ಕದಿಕೆ ತಿಂದಿನಾಯೆ ಮುನ್ನೂದು ವರ್ಷ ಬದುಕೆ

 

ಕದಿಕೆ  ತಿಂದಿನಾಯೆ   ಮುನ್ನೂದು ವರ್ಷ ಬದುಕೆ

ತುಳುನಾಡುದ  ಜನೊಕ್ಲು  ಆಟಿಡ್  ಕೂರು ಕಟೊಂದಿತ್ತಿನಕುಲು  ಸೋಣ  ಬನ್ನಗ  ಒರಾನೆ  ಮೈ ಕುಡ್ತು  ಲಕ್ಕುವೆರ್.  ನನ ಏತ್ ಮಾತಾ ಬೇಲೆ ಆವೆರೆ ಬಾಕಿ  ಉಂಡು, ತಾರೆದ ಮುದೆಲ್ ಬುಡ್ಪಾದ್ ಕಟ್ಟೆ ಕಟ್ಟೋಡು ,ಬುಲೆ  ಬುಲೆವೊಂದು ಬನ್ನಗ  ನೋಂಪು ದಾನಿ ಪುದ್ದಾರ್ ದ ಪೊಸತ್ ಉಂಡುದು  ಕೊರಲ  ಪರ್ಬ  ಮಲ್ಪೊಡು,ಜಾಲ್  ಪಿರೆಸ್ದ್ ಪೊಲಿಮನೆಟ್  ಪೊಲ್ತುದ್  ಮಟ್ಟ  ಮಲ್ಪೊಡು ...... ಒಂಜಾ ರಡ್ಡ?
ಚಂಡಿ ಕಟುದು  ಕುಲ್ಲುಂಡ   ಆವಂದ್....

ಮರಿಯಲೊಡು  ಚಂಡಿ ಕಟ್ಟುದು  ಕುಲ್ಲರೆ ಕಾರಣ ಉಂಡು .  ಚಿರಿ ಚಿರಿ  ಬರ್ಸ, ಬೆನ್ನಿದ ಬೇಲೆ ಮಾತಾ ಮುಗಿದುಂಡು . ಪಿದಾಯಿ ಸೂರ್ಯನ ಮೋನೆ ತೂವಂದೆ  ಕೆಲವು ದಿನ ಆದಿಪ್ಪು .  ಸುತ್ತ ಮುತ್ತ ಸಿಮಾ
ಯೇರ್ದ್ ಮೈ- ಕೈಟ್ ಸರಿಕಟ್ ನೆತ್ತೆರ್ ಪರಡಂದೆ ಪಿಜಿನ್ ಪರತಾವರೆ ಸುರು!
ಕುಲ್ಲುಂಡ  ಲಕ್ಕೆರಾಪುಜಿ , ಲಕ್ಕುಂಡ  ಉಂತೆರಾಪುಜಿ.  ಅಲ್ಪ ಗಂಟ್ ಬೇನೆ , ಮುಲ್ಪ  ಸೊಂಟ ಬೇನೆ !!

ಆಯುರ್ವೇದದ ಪ್ರಕಾರ  ನಮ್ಮ ಜೀವದ ಕಾಯಿಲೆಗ್ ಕಾರಣ  ಮೂಜೆ
ವಾತ-ಶೀತ -ಪಿತ್ತ
ಮರಿಯಲದ ಪೋರ್ತುಡು  ಈ ಶೀತದ  ಬೊಕ್ಕ ವಾತದ ಬಾಧೆ ತಪ್ಪೆರಿಜ್ಜಿ . ಅಂಚ ನಮ್ಮ ಹೆರಿಯೆರ್  ಆಟಿದ  ಅಮಾವಾಸ್ಯೆಗ್   ಕೆತ್ತೆದ ಕಷಾಯ , ಪತ್ರೋಡೆತ  ಅಡ್ದ್ಯ ,ಬೆದುರುದ ಮುಂಗೆದ ಕಜಿಪು , ತೊಜಂಕ್ದ-ನುರ್ಗೆದ   ಆಜದಿನ. ಉಪ್ಪಡ  ಪಚ್ಚಿರ್ , ಕುಡುತ  ಸಾರ್ . ಉರ್ದುದ ಚಟ್ನಿ ಇಂಚ ಮಾತಾ ತಿಂದ್  ಜೀವೊನು  ಬೆಪ್ಪು ಕಟ್ಟವೊಂದು  ಇತ್ತೆರ್.   ತಂಪುದ  ವಸ್ತುಲೆನ್ ಮರಿಯಲೊಡು  ಕಮ್ಮಿ ತಿನುವೇರ್.
ವರ್ಷ ಋತು ಕರಿದ್  ಶರದೃತು ಬರ್ಪಿನ ಸಂದಿ ಪೊರ್ತೆ  ಈ ಗಣಪತಿ ಪರ್ಬದ ಪೊರ್ತು. ಆಟಿಡ್  ಬೊಕ್ಕ ಅರೆಗಾಲ ಸುರು ಆಯಿಲಕ್ಕ.  ಅಲ್ಪಲ್ಪ ಚುಟಿ ದೊಂಬು  ನಿಲ್ಕೆರೆ ಸುರು ಮಲ್ಪು .

ವರ್ಷಋತು  ವಾತ ಶೀತದ  ಬಾಧೆದ  ಪೊರ್ತಾಂಡ , ಶರದೃತು  ಪಿತ್ತ ಬಾಧೆದ ಪೊರ್ತು! ಅರೆಗಾಲದ ದೊಂಬುಗು ನಾಲ್ ಪಜ್ಜೆ  ನಡತ್ತುಂಡ  ಅಡೆಗೆ  ತರೆ ಸುತ್ತು ಬರು . ಕಕ್ಕಿಲಕ್ಕ  ಆವು, ಅಲ್ಪನೆ ನೆರೆಲ್ಡ್  ಒಂತೆ  ಕುಲ್ಲುಗ ಪಂಡುದಾವು. ಉಂದು  ಮಾತಾ ಪಿತ್ತ ದೋಷದ ಕಾರ್ಬಾರ್ .

ಉಂದೆನ್ ಮಾತಾ ಅಕಲ್ಡ್  ದೀಯೊಂದು  ನಮ್ಮ ತೆರಿದಿನಕುಲು  ಅರೆಗಾಲದ ಮಧ್ಯಾಹ್ನ ಪೊರ್ತುಗು ಇಲ್ಲಗ್ ಬತ್ತಿನ ಬಿನ್ನೆರೆಗ್ ಲಿಂಬೆ ಪುಲಿತ  ಶರಬತ್ ,ಪುನರ ಪುಲಿತ ನೀರ್ , ನೀರಲೆ , ಕಡೆದಿನ ಎಡ್ಮೆದ ನೀರ್ ಕೊರ್ದು  ತಂಪು ಮಲ್ಪೆರ್ .

 ಇಂಚಿನ ಸಂದಿ ಪೊರ್ತುಲೆಡ್  ಉಡಲ್ದ ಹೊಂದಿಕೆದ ಬೇಲೆನ್  ನಮ್ಮ ಪರ್ಬೊಲು  ಉದಾಲ್ಡ್   ದಿಂಜಾವೊಂದ.

ಮರಿಯಲದ ಬೆಪ್ಪು ಜೀವೊನು ಅರೆಗಾಲೊದ ಬೆಚ್ಹೊಗು ತಂಪು ಮಲ್ಪುನ , ವಾತ -ಶೀತದ ಗಡು ದಾಂಟುದು  ಪಿತ್ತದ ಬಾಕಿಲ್ಗ್ ಬನ್ನಗ  ಗಣಪತಿ ಪರ್ಬ ಬರು.  ಅಂಚ ಗಣಪತಿನ ಮಾತಾ ತಿಂಡಿಲು  ಬೆಲ್ಲದ  ಡಬ್ಬದೊಟ್ಟುಡೆ  ಆವೊಡು . ಬೆಲ್ಲ ದೊಟ್ಟುದ  ಎಡ್ಮೆ ,ಪೊದ್ದೊಲು , ಅಂಚನೆ ಕರಂಬು  ಮಾತಾ ಪಿತ್ತ ನಾಶ  ಅಂಚನೆ ಜೀವೊಡು  ನೆತ್ತೆರ್ ಸೇರ್ರೆಗ್  ಉಪ್ಪುನಂಚಿನವು,

ಮಾತವೆಡ್ಲಾ  ಮಲ್ಲ  ಕದಿಕೆ

ಕದಿಕೆ  ತಿಂದಿನಾಯೆ   ಮುನ್ನೂದು ವರ್ಷ ಬದುಕೆ

ಕದಿಕೆದ  ಗುಣನೆ ಮರ್ದುದ .  ದುಂಬೊರ  ಚಾಣಕ್ಯ ಪನ್ಪಿನ ಬಿರ್ಸೆ  ಮಂತ್ರಿ ಕದಿಕೆದ ಮುದೆಲ್ ಸಮೇತ ದೆಪ್ಪೊಡು  ಪಂತೆಗೆ . ಒಂಜಿ ಬೇರ್  ಒರಿಂಡಲಾ   ಅಡೆಗೆ  ತೆಗುರುನ ಗುಣ  ಈ ಕದಿಕೆದ . ಅಂಚಿನ ಜೀವ ಶಕ್ತಿ ಈ ಪುದೆಲ್ಗ್ .
ನೆತ್ತರ್ ಶುದ್ದಮಲ್ಪುನ ,ಮೂಲವ್ಯಾಧಿಗುಣ ಮಲ್ಪುನ , ಶೀತ , ಗಾಯ ,ಕಜ್ಜಿ , ಬಂಜ್ದ ಬೇನೆ  ಉಂದೆನ್ ಉಂತಾದ್ ಕೊರ್ಪಿನ ಮಾಮಲ್ಲ ಪಜಿರ್ ಕದಿಕೆ.

ನಾಯಿಲು ಹುಷಾರ್ ದಾಂತಿನ ಪೊರ್ತುಗು  ಕದಿಕೆದ ಪಜಿರ್ನ್  ತಿಂದುದ್  ಅಲ್ಪಲ್ಪ ಕಕ್ಕುನ ನಮ್ಮ  ಕಣ್ಣುಗ್  ತೂಯರೆ  ತಿಕ್ಕುಂಡು, ದೇವೆರೆ  ದಿಕ್ಕ್  ಬಾಯಿ ಬರಂದಿ  ಜೀವೊಲೆಗ್ .

ನಮ್ಮ ದುಂಬುದ  ಋಷಿ ಮುನಿಕುಲು  ಕದಿಕೆ ದಾಂತೆ  ದಿನ ದೆಪ್ಪಯೆರ್ . ಪೂಜೆದ ನೆಪೋಟು  ಅವು ಅಗಲ  ಜೀವ ಸೇರೊಂದಿತ್ತುಂಡ್. ಕದಿಕೆದೊಟ್ಟುಗು   ಅಗುಲು  ನೂತ್ತಾಜಿ  ವರ್ಷ ಬದುಕೊಂದಿತ್ತೆರ್ !

ಕದಿಕೆದ ರಸ ನಮ್ಮ ಜೀವದ ಅಮೃತ ರಸ ! ಖಾಲಿ ಉಂಡೆ ಚಕ್ಕುಲಿ  ಮಾತ್ರ ತಿನ್ಪಿನತ್  ಕದಿಕೆದ  ನೀರ್ಲಾ  ನಮ್ಮ ಉಡಲ್  ಸೇರಡ್.   ಗಣಪತಿ ದೇವೆರ್ನ   ಪುದರ್ಡ್  ನಮ್ಮ ಉಡಲ್  ಸೇರಡ್!.