ಅಜ್ಜಿ ಇಲ್ಲಡೆ ಬಿನ್ನರೆ ಕಟ್ಟುನ ಮರಪರೆ ಅವಂದಿನ ನೆನಪು

ಅಜ್ಜಿ ಇಲ್ಲಡೆ ಬಿನ್ನರೆ ಕಟ್ಟುನ ಮರಪರೆ ಅವಂದಿನ ನೆನಪು

ದುಂಬು ಶಾಲೆಗ್ ರಜೆ ತಿಕ್ಕರೆ ಪೋರ್ಸೋತು ಇಜ್ಜಿ ಅಜ್ಜಿ ಇಲ್ಲಡೆ ಬಿನ್ನರೆ ಕಟ್ಟುನ ಗೌಜಿ. ಇತ್ತೇ ಕಾಲ ಬದಲ್ ಅತುಂಡು ಪ್ಲೇ ಹೋಂ, ಟ್ಯುಶನ್, ಕಂಪ್ಯೂಟರ್ ಕಲ್ಪುನ ಗೌಜಿ.
ಮಲ್ಲ ಪರೀಕ್ಷೆ ಮುಗಿದ್ 2 ತಿಂಗೊಲ್ದ ಮಲ್ಲ ರಜೆ ತಿಕ್ಕುನಗ ಅಜ್ಜಿ ಇಲ್ಲಡೆ ಬಿನ್ನರೆ ಕಟ್ಟುನ ಖುಷಿಯೇ ಬೇತೆ. ದೊಡ್ಡ ( ಅಜ್ಜಿ) ಲೆತೊಂದು ಪೋಯರೇ ಏಪ ಬರ್ಪೆರ್ಗೆ ಕಾತೊಂದು ಇತ್ತ. ಪರೀಕ್ಷೆ ಮುಗಿಯಿನೆ ಸಿಲೆಟ್ ಪುಸ್ತಕ ಮುಡಿಯೆ ಸೇರೊಂದು ಇತ್ತುಂಡು. ನನ ನಿಕುಲೇನು ಏರು ಅಲಿಪುನಿಯಾ ಅಮ್ಮನ ಬೊಬ್ಬೆ ನಡುಟು ದೊಡ್ಡ ಏಪ ಬರ್ಪೆರ್ ಕಾತೊಂದು ಇತ್ತ. ದೊಡ್ಡ ಇಜ್ಜಿನ್ದ ಮಾಮು ಬತ್ತು ಲೆತ್ತೊಂದು ಪೋವೊಂದು ಇತ್ತೆರ್. ಅಜ್ಜಿ ಇಲ್ಲಡೆ ಪೋನಗ ಅಲ್ಪ ಅಕುಲು ಮುಕುಲು ಸೇರೊಂದು ಜೋಕುಲೆನ ಗ್ಯಾಂಗ್ ಬಾರಿ ಮಲ್ಲೆ ಅವೊಂದು ಇತ್ತುಂಡು.

ಬೊಲ್ಪು ಅನಗ ಸಾಲ್ ಜೆತುದಿನ ಜೋಕುಲೇನು ತೂದು ಲಕ್ಕುಲೇ ಲಕ್ಕುಲೇ ಬೊಲ್ಪು ಅತುಂಡು ಅಜ್ಜಿ ಬೊಬ್ಬೆ ಪಡುನಗ ಮೆಲ್ಲ ಮಂದ್ರಿ ಒಯಿತುದು ಲಕ್ಕೊಂದು, ಸೀದಾ ಪೋದು ಕುಕ್ಕುದನ ಬೀಜದನ ಇರೆಟ್ಟು ಕೊಕ್ಕರ ಕುಲ್ಲುದು ಕುಲಿ ದೆಕ್ಕುನಗ ಇಲ್ಲದ ಉಲೈರ್ದು ಮಲ್ಲ ಸ್ವರ ನನಲ ಅತುಜ ಊರ್ದುದು ಪನ್ನಗ ಬೇಂದ್ರ್ ಗು ಬಲಿತುದು ಬಾಯಿ ಮುಕ್ಕಿಲ್ದು ಮೊನೆ ದೆಕ್ಕುದು ಸೀದಾ ಅಡಿಪಿಲ ಕೋಣೆಗ್ ಬಲಿತೊಂದು ದಿಕ್ಕೆಲ ಮುಡಿಯೆ ಸೇರೊಂದು ಇತ್ತ . ಮಾಮಿ ಬೆಚ್ಹ ಬೆಚ್ಹ ದೋಸೆ ಮಲ್ತು ಕೊರೊಂದು ಇತ್ತೆರ್, ಆಯಿತ ನಡುಟು ಸುರುತ ದೋಸೆ ಎಂಕ್ ಪಂಡುದು ಗಲಾಟೆ. ಅಂತು ಇಂತೂ ಮಾತ ಮುಗಿತು ಜಾಲ್ ಜತ್ತುಂದ ಸ್ವರ್ಗಗು ಕಾರ್ ದೀಯಿನ ನೆಂಪು.

ಯೆಂಕುಲು ಬುಕ್ಕ ಬರಿತ ಇಲ್ಲದ ಜೋಕುಲು ಸೇರೊಂದು ಕೈಯಟ, ಕುಟ್ಟಿದೊಣ್ಣೆ, ಲಗೋರಿ, ತೊಟ್ಟೆ ಕಟ್ಟುದು ಮಲ್ತಿನ ಚೆಂಡ್ ಕೊತ್ತಲಿಂಗೆ ಬ್ಯಾಟ್ ದು ಕ್ರಿಕೆಟ್, ಪಾಲೆಡು ಒಯಿಪುನಿ, ಅಟ್ಟ ಕಿದೆ ಇಲ್ಲ ಪಿರವು ದೆಂಗುದು ಕುಲ್ಲುದು ಕಣ್ಣಾಮುಚ್ಚಾಲೆ, ಇಲ್ಲು ಕಟ್ಟುದು ಒಕ್ಕೆಲ್ ಮಲ್ತ್ ಇಲ್ಲಟ, ಇರೆನು ಕಾಸ್ ಪಂಡುದ್ ಕೊರ್ದು ಅಂಗಡಿ ಆಟ, ಜೋಕಾಲಿ, ತಾರೆದ ಒಲಿಟು ಗಿರಗಿಟ್ ವಾಚ್ ಕನ್ನಡಕ ಮಲ್ತುದು ಗೊಬ್ಬುನಿ, ತೋಡುದು ಮೀನ್ ಪತ್ತುನಿ,ಕೆರೆಟು ಮೀಂದುನಿ ಯೆಂಕುಲೆನ ಈ ಗೊಬ್ಬುಲೇಡು ಊರು ಅಡಿಮೆಲ್ ಅಂಡಲ ಗೊತ್ತು ಅವೊಂದು ಇತ್ತುಜಿ.

ಇಲ್ಲರ್ದು ಒಣಸಗು ಬರೋಡಿಗೆ ಲೆಪ್ಪುನಗ ಮದ್ಯಾನ ಅಂಡ್ ಗೊತವೊಂದು ಇತ್ತುಂಡು. ಕೈಕರ್ ದೆಕ್ಕುದು ಇಲ್ಲದೆ ಪೋಗ್ಗುನಗ ಒಣಸಗು ಸಾಲ್ ಕುಲ್ಲದು ಬಳಸೊಂದು ಇತ್ತೆರ್.ಉಪ್ಪಡು, ಕುಕ್ಕುದ ಚಂಡುರ್ಲಿ, ಕಡ್ಲೆ ಗುಜ್ಜೆ ಅಜದಿನ, ಇಲ್ಲಡೆ ಮಲ್ತಿನ ತರಕಾರಿದ ಸಾಂಬಾರ್, ಕೊಜಪು, ಅಲೆತ ನೀರ್ ಬಂಜರ ಒಣಸು.

ನನ ದೊಂಬುಗು ಜಾಲ್ ಜಪ್ಪೋರ್ಚಿ ದೊಡ್ಡನ ಆರ್ಡರ್. ಅಂಚದು ಇಲ್ಲ ಉಲೈಯೆ ಅಡಿಮೆಲ್ ಮಲ್ತೊಂದು ಬೋಲ್ಪುಗು ಮಾಮು ಪೆಂಟೆ ಪೋದು ಬನ್ನಗ ಕನತಿನ ಬಾಲಮಂಗಳ, ತುಂತುರು, ಚಂಪಕಗ್ ಗಲಾಟೆ. ಸುರು ಡಿಂಗನ ಕಥೆನೇ ಓದೋಡು ಬುಕ್ಕ ಬಾಕಿದ ಕಥೆ. ಗಂಟೆ 4 ಅನಗ ಬಯ್ಯದ ಚಾಗ್ ಹಪ್ಪಳ, ಪೋಡಿ ತಿಂದ್, ಜಾಲ್ ಜತ್ತುನಿಯೇ ಕುಡ ಕಸರತ್ ಸುರು. ಪೆರಂಗೈ ಕೊಯಿಪುನಿ, ಕುಕ್ಕು ಪೆಜ್ಜರೆ ಪೋಪುನಿ. ಪೆಜಕಯಿಗು ಕಲ್ಲು ದಕ್ಕುದು ತಲ್ಪುನಿ, ನೇರಳೆ ಕೊಯಿದು ಪಾಲೆಡು ಪಾಡುನಿ, ಪುನರ್ಪುಳಿ ಮರ ಬರ್ತುನಿ, ಕೇಪುಳ ತಿನೋದು ಕಾಡ್ ಬೈಲ್ ತಿರ್ಗೊಂದು, ಮಾಮುನ ಒಟ್ಟು ತೋಟಗ್ ಪೋದು ಪಂಪು ಸ್ಟಾರ್ಟ್ ಮಲ್ಪುನಗ ನೀರದು ಗೊಬ್ಬುದು ಚಂಡಿ ಅವೊಂದು ಕಂಗುದ ಮುದೆಲಗು ನೀರ್ ಚೆಪುನಿ, ತೋಟದ್ ಬಾರೆ ಪರದು ಪರ್ನ್ದುದ್ ಇತ್ತುಂದ ಕಾಲಿ ಮಲ್ತು , ತೋಟದ ಕೆರೆ ಬರಿತ ಪೆಲತ ಮರಟು ಪರ್ನ್ದುದಿನ ತುಳುವೆ ಪೆಲಕಾಯಿ ಅಲ್ಪನೆ ಬಿಚ್ಚದು ತಿಂದು ಪೋಯ್ಯೆದ ರಾಸಿಡು ಪಲ್ಟಿ ಹಾಕೊಂದು ಗೊಬ್ಬುಂದು ಇತ್ತ .ಬಯ್ಯದ ಪೋರ್ತು ಪೆತ್ತಲೇನು ಕೂಡಯರೇ ಮಲ್ಲ ಸಹವಾಸ ಮಲ್ತೊಂದು ಇತ್ತ
.
ಊರುಡು ಯಕ್ಷಗಾನ ಬಯಲಾಟ ಇತುಂಡ ಅಯಿತ ಖುಷಿಯೇ ಬೇತೆ. ಬಯ್ಯ ಅನಗ ಮೀದು ರೆಡಿ ಅವೊಂದು ಇತ್ತ. ಆಟಗ್ ಪೋನಗ ಒಂಜಿ ಮಂದ್ರಿ ಪತೊಂದು ಪಿದರ್ದು ಊರುದು ದುಂಬು ರೆಡಿ ಅವೊಂದು ಇತ್ತ. ಚೆಂಡೆದ ಸ್ವರ ಕೆನಗ ಇಲ್ಲೇ ಅಡಿಮೆಲ್ ಅಪುಂಚ ಬೊಬ್ಬೆ. ಆಟಗ್ ಪೋನಗ ಇಲ್ಲಡು ಮಲ್ಲಕುಲು ಕೊರಿನ ಚಿಲ್ಲರೆ ಕಾಸ್ಡು ದಾದಾ ಮಾತ ದೆತೊನೋಡು ಚರ್ಚೆ, ಎರೆಡ ಎತ್ ಉಂಡು ಲೆಕ್ಕ ಮಲ್ತೊಂದು ಬಾರಿ ಜಾಗ್ರತೆಡು ಕಿಸೆಟ್ ದೀದು ಅಪಗ ಅಪಗ ಮುಟ್ಟು ತುವೊಂದು ಇತ್ತ. ಮಲ್ಲಕುಲೆ ಒಟ್ಟು ಒಲಿಮಾಡಲ್ ಸೂಟೆಡು ಕಂಡದ ಪುನಿಟು ಬುರೊಂದು ಪತ್ತೊಂದು ಆಟದಡೆ ಎತ್ತುನಗ ಸುರು ಸಂತೆ ಎತ್ ಬೈದುಂಡು ತುಪುನಿ, ಹೋಟೆಲ್, ಚರಮಬುರಿ ಅಂಗಡಿ, ಕುರ್ಲು ಮೀಠಯಿ ಅಂಗಡಿ, ಪುಗ್ಗ ಗೊಬ್ಬುನ ಅಂಗಡಿಲು ಮಾತಾ ತುವೊಂದು ರಂಗಸ್ಥಳದ ಎದುರು ಪೋದು ಕುಲ್ಲುನಿ. ಆಟ ಸುರು ಅದ್ ಒಂತೆ ಪೋರ್ತನಗ ಚೆಂಡೆದ ಸೌಂಡು ಭಾಗವತಿಗೆಗು ಅಡೆಗೆ ಕಣ್ಣು ಕುರಿಯರೇ ಸುರು. ಗಂಟೆ 2 ಅನಗ ಏಡ್ಡೆ ನಿದ್ರೆಡು ಇಪ್ಪುನಗ ಮೈಸಸುರೆ ಬತ್ತೆ ಲಕ್ಕುಲೇ ಲಕ್ಕುಲೇ ಪಂದುಡು ಮೆನ್ಪುನಗ ಮೈಸಸುರನ ಅಬ್ಬರಗು ನಿದ್ರೆ ರಟ್ಟುದು ಕುತ್ತ ಕುಲೊಂದು, ಮಾಮು ಚರಮಬುರಿ ಕಂತಿನೇನ್ ತಿನೊಂದು ಆಟ ತುವೊಂದು ಬೊಲ್ಪು ಅನಗ ಬನ್ನಗ ಸಂತೆ ತಿರ್ಗುದು ಗೊಬ್ಬುನ ದೆತೊಂದು, ಒಂಜಿ ಪಾಕೆಟ್ ಕುರ್ಲು ಕೈಟು ಬೀಜವೊಂದು ಇಲ್ಲಡೆ ಬನ್ನಗ ಏರ್ ಎತ್ ದೆತ್ತೊಂದೆರ್ ಲೆಕ್ಕಾಚಾರ ಸುರು.

ಇತ್ತೆ ಉಂದು ಮಾತಾ ನೆನಪು ಅದ್ ಒರಿದುಂಡು. ಇತ್ತೆದ ಜೋಕುಲೆಗು ಉಂದು ಮಾತ ತಿಕ್ಕೊಂದು ಇಜ್ಜಿ. ಕಾಲಗು ತಕ್ಕ ಕೋಲ ಅತುಂಡು. ಅಂಡ ಇತ್ತೆಲ ಜೋಕುಲೆಗು ರಜೆ ತಿಕ್ಕುಂಡು ಪನ್ನಗ ಎಂಕ್ ಅಜ್ಜಿ ಇಲ್ಲಾದ ನೆನಪು ಅಪುಂಡು. ಉಂದುವೆ ನಮ್ಮ ಮರಪರೆ ಅವಂದಿನ ನೆನಪು ತುಳುನಾಡ ನೆನಪು
ಸೊಲ್ಮೆಲು.

ಬರವು : ತುಳುನಾಡ ನೆನಪು