಕರೆಟುಪ್ಪು ನಮ್ಮ ಈ ತುಳುನಾಡ ಗತ್ತ್ ನ್ ತೂವೊಡು
ಗುತ್ತು ಬರ್ಕೆಡ್ ಬಂಟೆರ್ .... ಬಾರಗೆರೆ ಕತೆನ್ ಕೇನೊಡು !
ಮುಲ್ಕಿ ಸೀಮೆಗ್ ಮುಟ್ಟೋಡುಪ್ಪುನ ಹಳ್ಳಿ ಊರವು ತೇಲಾರ್
ಊರುದ ಗುತ್ತುಡ್ ಇತ್ತೆರ್ ಬಗ್ಗಣ್ಣ ಅಡ್ಯಂತಾಯೆರ್ !
ಒಪ್ಪ ಪುಟ್ಟಿನ ತಂಗಡ್ಯಾಲ್ ಒರ್ತೆ ಪೊಣ್ಣುಗೆ ದುಗ್ಗ ಮ್ಮ
ಅಪ್ಪೆ ಸೈತಿನ ಎಲ್ಯ ಪೊಣ್ಣನ್ ತಾನೇ ಸಾಂಕ್ದೆರ್ ಬಗ್ಗಣ್ಣೆ!
ಶಾಂತಾರಾಮ್ ವಿವರಣೆ :
ವಿವರಣೆ :ಚೇಳಾರು ಗುತ್ತುದ ಬಗ್ಗಣ್ಣ ಅಡ್ಯಂತಾಯೆರೆಗ್ ಒರ್ತೆ ತಂಗಡಿ ದುಗ್ಗೆ . ಅಪ್ಪೆ ಸೈಯ್ಯನಗ ದುಗ್ಗೆಗ್ ನಾಲ್ ವರ್ಷ ಪಾರ್ಯ ಅವೆದ್ದು ರಡ್ಡ್ ವರ್ಷ ಕರೀದ್ ಅಮ್ಮೆರ್ಲಾ ತೀರುವೆರ್ . ಅಂಚ ದುಗ್ಗೆನ್ ಬಗ್ಗಣ್ಣ ಅಡ್ಯಂತಾಯೆರ್ ಮೋಕೆಡ್ ಸಾಂಕುದ್ ಪ್ರಾಯ ಪದ್ನಾಜಿ ಆವನಗ ಕಟ್ಲಾ ಬರಿತ ಬಾಲಿಕೆದ(ಬರ್ಕೆ) ಇಲ್ಲದ ನಾರಾಯಣ ಶೆಟ್ರೆಗ್ ಮದಿಮೆ ಮಲ್ತ್ ಕೊರ್ಪೆರ್.
ಬಾಲಿಕೆದ ಇಲ್ಲ್ ಗುತ್ತುದಿಲ್ಲದ್ದು ಗತ್ತುಗೊಂತೇ ಕಮ್ಮಿ ಯಾಂಡಲಾ ದುಗ್ಗು ಅಲ್ಪ ಸುಕೋಟುಪ್ಪುವೊಲು . ಪ್ರಾಯ ಇರ್ವ ಕರಿಂಡಲಾ ದುಗ್ಗೆಗ್ ಜೋಕುಲಾಪುಜಿ . ಅಪಗ ಬಪ್ಪನಾಡುದ ದೇವಿಗ್ ಬೊಲ್ಲಿದ ತೊಟ್ಟಿಲ್ಡ್ ಬಂಗಾರ್ದ ಬಾಳೆ ಒಪ್ಪವೇ ಪಂಡಿನ ದುಗ್ಗೆನಾ ಪರಕೆದ ಒರಟು ಮಂಜಣ್ಣೆ ಪುಟ್ಟುವೆ .
ಜವನೆ ಮಂಜಣ್ಣಗ್ ಬರವು ಮಂಡೆಗ್ ಪತ್ತುಜಿ , ಮಲ್ಲ ಜೂವ ಓರೋಕು ಎಡ್ಮ ಜನ ಜವನೆರೆನ ವನಸ್ ಒರಿಯೇ ತಿನೊಂದಿತ್ತೆ ಗೆ . ಆಂಡಲಾ ಆಯನ ಬಂಜಿದ ಬಡವು ಅಸರ್ ತೀರೊಂದಿತ್ತಿಜಿಗೆ . ಅಪಗಪಗ ಅಪ್ಪೆನ ನೆನಪಾವೊಂದಿತ್ತುಂಡುಗೆ
ಮಾಮಿ ತಮ್ಮಲೆ ಧರ್ಮದಿಲ್ಲಲ್ ಬಾಯ್ಡೆ ಬನ್ನಂಗೆ ತಿಂದೊಂದು
ಬಂಜಿಲಾರ್ ಜಿ, ಬಾಯಿಲಾರ್ ಜಿ, ಅಪ್ಪೆ ದುಗ್ಗೆನ್ ನೆನೆಪೆಗೆ
ಕಾರ್ಲಡಿ ತ್ತಿನ ಬಾಕಿಮಾರವು ಕಂಗಣಾವೊಡು ಪಂತೆಗೆ
ಕೊಡಂಜಡಿತ್ತಿನ ಕಲ್ಲ್ ರಡ್ಡವು ಉಡಾರಿಗ್ಯಾವೊಡು ಪಂತೆಗೆ
ರಾಮ ಸಮುದ್ರದ ನೀರ್ ಪೂರಲ ಪೇರೆ ಆವೊಡು ಪಂತೆಗೆ
ಅಪ್ಪೆ ದುಗ್ಗೆ ಬಳಸೊಡೆಂಕ್ ತಾನ್ ಮಂಜಣ್ಣೆ ಒರಿಯೇ ತಿನೊಡುಗೆ !!
ಶಾಂತಾರಾಮ್ ವಿವರಣೆ :
ಆಯೆ ಮಲ್ಲ ಗಡಾಯಿ ಕಲ್ಲ್ ಪಂಪಿನ ಕೇಂದರ್ . ಬೆಳ್ತಂಗಡಿದಲ್ಪ ಈ ಕಲ್ಲ್ ಇತ್ತೆಲಾ ತೂವೆರೆ ತಿಕ್ಕುಂಡು , ಜವನೆ ಮಂಜಣ್ಣ ನ ಸುದ್ದಿಗೆ ಪೋಯೆರೆ ಪೋಡಿನ ಜವನೆರ್ ಮಂಜಣ್ಣನ ಸದೃಗುಂಟರ್ ಆವಂದೆ ದೂರೊಡೇ ತಾದಿ ತೆಲವೊಂದು ಇತ್ತೆರ್ಗೆ .
ದೂಮಪ್ಪ ಮಾಸ್ಟ್ರು ಜಬವನೇ ಮಂಜಣ್ಣೆ ಎಂಚ ಇತ್ತೇ ಪನ್ಪಿನವೇನ್ ಇಂಚ ಪೊರ್ಲುಡು ಕಟ್ದ್ ಕೊರ್ತೆರ್
ಲೆತ್ತಿನಂದುಡ ಗಾವುದ ಕೇನುಂಡು ತೇಲ್ತಿನಂದುಡ ತೆಡಿಲ್ ಮೊರೆಸುಂಡು
ಬೋಲೆ ಕಣ್ಣೊರ ಮರತಿನಂದುಡ ಬೂತ ಪತ್ದಿನ ಪಿರಿಯುಂಡು !
ಮುಡುಟು ಕುಟುದೇ ಮುನ್ನೂದು ತಾರಯಿ ತಲ್ತ್ ಪಾಡ್ದೆಗೆ ಮಂಜಣ್ಣೆ
ಕೈಟೆ ಗುದ್ದುದು ಕಲೆತ್ತಿ ತಾರಯಿ ಬಿರೆಲ್ ಶೆಡ್ಡಿದ್ ದರ್ಪೆಗೆ !
ಕೊದಂಟಿ ದಾಂತೆನೆ ಕೈಟೆ ಬೊಟುದು ಅರಿತ ಮುಡಿ ಆಯೆ ಕಟ್ವೆಗೆ
ಬಲಿಪ ತಟ್ಟ್ ಡ್ ಪಾದೆನಾನಂಡಲ ಗುದ್ದುದೇ ಪೊಡಿ ಮಲ್ಪೆಗೆ !!
ಕಲ್ಲ್ ಡಾಕ್ ದ್ ಕಡಮೆ ಕೆರ್ತೆಗೆ, ಪಿಲಿಟ ಉರ್ಡುದು ಗುದ್ದುದು ನುರ್ತೆಗೆ
ತಾಡು ಎರ್ಲೆನ್ ಕೊಂಬುಡೇ ಪತುದುಂತ ದೀಪೆಗೆ ಮಂಜಣ್ಣೆ !
ಅಗೋಳಿ ಮಂಜಣ್ಣ ಸದೃಗುಂತುನ ಬಂಟೆರಿಜ್ಜಿಗೆ ಊರುಡು
ತಿಗಲೆ ಗಂಟೆರ್ ದೂರೊಡುಂತುದು ''ಆಯೆ ಗಡಾಯಿ ಕಲ್ಲುಂದ್'' ಲೆಪ್ಪೆರ್ !!
ಶಾಂತಾರಾಮ್ ವಿವರಣೆ :
ಇಂಚಿನ ತಾಕತ್ತುದ ಮಂಜಣಣ್ಣೆ ನಾನಾ ಊರುಗು ಮಾರಿಯಾವರೇ ಬಲ್ಲಿಂದ್ ಬಗ್ಗ ಬಗ್ಗಣ್ಣ ಅಡ್ಯಂತಾಯೆರ್ ಆಯನ್ ಜಗಲೆಡ್ ಕುಲ್ಲಾ ವೊಂದು ಪೊರ್ಲುದ ಧರ್ಮದ ನುಡಿ ಪರಿಪುನು ಪನ್ಪರ್
ಬಡವು ಬಾಜೆಲ್ ತೂಯಿನಾಯಗ್ ಧರ್ಮ ಕಡೆಸಂದೆ ಪೋಪುಜಿ
ದಾನ ಧರ್ಮನೇ ದಾಂತಿ ಇಲ್ಲವು ಏಳಿಗ್ಯಾಪುಜಿ ಮಂಜಣ್ಣ !
ಪತ್ತ್ ಜನೊಕು ಪನ್ಪಿನಾಯೆ ತನನ್ ತಾನೇ ತೆರಿಯೊಡು
ಒಟ್ಟೆ ತಿಪ್ಪಿಡ್ ನೀರ್ ಕನಯೆರೆ ಆಪುಂಡಾ ಪನ್ ಮಂಜಣ್ಣ!
ಪೇರ್ ಪರಂಡಲಾ ಸೈಪುಂಡುಗೆ ನನ ವಿಷೋನು ಪರ್ದು ಬದುಕೊಲ್ಯ
ಮುಂಡೆ ಹಾಕ್ ದ್ ಮಲ್ತಿ ಬದ್ಕವು ದಂಡ ಆಪುಂಡು ಮಂಜಣ್ಣ !
ಪಕ್ಕಿ ತಿಂದ್ ದ್ ಒಕ್ಕೆಲ್ ಪೋವಂದ್ ಮೂ೦ಕುಡುಂಡುದು ಬಂಜಿ ದಿಂಜ೦ದ್
ಊರ್ಯ ಬದ್ಕ್ ಡ್ ಆಸೆ ದೀಯಂದೆ ಸುಕೋಟೆ ಉಪ್ಪೊಡು ಮಂಜಣ್ಣ !
ಸತ್ಯ ಧರ್ಮನೇ ಅಪ್ಪೆ ಅಮ್ಮೆರ್ ಸತ್ಯ ಧರ್ಮನೇ ದೈಯ್ಯ ದೇವೆರ್
ಸತ್ಯ ಧರ್ಮೊನು ದಂಟಿನಾಯಗ್ ದೈವ ಮುನಿಯುಂಡು ಮಂಜಣ್ಣ !!
ಶಾಂತಾರಾಮ್ ವಿವರಣೆ :
ತುಳುನಾಡುದ ಇಂಚಿನ ಪೆರ್ಮೆದ ಜವಾನನ ಕತೆ ನಮ ದುಂಬುದ ಜೋಕುಲೆನ ನೆಂಪುಡ್ಲ್ಯಾತ್ ಉಪ್ಪೊಡು ಪಂಪಿನ ಆಶೆಂ ದೀಯೊಂದು ಕುಡ್ಲಾದ ಆಕಾಶವಾಣಿಡ್ ನಾನೂರ ಈ ಪಾರ್ದನ ಪ್ರಸಾರ ಆಪಿಲಕ್ಕ ಮಲ್ಪೊಡು ಪಂಪಿನ ಒತ್ತಯೋನು ಡಾ. ಸದಾನಂದ ಪೆರ್ಲಾನೆದುರು ದೀಯೊಂದುಲ್ಲ . ಕಷ್ಟಹ ಪೆರ್ಲ ಬಾರಿ ಸೋಕುದ ಕಾರ್ಯಕ್ರಮ ಆಕಾಶವಾಣಿಡ್ ಕೊರೊಂದುಲ್ಲೆರ್ . ಅರೆನ್ ಮುಖಾಂತರ ಈ ಬೇಲೆ ನಮ್ಮ ಸುಧಾಕರ ಶೆಟ್ರೆನ ಸ್ವರೋಟೆ ಆವೊಡು ಪಂಪಿನ ಎಂಕಲನ ಬಯಕೆ
ಬಾರಿ ಜವನ್ಯಗೆ ಮಲ್ಲ ತ್ರಾಣಗೆ ಮಂಜಣೆ ಆನಿದ ಕಾಲೊಡು
ದುಂಬು ಪುಟುದಿಜೆ ನನೊಗು ಪುಟ್ಟಯೆ ಪನ್ಪೆರೀ ತುಳುನಾಡುಡ್ !
ನಾಡ ಬೀರನ ಕತೆನ್ ಕೇನ್೦ಡ ಮನಸ್ ತಕ ತಕ ನಲಿಪುಂಡು
ಅಪ್ಪೆ ಪಾದೋಗು ಪುರ್ಪ ಕಾಣಿಕೆ ಕೊರ್ಪಿ ಮನಸೆಂಕಾಪುಂಡು !
Comments
Post a Comment