ದೈವದ ನುಡಿ

ದೈವಡ  ಪನೊಂಬಿನಿ  ಬೊಕ್ಕ ದೈವದ  ನುಡಿ

ಸ್ವಾಮಿ ಜುಮಾದಿಯೇ 

ದೈವಡ  ಎಂಕಲ್ನ ಸಂಕಲ್ಪ  ದಾದ ಪಂಡ

ಏರ್ದಿನಂಚಿನ ದೊಂಪಡಾವಡ್...

ಕೊಡತಿನಂಚಿನ ಬೊಂಡಡಾವಡ್

ಪಾಡಿತ್ತಿ ಪನಿಯಾರದಾವಡ್...ವಾ ರೀತಿದ
ತಪ್ಪು ದೋಷ ತಾಂಗ್  ಇತ್ತಿನಾಂಡಲ ಕಡಪ ರಾಜ್ಯೋಗ್ ಪಾಡ್ದು

ಜೋಕುಲ್ ಬಾಲೆಲೆಗಾವಾಡ್ ..ಕಂಜಿ  ಕೈಕಂಜಿಗಾವಾಡ್ 
ಸೀಕ್ ಸಂಕಡ ಬರಾಂದಿಲಕ್ಕ 

ಮೂಡಾಯಿ..ಪಡ್ದಾಯಿ.....ತೆಂಕಾಯಿ ...ಬಡಕಾಯಿ
ನಾಲ್ ದಿಕ್ಕುಗುಲ ವಾ ರೀತಿದ  ಕುಂದು ಕೊರತೆ ಬರಾಂದಿಲಕ್ಕ

ವಿಷ ಇತ್ತುಂಡ  ಕಡಪ ರಾಜ್ಯೋಗ್ ಪಾಡುದ್......ಅಮೃತ ಇತ್ತುಂಡ ಕುಟುಂಬೋಗು  ಕೊರ್ದು
ಈ ಊರುಗು ಬತ್ತಿನ ತುರ್ತುನು ನಿನ್ನ ಮಾಯೊಡು ಪರಿಯಾರ  ಮಲ್ತೊಂದು 

ನಮ ನಂಬಿನಂಚಿನ ದೈವ , ದುಂಬುಲ  ಬೇರಿಸಾಯ ಇತ್ತ  

ನನ  ದುಂಬುಗುಲ ಎಂಕ್ಲೇನ್ ಮಾತಾ
ರಕ್ಷಣೆ ಮಲ್ತೊಂದು  ಕಾತೊಂದು  ಬತ್ತಡ  ನಿಕ್ ಕೀರ್ತಿ ಬರು. 

ದೈವದ ನುಡಿ

ಊರುದ  ಅರಸುಲೇ ...ಗುತ್ತಿನಾರೆ, 
ಮಾತೆರ್ಲ ಬತ್ತು ಸೇರ್ದಾರ ?

ಪತ್ತಪ್ಪೆ ಬಾಲೆಲು ..ಪತ್ತಪ್ಪೆ ಜನೋಕುಲು

ಊರುದಕುಲು...ಪರ ಊರುದಕುಲು

ಸಂಸಾರ ಸಮೇತ  ಸೇರೊಂದು ಕೊರಿನಂಚಿನ

ವರ್ಸಾದಿ ನೇಮ.
ಎಡ್ಡೆ  ಗಳಿಗೆಡ್  ಯೇರ್ದಿನಂಚಿನ  ಭಂಡಾರ 

ಈಶ್ವರ ದೇವೆರೆನ ಪಾದೋಡು  ಜತ್ತಿನಂಚಿನ ಮಾಮಲ್ಲ ದೈವ

ಪೆತ್ತ ಪೋಯಿನ ತಾದಿಡ್  ಕಂಜಿ ಬರು ಪನ್ಪಿಲೆಕ್ಕ 
ಬೆರಿ ಬತ್ತಿ ಗಣಕುಲೆನ ಸಮೇತ 

ಮಾಯಾ ರೂಪೋಡು ಆಕಾಶ  ಬುಡ್ದು  ಭೂಮಿ ಸೇರ್ಯ  

ಸತ್ಯ ಗುಂಡ್ಡದ ಉಲಾಯಿ  ಮಾಯಗಾರೆ ಪನ್ಪಿನ  ಪುದರ್ಡ್ ಕುಲ್ಲಾಯರ್
ಭೂತ  ಮಂಚ ಬುಡ್ಡು  ದರ್ಶನ ಬಲಿಕ್ಕ್  ಬತ್ತೆ, 

ನಂಬಿನಕಲೆಗ್ ಬೋಡಿತ್ತಿನ.... ಬೋಡಾಯಿಲಕ್ಕ
ತಿಂಗೊಲ್ದ ಬೋಲ್ಪುದಂಚಿನ  ಪೇರುನ್ ಕೊರೊಂದು ಕಾತ್ಹೊಂದುಲ್ಲೇ..ಅತ್ತೆ ?

ಗುತ್ತಿನಾರ್: ಈ ಮಾಯಗಾರೆ,ಮಾತಾ ತೆರಿದಿನಾಯೇ,ನಿಕ್ ಪನೋಡಾಯಿನ   ಇಜ್ಜಿ ....

ಎನ್ನ ಸಂಸಾರ,
ಪೂತ ಇಸಲ್ ತೋಜಾಯಿನಕ್ಲೆಗ್ ಪೂತ ರಾಶಿ ತೋಜಾಯೇ
ನೀರ್ ಕೊರ್ನಲ್ಪ ಪೇರ್ ಉರ್ಕಾಯೇ
ಕೈ ಮುಗಿನಲ್ಪ  ತಿಗಲೆ  ಕೊರ್ದು  ಕಾತೆ 
ಪೆತ್ತ- ಕೈ ಕಂಜಿನ್ ಕಣ್  ದೀದ್  ಕಾತು  ಕೊರ್ಯೆ 
ಬುಲೆ -ಸಲೆನ್ ಯೆರ್ಕಾದು  ಕೊರಿಯೇ .
ಸಂಸಾರೋಗು  ಬರ್ಪಿಂಚಿ  ದಶ ದೋಶೋನು
ದಶದಿಕ್ಕುಗು ಪಟ್ಟುದು ಕೊರ್ಪಿನಂಚಿನ ಮಾಯೆ ಯಾನ್ .
ರುಂಡದ ಎಚ್ಚಿಡ್ ರುಂಡ
ತರೆತ್ತ  ಎಚ್ಚಿಡ್ ತರೆ ದೀಯೊಂದು
ಮಾಯೊಡು  ಬತ್ತಿನ ಶಕ್ತಿ  ಯಾನ್

ಗುತ್ತಿನಾರ್: ಅಂದಾಯಿ ಪಾತೆರ , ಗುಂಡದ ದೇವೆರ್ , ಮುಂಡೊನು  ಕಾಪುನ ವಿಚಾರ ಊರಿಗೇ  ತೆರಿದಿನ,, ನಿನ್ನ ಸಂಸಾರೋನು ಈಯೇ  ಕಾಪೋಡಾಯಿನ  ನಿಕ್ ಸೇರ್ದಿನ

 

ದೈವ ಕಾಪಡ್  ಪಂಡುದ್  ಕೈ ಮುಗಿಯರ್ 
ನಿಷ್ಟೇಡ್  ಸೇವೆ ಮಲ್ತೊಂದು  ಬತ್ತರ್ 
ಪೂರ್ತು  ಪೋರ್ತುಗು ಸರಿಯಾದ್ 
ಕೋಲ  ತಂಬಿಲ ಕೊರೊಂದು ಬತ್ತರ್ 
ಇನಿತ ದಿನ  ವರ್ಸಾದಿ  ನೇಮ 
ಒರಿಯಗ್ ಅಂದ್  ಒರಿಯಗ್ ಅತ್  ಪನಂದೆ 
ಏರ್- ಪೇರ್  ಉದ್ದ- ಕುದ್ಯ ತಪ್ಪು ತಾಂಗ್ 
ಇತ್ತುಂಡಲ  ಸಮ ಸರ್ಕೆ  ಮಲ್ತೊಂದು ಪೋವೆ 

ಸರ್ವೆರ್ಲಾ ಸೇರ್ದೆರತ್ತೆ ?
ಪತ್ ಮಾಗಣೆದಕುಲುಲಾ  ಸೇರೊಂದೆರತ್ತೆ ?
ಪತ್ತಿಲ್ಲಗ್ಲ   ಹೇಳಿಕೆ ಪೋತುಂಡತ್ತೆ 

ಸಮಗಾರಿಕೆನ ...
ಮಾತೆರೇಗ್ಲ ..ಸಮಗಾರಿಕೆನ?

ಗುತ್ತಿನಾರ್ : ಮಾತೆರೆಗ್ಲ  ಸಮಗಾರಿಕೆನೆ 

ದುಂಬುಡಿಂಚಿ  ನಡೊತೊಂದು ಬತ್ತಿನ ನೇಮ

ತೆರಿದೋ ತೆರಿಯಂದೇನೋ ಎರೇನ್ಲ ಮದತುಜರತ್ತೆ?
ಮಿತ್ತು ಬಡ್ತಿನ ಮುಟ್ಟುನು, ಕುಲ್ಲುದು ಲಕ್ದಿನ ಪಜೆನ್  ಮದತುಜರತ್ತೆ
ನರಮಾನಿ ಮದತುಂಡಲ ದೈವ ಮದಪರೆ ಬಲ್ಲಿತುಂಡು
ಪನ್ಪಿನ ಅಪಕೀರ್ತಿ ಎಂಕ್  ಎಲ್ಲೆ ಬರಂದತ್ತೆ ?

ಗುತ್ತಿನಾರ್ : ಯೆಂಕಲ್ನ ಜ್ಞಾನದ ಪ್ರಕಾರ ಮಾತೆರೆಗ್ಲಾ  ಹೇಳಿಕೆ ಆತುಂಡ್ ,ತತ್ ಪೋತಿನಕ್ಲೆನ್ ಲೆಪ್ಡಾವುನ  ನಿನ್ನ ಮಾಯೋಗು ಬುಡ್ತಿನ.
 

ಎನ್ನ ಸಂಸರೋನು ಕಾಪುನಂಚಿನ  ಭಾರ
ದೈವದ ಗಗ್ಗರದ ಸ್ವರ ಕೇನುಂಡತ್ತೆ 
ಗುತ್ತಿನಾರೆ ಎಂಕುಲು  ಲೆತ್ತಿಂಚಿನ ಗಳಿಗೆ
ವಿಷನ  ಅಮ್ರುತನ  ?
ಗುತ್ತಿನಾರ್: ಮಾಯಗಾರೆ   ಲೆತ್ತಿಂಚಿನ ಗಳಿಗೆ  ಅಮ್ರುತನೆ ಆವಂದೆ  ವಿಷ ಅವರೆ  ಸಾಧ್ಯ ಇಜ್ಜಂತಿನ
ಗುತ್ತಿನಾರೆ
ನಿಗುಲು  ಚಿತ್ತ ಒತ್ತಟ್  ಆದ್  ಒರಿಯಗೊರಿ  ಬೆರಿಸಾಯದ್  ಅತ್ತಿಮಿತ್ತಿಡ್
ಕೂಡು ನಡಪುನಂಚಿನ   ಗಳಿಗೆಡ್

ಕೊರಿಸೆವೆನ್ ಸಂತೋಶೋಡು  ಸ್ವೀಕಾರ ಮಲ್ಪುನಂಚಿನ ಕೀರ್ತಿ ಪೋರ್ತು

ಸೇವೇನ್ ಕೊರ್ಪಾವ್ನುವೆ....ಸೇವೇನ್ ಕೊರ್ಪಾವೊನುವೆ !!.
ಕೊರಿಂಚಿತ್ತಿ  ನೇಮೊನು   ಸಂತೋಸೊಡು  ಒಪ್ಪಿಸಾವೊಂಡೆ.!!

ಗುತ್ತಿನಾರ್: ಯೆಂಕುಲು  ಕೊರ್ನಂಚಿನ  ಅತ್ಯಲ್ಪ ಸೇವೆನ್ ಧಾರಾಳ ಮಲ್ತೊಂದು  ಸ್ವೀಕಾರ ಮಲ್ತ  
ನಂಬಿ ದೈವ ಕೈ ಬುದಾಂಡ್  ಪನ್ಪಿನವ್ವೆನ್  ತೋಜ ಕೊರಿಯ
ಕೀರ್ತಿ ಬರು- ಕೀರ್ತಿ ಬರು 

ಬೊಬ್ಬರ್ಯೇ:

 

                                                                                                ಕೃಪೆ :ಸ್ಪಂದನಾ  ಚಾನೆಲ್ 

ಗುಳಿಗ ದೈವ: 

 

                                                                                              ಕೃಪೆ :ಸ್ಪಂದನಾ ಚಾನೆಲ್