ಆಟಿ ಕರಿಯಡ್

ಆಟಿ  ಕರಿಯಡ್ 

ಪಡ್ದಾಯಿದ ಮೈಕೊಕ್ಕೆರುನ 

ಸಿಮ ಸಿಮಾ ಗಾಲಿ

ಪುಲ್ಯಕಾಂಡೆನೆ

ಇರೆನೊಟ್ಟುಗು ಬೆಪ್ಪುಡೆ

ಜೆತ್ತಿತ್ತಿನ ಎನನ್ ದರ್ತ್ ಲಕ್ಕಾಯಿನಿ

ದಾಯೆಗುನ್ಪರ ?

ಕಂಡನಿಲ್ಲ  ಬುಡ್ದು  ಇನಿ ಯಾನ್ 

ಆಟಿ ಕುಲ್ಲುನಿ !

ಮದಿಮೆದ ದಿನ ಕರೀದ್ ತಿಂಗೊಲಾತುಜಿ

ಪಲ್ಲಂಗೊಡು ಕರದಿನ

ಕುಂಕುಮದ ಕಲೆ  ನನಲಾ ಮಾಜಿದಿಜಿ 

ಮೋಕೆ ಉರ್ಕುದು ಈತೊರ್ತು ಉಡಲ್ 

ಅಲಂಕುದುಜಿ-ತೊಲಂಕುದಿಜಿ

ಅಪಗನೆ ಅಗಪುನ ದಿನ

ಕಾಪೋಡೇತಾ,

ಆಟಿಡಿಡಿ ಯಾನೊರ್ತೆನಾ ನನ  ?!

ಇಲ್ಲ ತಡ್ದೆಡ್  ಯ್ಯತೆ ಕುಲ್ಲುದಿನ  

ಎಂಕ್  ಕರಿಯುಜೊಂಜೊಂಜಿ ದಿನ   

ಅಪ್ಪೆ ಮೋಕೆದ ಲೆಪ್ಪು ಕೇನುಜಿ

ಕರ್ಂಚ ಕೊರ್ನ ಕುರುತಿಂಡಿ

ನಾಲಯಿಗ್ ರುಚಿ ಸೇರುಜಿ

ಮನಸ್ ಡಿರೆನ ಮೋನೆ   

ಪೋಪಂಡಲಾ ಪೋಪುಜಿ

ಕಣ್ಣ ಅಲಕೆಡ್  ಇರೆನ ಚಿತ್ರನೆ ಮಾಜುಜಿ !

ಪುನರ್ವಸುಡು  ಪುಣ ಪಿದಾಯಿ 

ದೀವೆರಾವಂದಿ ಬರ್ಸ 

ಪುಶ್ಯೊಡು ಪುಚ್ಹೆಗ್ ನುಪ್ಪು

ತಿಕ್ಕಂದಿ ವರ್ಷ

ಪನಂದೆ-ಕೇನಂದೆ  

ಪಾರೊಂದು-ಬೂರೊಂದು 

ಆಟಿ ಬೈದುಂಡ್   

ಒಂಜೇ  ಮನಸ್ದ ರಡ್ಡ್ ಜೀವೋದ 

ನಮ್ಮ ನಡುಟೊಂಜಿ

ಅದೆ-ಮದೆತ ಕಣ್ ಕಟ್ಟಾಂಡ್ !

ಆಟಿಗೇತ್ ನ್ಪರ್ ಅಂಸಣಿ ?

ನಮನೇತ್ ದಿನ ನುರ್ತುದೀಪಿನಿ ?

ಆಟಿ…. ಆನೆಡ್ ಕುಲ್ಲುದಾಂಡಲ-

ಮೆಲ್ಲೊಡಾಂಡಲ ಪೋವೊಡೆ 

ಕುದುರೆಡ್ ಕುಲ್ಲೊಂದು 

ರಾವೊಂದು ಪಾರೊಂದು

ಈರೆನನ್ ಲೆಪ್ಪೆರೆ ಮದಪಂದೆ ಬರೊಡು,

ಸೋಣೊಡು , ಎನ್ನಪ್ಪೆನಿಲ್ಲಡೆ !!.