ಮಲ್ಲಾದಿಗೆ

ಎಂಚಿನೈತ  ಮಲ್ಲಾದಿಗೆಯೆ 

ರಡ್ಡ್ ನುಪ್ಪು ಬರ್ಚಿದ್  

ಬಂಜಿ ನಿಲ್ಕೆ ಉನೆರಾವಂದಿನ ?

ಕುಕ್ಕು ಪೆಲಕಾಯಿ ಅಗ್ಗಿದಂಚಿ

ಗಟ್ಟಿಡೆ ತಿನೆರಾವಂದಿನ ?

ಎಂಚಿನೈತ  ಮಲ್ಲಾದಿಗೆಯೆ 

ಕುಲ್ಲುಂಡ  ಲಕ್ಕೆರಾವಂದಿನ 

ಲಕ್ಕುಂಡ  ಜಗೆ ಲಕ್ಕಂದೆ

ಬಿರುಬೀಸ ಕೈ ಬೀಸುದ್

ನಾಲ್ ಪಜ್ಜೆ

ನಡೆಪೆರಾವಂದಿನ ?

ಎಂಚಿನೈತ  ಮಲ್ಲಾದಿಗೆಯೆ 

ಕಾಂಡೆ  ಲಕ್ದ್  ಕೈಕಂಜಿ

ಮೋನೆ ತೂವೆರಾವಂದಿನ 

ಕಿದೆ ಪನೆಟ್  ಅರ್ಕಂಜಿ

ತೆಲಿ ದೀದ್ ಬೈಪಾಡ್ದು 

ನೊಸಲ್ ಮೂಸೆರಾವಂದಿನ ?

ಎಂಚಿನೈತ  ಮಲ್ಲಾದಿಗೆಯೆ

ಇಲ್ಲದ ನಡು ಕೋಣೆಡ್  

ಅರಿ ಬಾರ್ ತಾರಾಯಿ

ಚಿಲ್ಲಂದಿನ  

ಜಾಲ್ ಡ್  ಪಡಿ ಮಂಚದೆದುರು  

ಪೊಲಿ ಪೊಲಿಂದ್ …..

ದನಿ ದೆರ್ತ್ ಪಣಿ ಪೊರ್ತು

ಲೆಪ್ಪೆರಾವಂದಿನ ?

ಎಂಚಿನೈತ ಬದ್ಕ್ ಯೆ

ಕಂಡದ  ಕೆಸರ್ಡ್  

ಗೊಬ್ಬರದ ಗುಂಡಿಡ್ 

ರೆಂಕೆರಾವಂದಿನ 

ಪಚ್ಚೆ ಪುಣಿ  ಬರಿಟ್

ಕಚ್ಚೆ ಕಟುದ್ ಪಣಿ ಬರ್ಸೊಗು  

ನನೆವೆರಾವಂದಿನ? 

ಎಂಚಿನೈತ  ಕಾಸ್ ಯೆ 

ತುಳುವಪ್ಪೆನ ಜಾಲ್ ಡ್  

ನಲಿಕೆ ನಲ್ಪಂದಿನ 

ಕಲಿಕೆ ಕಲ್ಪಂದಿನ

ಅಲೆನ ಪರಿಕುಂಟು

ಕುರೆಕುಂಟುನು   

ಮಾಪೆರಾವಂದಿನ ?

ಕೈಟ್ ನಾಲ್ ಕಾಸಾವೆರಿಜ್ಜಿ 

ತೆತ್ತಿದುಲಾಯೆ  ಕಿಲೆಪುವೆರ್  

ಬೊಂಡದುಲಾಯೆ ಅಲಂಕುವೆರ್ 

ಪುಟ್ಟಿ ಕಿದೆನ್ ನಡತಿ ತಾದಿನ್   

ಇತ್ತಿಲಕ್ಕನೆ  ಮದಪುವೆರ್

ತಿಗಲೆ  ಮರತ್ ನಡಪುವೆರ್ !

ನಾಯಿದ ಮಿರೆ  ಪೇರ್

ಕೂಕುರ್ಲೆಗೆ, 

ಪೆತ್ತನೆ ಬೊರಿಯೊಡು 

ನಾಗಗ್ ತನು ಮೈಪೆರೆಗ್

ತೂ ಬೂರ್೦ಡ ದಾನಿಯೆ  

ಮನಸ್  ದಾಂತಿ  ಮಲ್ಲಾದಿಗೆಗ್ ?

ಬೊಲ್ಲ ಕುಟುಂಡ ದಾನಿಯೆ

ಕುರೆಕಟ್ ಕೆಸರ್ದಿಂಜಿನಡೆಗ್ ?!

ಚಂಡಿ ಕಾಸ್ ನ್ ನಾಯಿ ಮೂಸುಜಿ 

ಪುಂಡಿ ನುಪ್ಪುದೀಯಿನ  

ಇಲ್ಲದ ಪಡಿ ಮುಟ್ಟುನು 

ಸೈಯ್ಯಮುಟ ಮದಪುಜಿ !

ಮಲ್ಲಾದಿಗೆನ್ ಕಾಸುಡೇ

ಲಪ್ಪರೆ ಬಲ್ಲಿ

ಅವು

ಉಡಾಲ್ದುಲಾಯಿದ ಬೊಲ್ಲಿ

ಪುಣ ತುಂಬನಗ ಪಿರವುಪ್ಪುನ

ಜನನೆ 

ಮಲ್ಪೆರ್ ಸೈತಿನಾಯನ

ಬದುಕ್ ದಿತ್ತಿನಪಗದ

ಮಲ್ಲಾದಿಗೆದ

ಭಜನೆ !.