ಕರಿಯಜ್ಜೆರ್ ತೀರಿಯೆರ್…!

ಕರಿಯಜ್ಜೆರ್ ತೀರಿಯೆರ್…!

 ದಂಟೆದ ಕರಿಯಜ್ಜೆರ್

ಇಂಚಪ್ಪ ತೀರಿಯೆರ್

ಕೋಡೆ ಮೊರಣಿ

ಒಟ್ಟುಡಿತ್ತಿನಾರ್

ಊರಿಡಿ ತಿರುಗೊಂದಿತ್ತಿನಾರ್ 

ನನ ತೂಯೆರೆನೇ ತಿಕ್ಕುಜೆರ್ !

ಕರಿಯಜ್ಜೆರ್  ಬಣ್ಣೊಡ್ 

ಒಂತೆ  ದಿಂಜನೇ   ಕಪ್ಪು

ಕಾರ್ತೆಲ್ದ ಕರಿ ಮುಗಲ್….

ನೆರೆಕರೆತ  ಕಷ್ಟೋಗು

ಆರಾದ್ ಬರುವೆರ್

ನೀರಾದ್ ದೊರಿವೆರ್ !

ತುಂಡು ಮುಂಡುಲಾ 

ಕರಿಮರತ ದಂಟೆಲಾ

ಕರಿಯಜ್ಜೆರೆನೆ ಸೊತ್ತು 

ಕಾಸಿಜ್ಜಂದಿ  ಬದುಕ್ 

ಬದುಕಿನೆಂಚನ ಅವು

ಕರಿಯಜ್ಜೆರೆಗೇ ಗೊತ್ತು ?!

ಆಪಿನಾರ್ -ಪೋಪಿನಾರ್ 

ಊರೊರ್ಮೆ ಸಂದುನಾರ್

ನಮ್ಮ ಕೇರಿದ ಗಾಂಧಿಯೇರ್

ಕೋಂಕಯೆರ್-ಕೂಂಕಯೆರ್ 

ಕಾಂಕಯೆರ್-ಕೇಂಕಯೆರ್ 

ನಡಪನಗ ಕಾರಡಿಟ್

ಪಿಜಿನುಂಡಾ ತೂವೆರ್ !

ಕರಿಯಜ್ಜೆರೆ ಆಸ್ತಿಗ್ 

ಅಗರಿಜ್ಜಿ ಪಗರಿಜ್ಜಿ

ಇಲ್ಲ ಬಾಕಿಲ್ಗ್ ಬೀಗಪಲ್ಲೆನೆ ಇಜ್ಜಿ   

ಒಂಜೆ ಬಟ್ಟಲ್ ದೀತಿನಾರ್

ಮಾತೆರೊಟ್ಟುಗೆ ಉನ್ತಿನಾರ್

ಇತ್ತಿನಾತೆನ್ ತಿಂತಿನಾರ್

ನಂಜಿ ನುರೆ ಕುರೆ ದಾಂತಿ

ಕರಿಯಜ್ಜೆರ್  ಒಂಜಿ ದಿನ

ದಡ್ಕಬೂರ್ದು ದಿಡ್ಕ ತೀರಿಯೆರ್ !

ದೂಲೊಪ್ಪದ ದಿನಾ 

ಜಾಲ್ ಡಿತ್ತಿನಿ ನಾಲೇ ಜನ 

ಬೊಜ್ಜದುನಸ್ ಉನ್ಪುಜೆರ್ 

ಇತ್ತೆದ ಪೊಸ ಜವನೆರ್

ಮಡೆಪಿ ಬೊಜ್ಜೊಗು ಜಾಲ ನಿಲ್ಕೆ ನಲಿಕೆ 

ಅಮಲ ನೀರುಗ್  ಕೋರಿ ಕಾರುಗ್

ಇಜ್ಜಾಂಡ್ ಯೆ ಬಲಕೆ !

ತೆಲಿಕೆ ನಲಿಕೆದ

ಜೀವ ಸೆಲೆಕೆದ 

ಅಂಕು ಕೊಂಕು

ಬಿಂಕ  ಇಜ್ಜಾಂದಿ

ಬಂಗಾರ್ ಕರಿಯಜ್ಜೆರ್

ತೀರಿನಪಗ ತೀರ್ದುಜೆರ್ 

ಮಿತ್ತುಡಿತ್ತುದೆ

ನಿಲ್ಕ ನಿಲ್ಕ ನಿಲ್ಕೊಂದಿತ್ತೆರ್

ಕಣ್ಣಮಲಕ ತೂವೊಂದಿತ್ತೆರ್ !

ಕರಿಯಜ್ಜೆರೆ ಬೊಜ್ಜದಾನಿ

ತಿಗಲೆ  ಗುದ್ದುನ ದೋಲು 

ಕೆಬ್ಬು ಕೆಪ್ಪುದ  ಗರ್ನಾಲ್

ಅಲ್ಕ್  ಬೂರುನ

ನೆರಕರೆತ ಪುರುಬಾಲೆ

ನೆಲಕ್  ಬೂರುನ 

ಅರೆಬರೆತ ಅಮಲ್ ಜನಕುಲೆ

ದೊಂಬರಾಟದ

ಸಾವು ಕೂಟೊನು ತೂದು 

ಕರಿಯಜ್ಜೆರ್  ದಿಗಿಲಾಯೆರ್

ಬತ್ತಿ ಜನ ಮುಗಲಾಯೆರ್!

ಕರಿಯಜ್ಜೆರ್

ತುಂಡು ಬೈರಾಸುಡ್ 

ಕಣ್ಣ ನೀರ್ನೊಚ್ಚೊಂದು

ಅಲಕ ಅಲಕ ಬುಲ್ತೊಂದಿತ್ತೆರ್

ಸೈಯ್ಯ ಮುಟ ಬದುಕುನಕುಲು

ಪಾಕ ಜನ ಉಪ್ಪೆರ್

ಸೈತಿಬೊಕ್ಕಲಾ 

ಬದುಕೊಡಿಂದಿತ್ತಿನಾರ್  ಕರಿಯಜ್ಜೆರ್

ಕರಿಯಜ್ಜೆರೆ ತಾದಿನ್ ಜನ  

ಬೊಜ್ಜದಾನೆ ಮದತೆರ್

ಸತ್ವ-ತತ್ವದ ಕರಿಯಜ್ಜೆರೆನ್

ದೋಲುಗುದ್ದುದು ಕೆರಿಯೆರ್ !

ಕರಿಯಜ್ಜೆರ್ ನಡತಿ ಜಾಗೆಡಿತ್ತೆ  

ಪಂಚರಂಗಿ ಪಂತಿಕೊಡಿದುಂಡ್

ಪಿರವುಡೇ

ಬಲಿ ಬರೊಂದಿತ್ತಿನ 

ಕರಿಯಜ್ಜೆರ್ನ ನುಪ್ಪು ತಿಂದಿನ

ಕಪ್ಪು ನಾಯಿಲಾ….

ಇತ್ತೆ ತೊಡಮೆ ಲಾಗ್ಯೊಂದು

ಸೊಂಟ ತಿರ್ಗಾವೊಂದು

ಅಡ್ಡ ತಾದಿಡೆ ಪೋವೊಂದುಂಡು !!