ಕುಪುಲು ಪಕ್ಕಿ ...ಕೂರುನಗಲೆಗ್ ಒಂಜಿ ಅಡ್ಡ ಪುದರ್

ಕುಪುಲು  ಪಕ್ಕಿ .

ತುಳುನಾಡುದ  ಜನೋಕುಲು  ಹುಷಾರ್ , ಬುದ್ದಿವಂತೆರ್ ,ಚುರುಕ್  ಪನ್ಪಿನ  ನಿತ್ಯ ಸತ್ಯೇ . ಮುಲ್ಪದ ಜನೋಕುಲು  ಮಾತ್ರ ಅತ್  ಪ್ರಾಣಿ ಪಕ್ಷಿಲು  ಮಾತಲ ಚುರುಕುದವೇ .ಕಕ್ಕೆ,ಮುಂಗುಲಿ, ಕುದ್ಕೆ , ಕೋರಿ, ಚನಿಲ್ ,ಪುಂಡದೆ ಇಂಚ.
 ನೆಕ್ಲೆಗ್  ಒಂಜಿ ಅಪಾವಾದ ಪನ್ಪಿಲಕ್ಕ  2 ಪಕ್ಷಿಲು  ತುಳುನಾಡುಡ್  ಉಲ್ಲ .

ಒಂಜಿ.....ಪಗೆಲಿಡಿ  ನಿದ್ರೆ ಮಲ್ತುದು  ರಾತ್ರೆಗ್ " ಗೂ ಗೂ"  ಪಂಡುದ್ ಗೂರುನ ಗುಮ್ಮೆ  ಪಕ್ಕಿ....
ಬೊಕೊಂಜಿ ಬರ್ಸೋಗು ಯಾಪಲ " ಕೂರುನ"  ಕುಪುಲ್ ಪಕ್ಕಿ.

 ಚಿತ್ರ ಕೃಪೆ : ಸೌಮ್ಯಾ 

ಕುಪುಲು  ಪಕ್ಕಿ,ಕೆಂಪು ಕಣ್ ,ಕಂದು ಬಣ್ಣದ ರೆಕ್ಕೆ, ಉಲಮೈ ಕಪ್ಪು  ಇತ್ತುದು ತೂಯರೇ ವಂತೆ  ಪೊರ್ಲುದ ಪಕ್ಕಿ ಆಂಡಲ   ಬಾರಿ  ಕೂರOಟೆಲ್. ಐತಾ  ದೇಹ ಪ್ರಕೃತಿಯೇ ಬೆರಿ ಬಗ್ಗುದಿನ ಕೂರು ರೂಪ  . ಮರಿಯಲದ ಪೊರ್ತುಗು ಅವ್ವು ತಾರೆದ ಮಡಲ್ ದ  ಮಿತ್ತ್  ಬರ್ಸೋಗು ನನೆವೊಂದು ಕೂರೊಂದು ಕುಲ್ಲುನ ತೂಯರ್ಡ ನಮಕ್ಲ  ಇಲ್ಲದುಲಾಯಿ  ಅಡೆಗೆ ಕೊಟ್ಟು ಒಯಿತು ಜೆಪ್ಪುಗ ತೊಜುಂಡು!.

ಈ ಪಕ್ಕಿನ್ ತೂದು   ಕೆಲವು ಉಪಮೆಲು, ಕತೆಕುಲು  ಉಂಡು....

"ಈ ದಾನಿಂಬೆ  ಕುಪುಲ್ ಪಕ್ಕಿದಲಕ್ಕ   ಕುಲ್ಲುದಿನಿ"

ಇಂಚ ಪಂಡೇರ್ಡ  ಬೇಲೆ ಕಲ್ವೆ  ಪಂಡುದಾ ,ಪ್ರಯೋಜನ ಆವಂದಿನಾಯೇ ಪಂಡುದಾ,ಕಾಲಿ  ಕುದೊಂದು ಆಲೋಚನೆ ಮಲ್ಪುನಾಯೆ ಪಂಡುದಾ ಅರ್ತ.

"ಆಯೇ ಮಲ್ಪುವೆ ಪಂಡುದ್ ಕುಪುಲ್ ಪಕ್ಕಿದಲಕ್ಕ ಕಾತು ಕುಲ್ದನಾ ?"

ಪಂಡ  ಇರೆನ ಬೇಲೆ ಆಯಿಲಕ್ಕನೆ..ಪೋಕ್ಕಡೆ ಕಾತು  ಕುಲ್ದರ್..ದಂಡ.... ಪಂಡುದ್ ಅರ್ತ.

"ದಾನೆ ಕುಪುಲ್ ಪಡ್ಕೆ ಮೈದುಂಡಾ ?"

 ಪಂಡ ...ಉದ್ದಾರ   ಆಪಿಲಕ್ಕ ಇಜ್ಜಿ ಪಂಡುದ್  ಅರ್ತ .ಕುಪುಲ್  ತಾರೆದ  ಸಿರಿಕ್  ಪಡ್ಕೆ ಮೈತುಂಡ ತಾರೆದ ಮರ ಸೈಪುಂಡು ಪನ್ಪಿನ  ನಂಬಿಕೆ  ಉಂಡು . ಅಂಚ ಕುಪುಲ್ ಪಡ್ಕೆ ಮೈತುಂಡ  ಬದುಕುನು ಕಷ್ಟ...ಉದ್ದಾರ ಆಪಿನಿ ಕಷ್ಟ  ಪನ್ಪಿನ ಅರ್ತ .

ಇಂಚ ಕುಪುಲುಗ್  ಸಂಬಂಧ  ಪಟ್ಟಿನ ಮಾತಾ ಪಾತೆರೊಲು ಎಡ್ಡೆಗ್  ಪನ್ಪಿನ  ಪಾತೆರೋಲು ಅತ್.

ಒಂಜಿ ಅಜ್ಜಿ ಕತೆ ಕೇನ್ಲೆ...

ಕುಪುಲ್ ಪನ್ಪಿನ ಒಂಜಿ  ಪೊಣ್ಣು  ಮಗಲ್  ಬೆನ್ನಿ ಬೆನೊಂದು ಉಪ್ಪುನಗ  ಕೂಕುರ್ ಶೆಟ್ರು  ಪನ್ಪಿನಾರ್  ಅಲೆಡ  2 ಮುಡಿ  ಬಾರ್  ಬಿತ್ತುಗು ಪಗತೆಗ್   ದೆತೊಂಡೆರ್ಗೆ . ಬರ್ಪಿ ಕಾರ್ತಿ  ಬೆನ್ನಿ ಮುಗಿ ಬೊಕ್ಕ   ಪಿರ ಕೊರ್ಪೆ ಪಂಡೆರ್ಗೆ . ಕಾರ್ತಿ ಬೆನ್ನಿ ಮುಗಿದ್ ಸುಗ್ಗಿ, ಕೊಳಕೆ  ಕರೀಂಡ ಲಾ  ಪಿರ ಕೊರ್ಪಿನ  ತೋಜುಜಿ .  ಕೇಂಡಲಾ  ಸುದ್ದಿ ಇಜ್ಜಿ...

ಕುಪುಲ್  ಉಂದೇ  ಬೇಜಾರ್ಡ್  ಸೈತು  ಪೋಯಲ್ಗೆ . ಕುಪುಲ್ ' ಪಕ್ಕಿ' ಆದ್  ಪುಟುದು  ಕೂಕುರ್ ಶೆಟ್ರೆನ ಬೆರಿ ಪತ್ತುದು ಇತ್ತೆಲಾ  ಕೇನೊಂದೆ ಉಲ್ಲಾಲ್ಗೆ .

"ಕೂಕುರ್ ಶೆಟ್ಟೇ   ...ಕೊರೂ  ಕೊರೂ .."

ನನೋರ ಕುಪುಲ್ ಕಲ್ಕುನಗ.......ಕೇನ್ಲೆಗೆ  !
ಹಾಂ  ಅಂಚನೆ ಕೇನಿಲಕ್ಕ  ಆಪುಂಡು.....ಕೇನ್ದು  ಒರ ಪನ್ಲೆ..!!
                                                                                               

                                       ಉಜಿರೆದ ಪ್ರಾಣಿ ಪ್ರಿಯೆ ಜೋಯ್ ಮಸ್ಕರೇನಾಸ್:( 9743432626)  ಗುಂಮೆ ಪಕ್ಕಿದೊಟ್ಟುಗು 
                                                                                                                                                                

ಕುಪ್ಪುಲ್ (coucal)

 

 

ಉಂದೆನ್  ಓದಿನ  2 ಜನ ಕುಪುಲ್ದ  ಪರವಾದ್   2 ವಿಷಯ ತೆರ್ಪಾದೇರ್:

1) ಶಿರ್ವದ  ಜಗದೀಶ್ ಶೆಟ್ಟಿ ಅರ್ ಕಿನ್ನಿ ಇಪ್ಪುನಗ  ಪನೊಂದಿತ್ತಿನ   ಒಂಜಿ  ಪದ  ನೆನಪು ಮಲ್ತೊಂದು ಪಂತೆರ್ 

"ಕುಪ್ಪುಲೋ ಕುಪ್ಪುಲೋ ನಿನ್ನ ಕಂಡನೆ  ಬಡು  ಪತೊಂದು-  ಬೆರಿ ಪತೊಂದು  ಬರೊಂದುಲ್ಲೇ....ದೆಂಕ್ಕುಲ್ಲು  ದೆಂಕುಲ್ಲು !!"

2) ಉಡುಪಿಡ್  ಇಪ್ಪುನ ಏಕನಾಥ್   ಶೆಣೈ  ಈ 2 ವಿಚಾರ ತೆರಿಪಾಯೇರ್

• ಕಂಡೋಡಿ ಹಾವು ಕಿನ್ನಿ ದೀನಗ ಸಾರ ಕಿನ್ನಿ ದೀಪುಂಡುಗೆ ....ಅದಗ ಕುಪುಲುಗ್ ಕನ ಕನಕಟ್ಟುಂಡುಗೆ.... ನಾಡೊಂದು  ಬತ್ತ್ ದ್ ಕಂದೋಡಿದ ಕಿನ್ನಿಲೆನ್ ಪೂರಾ ತಿನ್ಪುಂಡುಗೆ... ಒಂಜಾ- ರಡ್ಡಾ ದಾನ್ನಾ ಒರಿವಗೆ ..... ಇಜ್ಜಾಂಡ ಮಿನಿ  ಊರಿಡೀ ಕಂದೋಡಿದ ಸಂತಾನ ಅವು , ಪಂಡ್ ದ್ ನಮ್ಮ ಹಿರಿಯೆರ್ನ ಅಭಿಪ್ರಾಯ ...
• ಕುಪುಲ್ದ ಗೂಡುಡ್  ಸಂಜೀವಿನಿ ಕಡ್ಡಿ ಉಂಡುಗೆ  ಅಯ್ಟ್  ಸೈತಿನಕ್ಲೇನ್ ಬದುಕಾವೆರೆ  ಆಪುಂಡು ಗೆ ಪಂಪಿನ ನಂಬಿಕೆ ಉಂಡು ಪನ್ಪೆರ್

ಸೊಲ್ಮೆಲು ಜಗದೀಶ್  ಬೊಕ್ಕ ಏಕನಾಥ್ 

 ..ಶಾಂತಾರಾಮ್ ಶೆಟ್ಟಿ