ತುಳುವೆ ಮದಪೆರಾವಂದಿ ಪದಕುಲು ತುಳುವ ಮಲ್ಲಿಗೆ !

ತುಳುವೆ  ಮದಪೆರಾವಂದಿ  ಪದಕುಲು !

ಆ ಕಾಲೊಡು ತುಳು ಪದೊಕುಲು ತಿಕ್ಕುನೆ ಅಪರೂಪ ! ಕುಡ್ಲದ ಆಕಾಶವಾಣಿಡ್ ಕೃಷಿರಂಗ , ತುಳು ಕಾರ್ಯಕ್ರಮ ಮುಗಿಬೊಕ್ಕ ನಡುಟ್  ರಡ್ಡ್ ತುಳು ಪದ ಪಾಡಿಯೆರ್ಡ್ ಅವ್ವೆ ಮಲ್ಲ !
ಅಂಚಿಪ್ಪನಗ  ಇಲ್ಲದ ಪಡಸಾಲೆಡ್ ರೇಡಿಯೋಗು ಕೆಬಿ ಆನದ್ ಕೇನುನ  ಮುಗಿದ್ ಒಂಜಿ ಪಜ್ಜೆ ದುಂಬು ದೀಯಿನ ಕಾಲ ಬತ್ತುಂಡ್  ! ಟೇಪ್ ರೆಕಾರ್ಡರ್ ಪನ್ಪಿನ  ಒಂಜಿ ಸೋದ್ಯದ ಪೆಟ್ಟಿಗೆ!.  ಒತ್ತಿ ಕೂಡ್ಲೇ ನಂಕ್ ಬೋಡಿತ್ತಿನ ಪದ ಪಂಪುಂಡುಗೆ, ನಮ ಪಂಡಿನವೇನ್  ರೆಕಾರ್ಡ್ ಮಲ್ತೊoದು ನಮ ಪಾತೆರಿನ ನಂಕೇ ಪಿರ  ಪನ್ಪಿನ ಕೆನ್ನಗನೇ  ಮೈ ನಿಮಿರೊಂದಿತ್ತುಂಡ್ !

ಈ ಪೊರ್ತುಡು ತುಳು ಪದಲೋಕೊಡು  ಮನಸುಡ್ ಅಚ್ಚಿದುಂತುನ ಕೆಲವು ಬೇಲೆಲು ನಡತ್oಡ್ !
ತಿನ್ಪಿನ ಉನ್ಪಿನನೇ ಕಷ್ಟ ,ಅನುಕೂಲೋಲು ಕಮ್ಮಿ ಇತ್ತಿ ನೈಟಾವರ  ಈ ಬೇಲೆಲು ನರಮಾನಿ ನಡುಟ್  ಇಲ್ಲ ಇಲ್ಲಗ್ ಮುಟ್ಟಂದೆ ನೆನಪುಡೊರಿಯೊರಂದೆ  ಮಾಜಿದ್ ಪೋಂಡು !

ಈ ಪೊರ್ತುಡು ಎನ್ನ ಮನಸ್ ದಿಂಜಿನ   ರಡ್ಡ್ ಕ್ಯಾಸೆಟ್ಲು   ಉದಿತ .  ಒಂಜಿ ತುಳುವ ಮಲ್ಲಿಗೆ ಬೊಕ್ಕೊಂಜಿ ಗೊಂಚಿಲ್ !
ತುಳುವ ಮಲ್ಲಿಗೆ 1986 ಇಸವಿಡ್  ಸಂಗೀತ ಲೈವ್ ಕ್ಯಾಸೆಟ್ ದಕುಲು ಬುಡುಗಡೆ ಮಲ್ತಿನ  ಕೃಷ್ಣ ಕಾರೆಂತೆರೆನ   ಸಾಧನೆಡ್ ಮೂಡುದು  ಬತ್ತಿನ ಪೊರ್ಲಾಕಂಟುದ ತುಳುತ ಸೀಮೆದ ಕತೆ ಪಂಡಿನ ಪದಗೊಂಚೆಲ್ ! ಅಂಚಿಗ್ ಭಾವಗೀತೆ , ಇಂಚಿಗ್ ಭಕ್ತಿ ಗೀತೆ ಪನ್ಪಿಲೆಕ್ಕ ರಡ್ಡ್ ಮೈಟ್ ರಡ್ಡ್ ರೂಪೊನು ತೋಜಾಯಿನ ಅಪರೂಪದ ಗೊಂಚಿಲ್ ! ತುಳುಕೊಂಜಿ ಮಲ್ಲಿಗೆದ ದಂಡೆ !!

 ಈ ಸುರುಳಿದುಲಾಯಿ  ಸೀತಾರಾಮ್ ಕುಲಾಲ್ ಬರೆತಿನ  ಕಡಲರಾಜೆ  ಪಶುರಾಮಾಗ್ ದಾನ ಕೊರಿನ ತುಳುನಾಡ್, ಬೊಕ್ಕ ಏತ್  ಜನ್ಮ  ಪಡೆದ್  ಬರೋದು ನಿನ್ನ ಸಾನ ತೂಯರೇ  ಪದಕುಲೆನ್ ಕೇನ್ನಗ , ಸೆರೆ ನಿರೆತ ಕಡಲ್ದಲಕ್ಕ ಉಡಲ್  ಉರ್ಕರುಂಡು !

ಪಾಲ್ತಾಡಿ ರಾಮಕೃಷ್ಣ ಆಚಾರ್ ಬರೆತಿನ  ನಾಗ ಬೆಮ್ಮೆರೆ ಸೇವೆ ಪೊರ್ಲುಡು ಓಲು ನಡತ್ ಬರ್ಪುಂಡು  ತುಳುನಾಡುದ ಕಲಿಕಾರ್ನಿಕೆಗ್  ಇಂಬು ಕೊರಿನ ಪದ , 
ಪಕ್ಕಿಲಾ ಬುಲಿತುಂಡ್   ಕೋರಿಲಾ ಕಿಲೆತುಂಡ್ ..... ಅಪ್ಪೆ ಬಾಸೆನ್ ಮದತ್ ಜೈದಿನ ತುಳು ಜನೊಕುಲೆನ್ ಬಹುಷಃ ಲಕ್ಕವೆರಿಂದೇ  ಬರೆತಿಲಕ್ಕ ಉಂಡು !  

ವೆಂಕಟರಾಜ್ಕೃ ಪುಣಿಚಿತ್ತಾಯ  ಬರೇತಿನ ಕೃಷ್ಣ ನಿನ್ನ ಪುರಳುಡೊಂಜಿ ಸ್ವರ ಪಿದಾಡಡ್  ಭಕ್ತಿ ದಿಂಜಿದಿ   ಒತ್ತಾಯ ಕೇನ್ನಗ ನೇ  ಮನಸ್  ತಲ್ಮನೆ ಆಪುಂಡು.

ಮೋನಪ್ಪ ತಿಂಗಳಾಯ  ಬರೇತಿನ ಜಯ ಜಯಜಯ  ತುಳುವ ಸೀಮೆ ಅಪ್ಪೆನಾಡುಗ್ ಜಯತು ನಂಕ್ ಜನ್ಮ ಕೊರ್ತಿ ಅಪ್ಪೆಬೂಡುಗು, ಬಹುಶ ತುಳುನಾಡುದ ನಾಡ ಗೀತೆ ಆಡ್ ಮರೆವೊಡಾಯಿನ   ಅಪ್ಪೆ ನಾಡುದ  ಪದ !

ಅಮೃತ ಸೋಮೆಶ್ವರ  ಬರೆತಿನ ಸರಸು ಪಿಡದಿಯೊಲು ತೇರುಗ್  ..... 
ಆಹಾ....  ತುಳುವ  ಪೊಣ್ಣನ  ಪೊರ್ಲು ಪೊಲಕೆನ್,ಶ್ಯಾಲೆನ್ , ಮೇಲೊನ್   ಒಪ್ಪ ಮುಡೆದ್  ಕೊರ್ತಿನ  ಮೇಲದ , ಮೋಕೆದ  ಪದ !

 ಕೃಷ್ಣ ಕಾರಂತೆರೆನ   ಸಹಕಾರೊಡು , ಸ್ವರೋಟು  ಮೂಡುದು   ಬತ್ತಿನ ಈ ತುಳು ನೆಲ ಸೆಲೆತ ಪದಗೊಂಚಿಲ್  ನು   ಕಾತುದ್ ದೀದ್  ದುಂಬುದ  ನಮ್ಮ ಜೋಕುಲು ಬಾಲೆಲೆ  ಕೆನೋವೊಡಾಯಿನ  ನಮ್ಮ ತರೆತ ಮಿತ್ತುದ್ ಪುದೆ ! ಇತ್ತೇ ಓಲುಲಾ ತಿಕ್ಕುಜಿಡಲಾ ಉಂದು  Onlined ತಿಕ್ಕೊಂದುಂಡು ! ಉಡುಪಿಗ್  ಪೋಯರ್ಡ  ಕ್ಯಾಸ್ಸೆಟ್ ಕಾರ್ನರ್  ಮುಲ್ಪ ತಿಕ್ಕುಂಡು !
ಇಂಚಿತ್ತಿನ ತುಳುವ ಮಲ್ಲಿಗೆನ್ ಬಾಡಂದಿಲಕ್ಕ ಇಲ್ಲದ ಭಂಡರೋದು ಕಾತೊಂದು ಬರ್ಪಿನ ತುಳುವನ  ಮುಂಡಾಸ್ ದ  ಮಿತ್ತ್ ದ  ಬೇಲೆ  ಆವಡ್ ! 
ಕೃಷ್ಣ ಕಾರಂತೆರ್  ತುಳುವ ಮಲ್ಲಿಗೆನ್ ನನೊರ  ಜನೊಕುಲೆನ ಕೈಕ್ ತಿಕ್ಕುಲಕ್ಕ ಬೊಕ್ಕ   ನನಾತ್  ತುಳು ಪದ ಗೊಂಚಿಲ್  ಕಣಪಿಲಕ್ಕ  ತುಳುವಪ್ಪೆ ಅರೆಗ್ ಶಕ್ತಿ ದಿಂಜಾವಡ್  !

Online link:
http://mio.to/album/B.+Krishna+Karanth/Tuluva+Mallige+(1986)