ಪರ್ಬ ತುಡರ್ ..ಪರ್ಬ ತುಡರ್ ....

ನರಮಾನಿ  ನರಮಾನಿಗ್ ಮರ್ಯಾದೆ ಕೊರ್ಪಿನ ಸಾರ್ವಕಾಲಿಕ ಶಾಸ್ತ್ರ ..ಮಾತಾ ಕಡೆಟ್  ನಡೊತೊಂದೆ   ಬೈದಿನಾ .

ಅಂಡ  ನರಮಾನಿ  ಕಲ್ಲುಗ್ ಮರ್ಯಾದಿ ಕೊರ್ಪಿನ ,ಮಣ್ಣುಗ್ , ಮರಕ್ಕ್ ,ಗಿಡಕ್ ಮರ್ಯಾದಿ ಕೊರ್ಪಿನ ತೂತರ....?

ತೆರಿಯೋಡಾಂಡ  ತುಳುನಾಡುಗೊರ ಕಾರ್  ದೀಯೋಡು ..

ನಡಪನಗ ಕಾರ್  ದೀನ  ಕಲ್ಲು  ಸಾಮಾನ್ಯದ ಕಲ್  ಆದಿಪ್ಪಂದ್ ...ರಾಹು ಕಲ್ಲು ಆದಿಪ್ಪು,ಬಬ್ಬರ್ಯ ಕಲ್  .ನಾಗನ ಕಲ್ಲು ಆದಿಪ್ಪು ...
ತೊರ್ತಿನ  ಮಣ್ಣು...ಖಾಲಿ  ಮಣ್ಣಾದಿಪ್ಪಂದ್ ..ಪುಂಚದ  ಮಣ್ಣಾದಿಪ್ಪು...
ನೆರೆಲ್ಗು  ಕುಲ್ಲುದಿನ ಬನ  ಬಜಿ  ಬಲ್ಲೆ ಆದಿಪ್ಪಂದ್ .....ನಾಗ ಬನ  ಆದಿಪ್ಪು ....

ಅಂಚ...... ಕಾರ್ ದೀಪಿನಲ್ಪಜಾಗ್ರತೆಡ್  ತುಳುನಾಡುದ ಕ್ರಮ ತೆರ್ಯೊಂದು ನಡಪುನ ಬಾರಿ  ಮುಖ್ಯ .
 
ತುಳುವೆರ್ ಪ್ರಕ್ರುತಿನ್  ದೇವೆರೆಂದೇ  ತೆರಿಯೊನಿನಕುಲು ,ಕಲ್ಲುಗು ಪೂಜೆ ಮಲ್ತೆರ್,ಮರಕ್ಕ್  ಪೂಜೆ ಮಲ್ತೆರ್ ,ನೀರುಗ್ ಪೂಜೆ ಮಲ್ತೆರ್ ...ದುಂಬುಗು ಒರಿಪಾವೊಂದು  ಪೋಡು  ಪನ್ಪಿನ   ಮುಂದಾಲೋಚನೆಡ್  ನಡತೆರ್ .
ನಾಗಗ್ ತಂಪು ಬೋಡು  ಪಂಡುದ್  ಬನ  ಕಟ್ಟಯೇರ್ ..ಕಾಡ್  ಕಡ್ಪೆರೆ ಬಲ್ಲಿ  ಪಂಡೆರ್...ತಂಪು ನಾಗನ ಪುದರ್ಡ್ ನರಮಾನಿಗ್   ಪನ್ಪಿನ  ಕಣ್ಣುಗ್  ತೋಜುನ   ಸತ್ಯ.

 ಅಶ್ವಥ ,ತುಳಸಿ ,ತಾರೆದ ಮರ, ಕೈಬೇವು,ಉರ್ಕಿ,ಜಗ್ಮ    ಇಂಚ   ಕಣ್ಗ್  ತೋಜಿನ   ಮರಕುಲೆನ್,ಗಿಡಕುಲೆನ್  ದೇವೆರ್ಲಕ್ಕ ಪೂಜೆ ಮಲ್ತೆರ್ ,
ನರಮಾನಿಲಕ್ಕ  ಪ್ರಾಣಿಲು   ಪಕ್ಕಿಲು  ಪಂಡುದ್  ನಾಗನ್  ,ಪೆತ್ತೋನು,ಕಕ್ಕೆನ್ ,ಗಿಡಿನ್ , ಚನಿಲ್ನು ,ಮಂಗೆರ್ಲೆನ್  ರಕ್ಷಣೆ ಮಲ್ತೆರ್.ಸ್ಥಾನ  ಕೊರ್ಯೇರ್,ಮಾನ ಕೊರ್ಯೇರ್...

ಮಾನಾದಿಗೆಗ್  ಪುದರ್ ಪೋಯಿನ ಊರು ತುಳುನಾಡು....ಮರ್ಯಾದಿಗ್  ಜೀವ ಕೊರ್ಪಿನಕುಲು  ತುಳುವೆರ್....

ಮರ್ಯಾದಿ ಕೊರ್ಪಿನಾಂಡಲ ಎಂಚ....?

ಕಾರ್ ದೆಕ್ಕೆರೆ  ತಂಕುಲೆ  ಉಂತುದು ನೀರ್ ಮೈಪೇರ್, ಅಸರ್ಗು  ಬೊಂಡ ಕೊರ್ದು  ಮರ್ಯಾದಿ ಮಲ್ಪೆರ್, ವನಸುಗ್ ಕೋರಿ ಅಡ್ದು  ರೊಟ್ಟಿ ಬಲಸೆರ್  ...

ನನಾತ್  ದುಂಬು ಪೋದು  ಕೊಂಬು - ಚಂಡೆಡ್  ,  ದಂಡು - ಬಿರ್ದಾವಲಿಡ್ , ಕುಲ್ಲದ್ ಮೆರವಣಿಗೆ ಮಲ್ಪೆರ್ ....
 ಆಂಡ ....
ಮನಸುಗ್  ಬಾರಿ ಮುಟ್ಟ ,ಆಪಿನ, ಗೌಜಿ ಗಮ್ಮತ್ ದಾಂತಿನ ,ಮರ್ಯಾದಿಡ್  ಎದ್ಕೊನುನ ,ಸೊಲ್ಮೆ ಸಂದಾವುನ

 ನನೊಂಜಿ  ಕ್ರಮ ಉಂಡು ....

ಅವ್ವೆ ತುಡರ್ ತೊಜಾವುನ ಕ್ರಮ ....

ಪೂಸ ಮದಿಮಾಲ್ ಇಲ್ಲದುಲಾಯಿ ಬನ್ನಗ ....ತುಡರ್ ತೋಜಾದ್ ಪನುವೆರ್....."ಇಲ್ಲಗ್ ತುಡರಾದ್  ಬಲ್ಲ ಮಗ ...!"
ಬಿರ್ದುದ ಬಂಟೆ   ಪೆಟ್ಟುದ  ಕಲೋಕು ಪೋನಗ.......ತುಡರ್ ತೋ ಜಾದ್ ಪನುವೆರ್......"ಊರುಗು ತುಡರಾವೋಡು ಬಂಟ  !"

ತುಡಾರ್ ತೊಜಾವುನು...   ಇಂಚಿನ ವಿಶೇಷ ಪೊರ್ತುಲೆಡ್  ಮಾತ್ರ .
ದೀಪಾವಳಿದ   ಗದ್ಡುದ  ನಡುಟ್  3 ದಿನಾಲ   ಈ ಕ್ರಮ   ಶಬ್ದ  ದಾಂತೆ ಪ್ರತಿ ಬೆನ್ನಿದಿಲ್ಲಾಡ್ ನಡಪುಂಡು ...
ದಿನತ , ಪರ್ಬದ ಮಾತಾ ಕ್ರಮ ಮುಗಿ ಬೊಕ್ಕ  ಇಲ್ಲದ ಯಜಮಾನೆ  ಮುಗುಳಿ  ತಿಪ್ಪಲ್  ದೀಪಲೇನ್  ಒಂಜಿ ಹರಿವಾನೊಡು , ಬಜ್ಜೈ  ಬಚ್ಚಿರೆದೊಟ್ಟುಗು   ದೀದ್ , ಎದುರ್ಡು  ಇಲ್ಲದ ನನೊರಿ ಆನ್ ಮಗೆ   ಚೆಂಬುಡು  ತೀರ್ತ ನೀರ್ ಪತೊಂದು ಕುಕ್ಕುದಿರೆಟ್
ಅವೆನ್ ತಲ್ತೊಂದು ಸಾದಿ ತೊಜಾವೊಂದು ಪೋಯೆರ್ಡ ,ಯಜಮಾನೆ ಪಿರಾವುಡೆ ......'ಪರ್ಬ ತುಡರ್ ..ಪರ್ಬ ತುಡರ್'  ಪನೊಂದು ಇಲ್ಲದ ಮೂಲೆ ಮೂಲೆಗ್ಲ ಸುತ್ತು ಬರುವೆರ್ .......

ಯೆರೆಗ್ ಈತ್ ಮಾತಾ ಮರ್ಯಾದೆ  ತೊಜಾವುನು ...?

 ನೋಪಂದೆ ಕಾಪುನ ಇಲ್ಲದ ಕುಲದೈವೆರೆಗ್ ,ದಿನ ನುಪ್ಪು ಕೊರ್ಪಿನ  ಅಡಿಪಲೆಗ್ ,ಸುಖ ನಿದ್ರೆ ಕೊರ್ಪಿನ  ಚಾವಡಿ ,ಕೋಣೆ ಲೆಗ್, ಬುಲೆ  ದಿಂಜ ದೀಯೊಂದು ಕಾಪುನ  ತಿರಿ-ಪೊಲಿಕ್  , ಕೈ -ಬಾರ್ದ  ಪೆಟ್ ತಿಂದು  ಸೋದಿನ ಪಡಿಮಂಚಾಗ್,ಭೂಮಿ ಅಪ್ಪೆನ್ ಮಟೆಲ್  ಸಿಗುತುದು ಬಲೆ ಬುಲೆಪಾಯಿನ ನಾಯೆರ್ಗ್, ಬೇಧ ಯೆನ್ನಂದೆ  ಏರುತ ನಡುಟ್ ಸರಿ ಸಮ  ಭಾರ  ಪಟ್ಟಿನ  ನೊಗಕ್,ನೆಲ- ಸಲಕೆ ಮಂತಿನ   ಪಲಾಯಿಗ್ ,ಅರಿ ಬಾರ್ ಗೋರಿನ  ಕೈ ಪಣೆಕ್ ,ಲೆಕ್ಕ ತಪ್ಪಂದೆ  ಲತ್ತಿನ ಕಲಸೆಗ್-ಕೊಲುಗು-ಸಿದ್ದೆಗ್-ಸೇರುಗ್, ನೈ ಪೇರ್ ಕೊರ್ದು  ಬಂಜಿ ದಿಂಜಾಯಿನ  ಪೆತ್ತ  ಕೈ ಕಂಜಿಗ್, ಅಸರಾಯೆರೆ  ಬುಡoದೆ            ಬುಲೆ ಸಲೆಕ್ ನೀರ್ ಕೊರ್ನ  ಗುವೆಲ್ಗ್ , ಉಪ್ಪಡ್ಡ ಅಂಡೆಗ್,ನೀರುದ ಮಂಡೆಗ್ ...ತಾರೆದ-ಬಾರೆದ  ಕಂಡೆಗ್....

ಚಿತ್ರ : ಸಂಗ್ರಹ 

ಒಯಿಕುಂಡು-ಒಯಿಕಿಜ್ಜಿ ಪನ್ಲೆಗೆ .......?

ಮಾತಾ ದಿಕ್ಕುಲೆಗ್ ಸೊಲ್ಮೆ ಸಂದಾಯಿ ಬೊಕ್ಕ ,ಕಡೆಕ್ಕ್   ಅವೆನ್ ಬಾರ್ದ   ರಾಸಿದ ನಡುಟ್  ಗೆಯ್ಪೆ  ಮಲ್ತುದು ದೀದ್   ಕೈ ಮುಗಿವೆರ್ .

ನಮ್ಮ ಹಿರಿಯೆರ್   ಈ ಪ್ರಕೃತಿ  ಅಪ್ಪೆನ ಕಣ ಕಣೋಕುಲ   ಮರ್ಯಾದಿ ಕೊರೊಂದಿತ್ತೆರ್........

ಅಗಲೆನ ಈ ಮಲ್ಲ ಗುಣದ್ದಾವ್ರ  ಇನಿ ಮುಟ  ಆ  ಭೂಮಿ ಅಪ್ಪೆನ    ಮೊಕೆಡುಲ್ಲ  ನಮ  .
ಅವೆನ್ ಕಾತೊಂದು...ದುಂಬುದಕ್ಲೆಗ್  ಯೆತ್ತಾವುನ  ನಮ್ಮ ತರೆತ  ಮಿತ್ತುಂಡು....!
ದೀಪಾವಳಿ  ಪತಿ ವರ್ಷ  ಬರ್ಪುಂಡು -ಪೋಪುಂಡು ..ಪರ್ಬದ ಆಚರನೆದ  ಮಹತ್ವೊನು  ತೆರಿಯೊಂದು  ವರ್ಷ ಇಡಿ  ಅವೆನ್  ಪಾಲನೆ  ಮಲ್ತೊಂದು ನಮ ಮಾತೆರ್ಲ  ಸುಕೊಟು  ಉಪ್ಪುಗ.....

ಬಲೀಂದ್ರ ..ಬರ್ಪಿವರ್ಸಲಾ  ......  ಬಲ್ಲ ....ಕಾತೊಂದು ಉಪ್ಪುವ ....ಕೂ ....ಪಾಡರೆ.. ...!