ನಾಯಿ ನುಪ್ಪುನುಂಡುಜಿ

ನಾಯಿ ನುಪ್ಪುನುಂಡುಜಿ

ಪುಟಿನೆಟ್ ತೂವಂದಿ ಮೋನೆ….

ತೂದು  ಕೊರೆತಿನ ತಪ್ಪು ದಾನೆ? 

ನುಪ್ಪು ದೀಯಿನ ಧನಿನ 

ಇಲ್ ಕಾತಿನ ಬೇಲೆಗ್  

ಈ ನಮೂನೆನಾ ನೆರ್ಪಣೆ?

‘ಲಕ್ಕಂಚಿ ನಾಯೆ ...! 

ಇಲ್ಲದಕ್ಲೆಗೇ ಕೊರೆಪುನಾ ?

ಕಣ್ ದಾನೆ ನಿನ್ನ ಪುಡದಿನಾ ?’

ಉಲ್ಲಾಯೆ 

ಕಡೆ ಕಾರ್ ಡ್  ದಂಟಿನ  ಬೇನೆ

ಜೀವೊಡು ಮಾಜಿಂಡಲಾ

ಮನಸುಡ್  ಒರಿಯಂದಿನನ ?

ಬತ್ತಿನಾಯೆ …. 

ಇನಿ ಮುಟ್ಟ  ಬರಂದಿ  ಮೆಗ್ಯೆಗೆ !

ಜಾಲ್ಗ್ ಕಾರ್ ದೀಪುಜಿಂದ್  

ಪೋತಿನಾಯೆ 

ಬತ್ತಿನನೆ ಮಲ್ಲ ಸೋದ್ಯಗೆ!

ಪರಿ ನೀರ್ ನ್  

ಪಾಡಿ ಕೈನ್ 

ಮೆಗ್ಯೆ ಮದತಿನಿ

ಇಲ್ - ಬಾಕಿಲ್ಗ್ 

ಗಡು ದೀಯರೆನೆ

ಪಲಯನಿಲ್ಲಗ್ 

ಇನಿ ಬೈದಿನಿ !

ಉಂಡಿ ನುಪ್ಪುನು ಮದತ್ 

ತುಂಡು ಭೂಮಿನ್ ನೆನೆತ್ 

ಮೆಗ್ಯೆ ಪಲಯೆ ಮಂಡೆ ಮಂಡೆ 

ಹಾಕೊನಿನಿ

ನುಪ್ಪು ತಿಂದಿನ  ನೆನೆತುದೆ

ನಾಯಿ ತೂದು

ತೂಯರಾವಂದೆ   ಕೊರೆತಿನಿ !

ದಂಟಿ  ಬೇನೆಗ್ ಬೊನ್ಯರಾಸಿಡ್ 

ಜೆತ್ತಿ ಬೊಗ್ಗುರೆ  ದಿನ ಇಡೀ 

ಮನಿತಿಜಿ

ತಿಂದಿನ ಮದತಿನಾಯೆ

ಎಲ್ಯಾಯೆ ಇಲ್ಲದಾಯೆ…

ನೆನೆತ್ ಕೊರೆತಿನಾಯೆ

ಬೊಗ್ಗುರೆ 

ನಿತ್ಯೊಗುಲಾ ನಾಯೆ!

ಧನಿ ದೀನ ನುಪ್ಪುನು

ಆನಿ ನಾಯಿ ತೂದುಲಾ 

ಉಂಡುಜಿ…,

ಉಂಡುಜಿ  ದಾಯೆಗುಂದ್ 

ಏರೆಡಲಾ

ಪಂಡುಜಿ !.