ದಾದಾ ಮಾರಯಾ........ ಗುಜ್ಜೆ ಕೊರಿಲಕ್ಕ ಕೊರಿಯೇರ್.....

ಕುಂಡೆಚ್ಚೆ  ಪೆಲಾಕೈ ಕೂಂಪುನ ಪೊರ್ಲು

ತುಳುನಾಡುಡ್   ಬೊಡ್ಚಿ  ಪOಡಲಾ  ಬೋಡಾಯಿನಾತ್  ಬುಲೆವುನ  ಒಂಜಿ ಬುಲೆ ಪೆಲಕಾಯಿ. ತಿಂದಿನ  ಪೆಲಕಾಯಿದ ಬೋಲೆ (ಪೆಲತರಿ ) ದಕ್ಕಿನಲ್ಪ ಎರೆನೆ ಹಂಗ್  ದಾಂತೆ ತನ್ನಾತೆಗೆ  ಬುಲೆದ್ ಗಟ್ಟಿ  ನೆಲೆ ಉಂತುನ  ಗುಣ  ಬಹುಶ ತುಳುನಾಡುದ  ಮಣ್ಣುದ  ಗುಣ  ಆದಿಪ್ಪೋಡು. ಗುಜ್ಜೆ ಪಂಡ  ಕಾಯಿ ,ಪೆಲಕಾಯಿ  ಪಂಡ  ಪರ್ನ್ದೆರೆ ತಯಾರಾತಿನ ಬುಲೆದ್ ಕಾಯಿ                                                                     


                                                     ಪರಂದ್  ಪೆಲಕಾಯಿ ....ಆಹಾ  ಬಾರಿ ಕಮ್ಮನೆ !

ಇಂಚ ಬುಲೆಯಿನ  ಪೆಲಕಾಯಿದ  ಮರ  ಬಾರಿ ಉಪಯೋಗೊಗು ಬೂರುನ  ಮರ. ಮರೋಟು ಪತುದು ಇರೆ ಮುಟಲ ಉಪಯೋಗ  ಆಪಿನ ಅಪರೂಪದ ಮರ .ಆoಡ ಲ  ತುಳುನಾಡುಡ್  ಪೆಲಕಾಯಿಗ್ ತಿಕ್ಕುನ ಮಾರ್ಯಾದೆ ಆತೆಡೆ ಉಂಡು.  ಬಹುಶ  ಸುಲಬೋಡು  ತಿಕ್ಕುನೈಟಾವ್ರ  ಸಸಾರ ಆದಿಪ್ಪೆರೆ ಯಾರು.

                                                    ಮುದೆಲ್ದು -ಕೊಡಿ ಮುಟ  ಓಲಾಂಡಲ   ಗುಜ್ಜೆ  ನೇಲು 

ಪೆಲಕಾಯಿದ  ಗೂಂಜಿಡ್  ಪತ್ತುದು  ರಚ್ಚೆ  ಮುಟ  ಒವ್ವೇನ್ಲ ದಕ್ಕುನ ಕ್ರಮ ಇಜ್ಜಿ....ಅಂಚಿನ ಪರಿಪೂರ್ಣ ಪರಂದ್  ಈ ಪೆಲಕಾಯಿ.  ಗೊಂಜಿನ್ ಉಪ್ಪು ನೀರುಡ್  ಮುರ್ಕಾ ದೀದ್ ಮರಿಯಲೋಗು ಚಟ್ನಿ ಕಡೆದ ಕೊರಿಯೇರ್ಡ ವನಸು ಪುಲ್ಪನೆ.ಉಪ್ಪಡ್  ಪಚ್ಚೀರ್ ದ ಕಜಿಪು ಇತ್ತುಂಡ  ವನಸ್ ಮಲ್ತಿನಾನೆ  ಗೊತ್ತಾವಂದ್
                                                            ಗುಜ್ಜೆ-ಕಡ್ಲೆ  ಆಜಾವರೆ  ತಯಾರ್

ಪಚಿರ್ದ,ಪೊಲ್ಲುದ  ಯೆಸಲುನು  ಯೆನ್ನೆಡ್  ಕೈತು ಕೊರಿಯೇರ್ಡ ಚಳಿ ಬಲ್ಪು .ಸಾಂತಾನಿ  ಇತ್ತಿನಾಂಡ   ಪೊರ್ತು  ಕರೀನಾ ಗೊತ್ತಾವಂದ್. ಹಪ್ಪಲ ಇತ್ತುಂಡ  ಏತ್ ಬರ್ಸ  ಬತ್ತುಂಡಲ ,ಬೊಲ್ಲ ಬತ್ತುಂಡಲ  ಗೊತ್ತೇ ಆವಂದ್ ,

ಪೆಲಕಾಯಿದ  ಗಟ್ಟಿ ತೂಂಡ ನೆ ಬಾಯಿಡ್ ನೀರ್ ಬರು , ಪೆಲಕಾಯಿದ  ತೊಂದುರ್ದದಡ್ಡೆ ,ಮುಳ್ಕ ,ದೋಸೆ ,ಇಡ್ಲಿ, ಪೆಲತರಿತ ಉಪ್ಕರಿ ,ಬೋಲೆ - ತೌತೆ ಕೊದ್ದೆಲ್ ,ಬೋಲೆ -ತೊಜಂಕ್ ಆಜದಿನ,ಬೋಲೆ -ಬಸಳೆ ಕಜಿಪು, ಪರಂದು  ಪೆಲಕಾಯಿದ ಕಜಿಪು .......ಒಂಜ- ರಡ್ಡ ..ಪನೊಂದು ಪೊಂಡ   ಮುಗಿಯರೇ ಇಜ್ಜಿ.

                                                     ರುದ್ರಾಕ್ಷಿ  ಪೆಲಕಾಯಿ -ತೂಯರೆಗ್ ರುದ್ರಾಕ್ಷಿ ಮಾಲೆದ ಲಕ್ಕ 

ಉಪಡ್  ಪಚಿರ್ ಪಾಡುನ ಕಾಯಿ ಗುಜ್ಜೆ 

ಬಲೆ ದೆತೊನ್ಲೆ

ಈತ್ ಮಾತಾ ಇತ್ತುoಡಲ ಪೆಲ್ಕಾಯಿಗ್ ಮರ್ಯಾದಿ  ಕಮ್ಮಿ ....

ಪೆಲಕಾಯಿ ತಿಂತಿನ  ಊರಿಡಿ ಗೊತ್ತಾಂಡಲ ಪನೆರೆಗ್ ಒಂತೆ ಕಮ್ಮಿ .ಇಲ್ಲಗ್ ಪೆಲಕೈ ತುಂಬೊoದು  ಪೋಯರೆಗ್ ಒಂಜಿ ನಮೂನೆ  ಚಳಿ.

ಪೆಲಕಾಯಿನ್ ಸಸಾರ  ಮಲ್ಪೆರೆ ಇಂಚಾ ಮಾತಾ  ಪನ್ಪೆರ್.......ಕೇನ್ಲೆ.

1). ದಾದಾ ಮಾರಯಾ  ಗುಜ್ಜೆ ಕೊರಿಲಕ್ಕ  ಕೊರಿಯೇರ್

ಸರಿಕಟ್ಟುದ  ಬೆಲೆ ತಿಕ್ಕಂದೆ ಕಮ್ಮಿಡ್ ಕೊರ್ಯೆರ್ಡ ಇಂಚ ಪನುವೆರ್ ,ಗತಿ ದಾಂತೆ ಕಡೆಕ್ ಗುಜ್ಜೆ ಕೊರಿಲಕ್ಕ ಕೊರಡಾದ್  ಬತ್ತುಂಡ್  ಪನ್ಪಿನ ಒಂಜಿ ಸಂಕಡ. ಒಂಜರ್ತೊಡು  ಧರ್ಮೊಗು ಕೊರಿಲಕ್ಕ  ಕೊರಿಯ ಪನ್ಪಿನಿ

2). ಆಯೇ  ಗೂಂಜಿಡ್  ಬುಡಯೆ - ಮೋಲು  ರಚ್ಚೆಡ್  ಬುಡಯೋಲು.

ಉಂದು  ಹೆಚ್ಚಾದ್  ವಾದ-ಲಡಾಯಿ ಮಲ್ಪುನ ತಗೆ-ತಂಗಡಿ ,ಕಂಡನೆ- ಬುಡೆದಿನ್ ತೂದು ಪನ್ಪಿನ ಒಂಜಿ
ರೂಢಿ  ಬಾಸ್ಹೆ .ಸೋಲೋಪ್ಪೋನೆರೆ ತಯಾರಿಜ್ಜೆರ್ ಇರ್ವೆರ್ಲಾ  ಪನ್ಪಿನೈಕ್ ಒಂಜಿ ಉಪಮೆ. ಗೂಂಜಿಡ್ಲಾ- ರಚ್ಚೆಡ್ಲಾ  ಅಂಚಿನ ತಿಕ್ಕುನಂಚಿನ ದಾಲ ಇಜ್ಜಿ ,ಅಂಡಲ ಪೊಕ್ಕಡೆ ಸೊಂದುವೆರ್  ಪಂಡುದ್ .

3) ಆಯೇನಾ ...ಆಯೇ  ಪೆಲಕಾಯಿದ  ಮಾಯಾಣದ ಲಕ್ಕ ಅಂಟು , ರಗಳೆ ಮಾರಾಯ...

ಬೆರಿ ಬುಡಾOದಿ ನಾಯಗ್ ,ಪಂಡಿನವೇನೆ  ಪನ್ಪಿನಾಯಾಗ್ ,ಕಿರಿ ಕಿರಿ ಮಲ್ಪುನಾಯಗ್ ಇಂಚ ಪಂಡು ತೋಜಾವೆರ್  .ಪೆಲಕಾಯಿದ ಮಾಯಣನೆ ಅಂಚ ,ತಿನ್ಪಿನ ಬಿಮ್ಮನ್ಲಾ  ಕೆಲವು ಸಲ ಅಂಟು ಪತೊನುಂಡು  !

4) ಅಂಚ ದಾನಿ ಕಮ್ಮಿಡ್  ಕೇನುವರ್ ..ಪೆಲಕಾಯಿಯ ?

ತುಳುನಾಡುಡ್ ಉಂದು  ಒಂಜಿ ಬ್ಯಾರದ  ಬಾಸ್ಹೆ ,ಪೆಲಕಾಯಿ  ಬೊಕ್ಕ ಕೆರೆಂಗ್ ಬಾರಿ ಅಗ್ಗದ  ರಡ್ಡ್ ಸಾಮನ್ಲು .ಸಂತೆಡ್ ಈ ಬಾಸೆ ತೋಜಿ ಬರು . ದಾನಿ ಬಾರೀ  ಕಮ್ಮಿಡ್  ಕೇನುವರ್  ಅಲ್ಪ ಪೆಲಾಕೈ ಉಂಡು  ದೆತೋನ್ಲೆ  ಪಂಡುದ್ ಪೆಲಕೈ ಮಾರುನಾಯನಂಚಿ  ಕೈ ತೋಜಾವೆರ್ .ಪಾಪ  ಪೆಲಕಾಯಿ ಮಾರುನಾಯಗ್  ಬೇಜಾರಾವಂದ !.


                                                  ತುಲುವೆ ಪೆಲಕಾಯಿ ತಿನ್ಯರೆ ಸುಲಭ   ಬಂಜಿಗ್ ಮಾರಿ -ಬರ್ಕೆ ಮಾತೈಕ್ಲ ಎಡ್ಡೆ 

ಜೋಕ್ಲೇನಾತ್  ಮಲ್ಲ ಪೆಲಕಾಯಿ

                                                          ಜತ್ತ್ ದೀತಿನ ಪೆಲಕಾಯಿ ತೂಂಡ  ಬಾಯಿದ್ ನೀರ್ ಬರು

ಮರಿಯಾಲ ಅರ್ಧ ಮುಗಿಯನಗ ಪೆಲಕಾಯಿಲ ಮುಗ್ಯೊಂದು ಬರು .ಕಡೆತ ಪೆಲಕಾಯಿ ಕೊಯ್ಯನಗ ಕೈಟು ಒಂಜಿ ಪುಂಡಿ ಮಣ್ಣು ಪತೊಂದು .....

ಈ ವರ್ಸ ಮುಗಿಂಡ್ ,ಬರ್ಪಿ ವರ್ಸ ಎಂಕ್ಲೆಗ್ 50,ಕಕ್ಕೆಗ್ 50,ಕುಂಡೆಚ್ಹಗ್ (ಚನಿಲ್ಗ್ ) 50,ಪೆತ್ತ- ಕಂಜಿಲೆಗ್ 50 ಪೆಲಕಾಯಿ ಆವೋಡು ಪಂಡುದ್ ಮರಕ್ ದಕ್ಕರೆ ಉಂಡು. ಬರ್ಪಿ ವರ್ಸ 200 ಪೆಲಕಾಯಿ .....ಹಾಂ ಸುಲ್ಲತ್  200 ಕಾಯಿ  ಆಪಿನಾತ್  ತಾಕತ್ದ, ಮಲ್ಲ ಮನಸುದ  ಮರ ಈ ಪೆಲಕಾಯಿದ ಮರ.

                                                      ಪೆಲಕಾಯಿ  ಕೈ ಕಂಜಿಲೆಗ್ ಬಾರಿ ಕುಸಿತ ಆಹಾರ

ಒಂಜಿ ತಮಾಸೆದ  ಕತೆ ಕೇನ್ಲೆ

    

ಪರೆಂಗಿಲು ಅಬ್ಬಕ್ಕ ರಾಣಿ ನ ಕಾಲೋಡು  ನಮ್ಮ ತುಳುನಾಡುಗ್ ದಾಳಿ ಮಲ್ತಿನ ಪೋರ್ತುಡು ಕೆಲವು ಪರೆಂಗಿಲೆಗ್ ಪೆಲ್ಕಾಯಿದ ಕಮ್ಮನೆ ಬತ್ತುದು ತಿನ್ಯರೆ ಮನಸ್ ಆಂಡುಗೆ. ಸುರುಕ್ಕೆ  ಜನೋಕ್ಲೆಗ್  ಅಗಲ ಮಿತ್ ಬಾರಿ ಗರ್ವ ಇತ್ತುಂಡ್,ಗೂಂಜಿ ದೆಪ್ಪಂದನೆ ಮಾಯಣ  ಸಮೇತ  ತಿನ್ಯರೆ  ಕೊರ್ಯೆರ್ಗೆ . ಬ್ರಿಟಿಷೆರ್ನ ಗಡ್ದೋಗು ಮಾತಾ ಮಾಯನ ಅಂಟುದಾಯಿ  ಬೊಕ್ಕ ಅವೆನ್  ಒಚ್ಚರೆಗ್  ಒಂತೆ  ತೌಡು ಕೊರ್ಯೆರ್ಗೆ. ತೌಡು  ಗಡ್ದೋಗು  ಪತ್ತಿನವ್ವೆನ್ ದೆಪ್ಪೆರೆ  ತಬುರುದ ಪಟ್ಟುದ ಕೈತಾಲ್ ಉಂತರೆ  ಪಂಡೆರ್ಗೆ ........

ಹ್ಹ  ಹ್ಹ ಹ್ಹ  ಪರೆಂಗಿ  ಬೊಕ್ಕ ಜೀವ ಮಾನೋಡು  ಪೆಲಕಾಯಿ  ತಿನಯೇ !

ವಾಸ್ತು :

ಪೆಲತ ಮರ( ಮಾತಾ ಅಂಟು ಮಾಯಣದ ಮರಕುಲು ) ಇಲ್ಲದ ಮುಡಾಯಿ  ಬೊಕ್ಕ ಪಡ್ದಾಯಿ  ಬದಿಟ್ ಇಲ್ಲಗ್ ತಾಗುಲಕ್ಕ  ಬುಲೆವೆರೆಗ್ ಬಲ್ಲಿಗೆ. 

ಉಂದೆಕ್  2 ಕಾರಣ

 1)ಈ ಜಾತಿದ ಮರಕುಲು   ಆಕಾರೊಡು  ಮಲ್ಲೆ ಆದ ಬುಲೆವುನಾತ್ರ ಇಲ್ಲಗ್ ಕಾಂಡೆದ  ಬೊಕ್ಕ ಬೈಯ್ಯದ  ಸೂರ್ಯನ  ಕಿರಣಲೆನ್  ತಡೆಪುವ ಪಂಪಿನ  ಒಂಜಿ  ಕಾರಣ 

2) ಈ ಮರಕುಲೆನ  ಬೇರುಲು   ಬಲವಾದ್  ಬುಲೆದ್  ಇಲ್ಲದ ಗೋಡೆಗ್  ತೊಂದ್ರೆ ಆವು  ಪಂಪಿನ ನನೊಂಜಿ  ಕಾರಣ  

ಚಿತ್ರ  ಸಂಗ್ರಹ : ತುಳು ಕೊಪೆಲು