ಬಲೀಂದ್ರ ನ್ ಪಾತೊಲೊಗು ನೂಕುನಂಚಿನ ತಪ್ಪು ದೇವೆರ್ ಮಲ್ಪೊಲಿಯಾ....?

ಯೆಂಕ್ಲು  ಎಲ್ಯ ಉಪ್ಪುನಗ  ದೀಪಾವಲಿದಪಗ  ಅಜ್ಜಿಡ  ಕೆನೊಂದಿತ್ತ...

"ಅಜ್ಜಿ ದೀಪಾವಲಿದಾನಿ  ಬಲೀಂದ್ರ ಗ್  ಪೂಜೆ  ಮಲ್ಪುನು ದಾಯೆ ...ಆಯೇ ರಕ್ಕಸೆ ಅತಾ ...?"

ಯೆಂಕಲ್ನ  ಅಂದಾಜಿಗ್    ರಕ್ಕಸೆ ಪಂಡ  ದೇವಿ ಮಹಾತ್ಮೆದ  "ಮಹಿಶಾಸುರೆ" ಲಕ್ಕ.....ಅಡೇಗೆ ಚಡ್ಡಿ ಚಂಡಿ ಅವೊಂದಿತ್ತಿನ ನೆನಪು ! .

ಅಜ್ಜಿ ಪನುವೆರ್ ...

"ಜೋಕ್ಲೇ  ಬಲೀಂದ್ರೆ  ರಕ್ಕಸೆ ಜಾತಿಡ್  ಪುಟುಂಡಲಾ   ಮಹಾ ದಾನಿ,  ಎಡ್ಡೆ ರಾಜೆ ..ಆಯನ ಕಾಲೋಡು ಬುಲೆ - ಸಲೆ  ಮಾತಾ ಬೋಡಾಯಿನಾತ್  ಬುಲೆವೊಂದು  ಜನೋಕ್ಲು  ಬಾರೀ ಸುಕೋಟು  ಇತ್ತೆರ್ .....ಜನೋಕ್ಲು  ಬಲೀಂದ್ರನ್   ದೇವೆರುಂದೆ   ಲೆತ್ತೊಂದಿತ್ತೆರ್ ...."

ನಡುಟ್  ಯೆಂಕ್ಲು ಬಾಯಿ ಪಾಡ್ದು    ಕೇಂಡ

"ಅಪಂಡ  ದೇವೆರ್ ಮಲ್ತಿನ  ತಪ್ಪತ್ತಾ ....? ದೇವೆರ್ ಇಂಚ ಮಲ್ಪೊಲಿಯಾ ...?.ದಾಯೇಗಾದ್ ಈತ್  ಎಡ್ಡೆ  ರಾಜನ್  ಪಾತಾಲೊಗು  ನೂಕಿನಿ ....?"

ಅಜ್ಜಿಗ್ ಗರ್ವ  ಬತ್ತುಂಡ್ ...

"ಅಧಿಕ ಮಲ್ಪಡೆ ..ಪೋಲೆ   ಗಟ್ಟಿ ಬೈದುಂಡಾ ತೂಲೆ ......   ತಿನ್ಲೆ....!" ಇಂಚ ಪಂಡುದ್  ಎಂಕ್ಲೆನ್  ಕಡಪುಡು  ಕೊರೊಂದಿತ್ತೆರ್.

ಹ್ಹ ಹ್ಹ ಹ್ಹ ... ಅಜ್ಜಿನ ತಪ್ಪತ್  .....ಇಂಚ ದಾಯೇಗಾಂಡ್ ಪಂಡುದ್ ಅಜ್ಜಿಗ್ಲಾ ಪಾಪ ಗೊತ್ತುಜ್ಜಿ !

ಇನಿಕ್ಲಾ ಈತ್  ಎಡ್ಡೆ   ಬಲೀOದ್ರನ್ ದೇವೆರ್  ದಾಯೆಗ್   ಪಾತಲೊಗು   ನೂಕಿಯೇರ್ ..ತಪ್ಪತ್ತಾ ?   ಪಂಡುದೆ  ಎನ್ನುಂಡು

ಅಂಚ  ತೂಯರೇ ಪೋಂಡ ದೇವೆರ್ನಕುಲು  ತಪ್ಪು  ಮಲ್ತಿನಿ   ಉಂದುವೆ ಸುರುವ ...?

"ವಾಲಿನ್ ಕೆರ್ನಪಗ   ವಾಲೀ ರಾಮ  ದೇವೇರೆಡ  ಕೇನುವೆರ್ಗೆ ..."ಇರ್ಲಕ್ಕಂತಿನ  ವೀರೆಲಾ  ಎನನ್ ಮದೆಟ್   ದೆಂಗುದು  ಕುಲ್ಲುದು ಕೆರ್ಯರಾ  ?.ಎನಡ  ಪಂತುವರ್ಡ  ಸೀತೆನ್ ಯಾನ್  ಮೂಲು  ಇತ್ತಿಲಕ್ಕನೆ , ಎನ್ನ ಬೀಲ  ಬುಲೆಪಾದ್  ಇರೆಗ್ ಕನತ್  ಕೊರ್ತುವೆ. ಸ್ವಾರ್ಥ  ಸಾದೆನೆಗ್  ಎನ್ನ ಮೆಗ್ಯನೋಟ್ಟು ಸೇರ್ದ್  ಪಗೆ  ದಾಂತಿ  ಎನನ್ ಕೆರ್ಯರಾ ?... ತಪ್ಪು ಎನ್ನುಜ ಇರೆಗ್  ?"

ಇಂಚ  ಪನ್ನಗ  ರಾಮ ದೇವೆರ್  ಉತ್ತರ ಕೊರಿಯರೆ  ಅವಂದೆ ....

"ಪ್ರಾಣಿ ವಧೆ ಕ್  ಶಾಸ್ತ್ರ ಇಜ್ಜಿ , ನಿಕ್  ಮೋಕ್ಷ ಕೊರೋಡಾದ್ ಯಾನ್ ನಿನಾನ್ ಕೆರಿಯೇ  ಬದುಕುನ ಆಸೆ  ಇತ್ತುಂಡ  ಪಣ್ ..ಬಾಣ ದೆತ್ತು ನಿನನ್  ಬದುಕವೇ" ಪಂಡೆರ್ಗೆ

ವಾಲೀ " ದೇವೆರ್ನ ಕೈಟ್ ಸೈಪಿನ ಎನ್ನ ಭಾಗ್ಯ.... ಮೋಕ್ಷನೆ ಉಪ್ಪಡ್"  ಪಂಡುದ್  ಸಾವುನೆ  ದೆತ್ತೊನುವೆ ....

ಸಮಧಾನಿಕೆ  ಎಂಚನೆ  ಉಪ್ಪಡ್, ಆಂಡಲಾ  ಏತೊ  ಸಲ ಎನ್ನುಂಡು  ರಾಮ ದೇವೆರ್  ಇಂಚ ದಾಯೆಗ್   ಮಲ್ತೆರ್..?

ವಿಷ್ಣು ದೇವೆರ್ ರಕ್ಕಸ ಜಲಂಧರನ್  ಕೆರ್ಯೆರೆ ಅವಂದೆ  ಪಾಪದ   ತುಳಸಿನ  ಪಾತಿವ್ರತ್ಯ  ಹಾಳ್ ಮಲ್ತುದು   ಅಲೆನ  ಕಂಡನನ್ ಕೆರ್ದ್  ಅಲೆನ ಕೈಟ್  ಶಾಲಗ್ರಾಮ  ಕಲ್ಲಾದ್  ಪೋಪಿನ ಶಾಪ  ದೆತೊಂಡೆರ್!.

ಕಂಡನನ  ತಪ್ಪುಗು ಪತಿವೃತೆ   ಬುಡೆದಿಗ್  ಅಪವಾದ  ಬರ್ಪಿಲಕ್ಕ  ಮಲ್ತೆರ್ ...ಉಂದು ಸರಿಯಾ ?

 ಬೊಕ್ಕ ಅವೆನ್ ಮಾಜಾವೇರೆಗ್  ಜನೋಕ್ಲು ನಿನಾನ್  ದಿನಾ  ಕಾಂಡೆ - ಬೈಯಾಗ್  ನೆನಪುಲಕ್ಕ  ಮಲ್ಪುವೆ,  ಯಾನ್ಲಾ ಲಕ್ಷ್ಮಿ ದೇವಿಲಾ  ಒಂಜಾಯಿ ನಿನ್ನ ಸನ್ನಿಧಾನೋಡು  ಮಾತೆರ್ಲ  ಮುಡಾಯಿ- ಬಡಕಾಯಿ  ಕೂಡುನಲ್ಪ( ದೇವಮೂಲೆ ) ನಿನ್ನ ವೃಂದಾವನ  ದಿನಾ  ಪೂಜೆ ಮಲ್ಪುವೆರ್   ಪಂಡುದ್  ವರಕೊರ್ಪೆರ್......

ತಪ್ಪು ಮಲ್ಪುನು.......

ಬೊಕ ಅಯಿಕೊಂಜಿ  ಪರಿಹಾರವಾದ್  ಜನೋಕ್ಲು  ಅಗ್ಲೇನ್  ಜೀವಮಾನ  ನೆನಪುಲಕ್ಕ  ಮಲ್ಪುನು ...!

 ಬಲೀಂದ್ರಗ್ಲ  ಅಂಚನೆ ಆಯಿನಿ .

 ಜೋಕುಲಾಟಿಕೆಡ್  ಬತ್ತುದ್  ಮೂಜಿ ಮುಟ್ಟು  ಜಾಗೆ ಕೇನುದು ಕೊರಿಯೆರೆ  ಬತ್ತಿನ ಆಯನ  ಮಂಡೆಗ್ ಕಾರ್ ದೀದ್  ಪಾತಲೊಗೆ  ನೂಕುವೆರ್.

ರಾಜ್ಯ  ಬುಡಿಯೇರ್ಡಲ, ಮೋಕೆದ  ಜನೋಕ್ಲೆನ್  ಬುಡಿಯೆರೆ  ಬಲೀಂದ್ರ ಗ್  ಮನಸ್  ಕೇನ್ಜಿ .ಅಪಗ  ದೇವೆರ್ ವರ್ಷದ  3
ದಿನೋಟು  ಭೂಮಿಗ್ ಬತ್ತುದ್  ನಿನ್ನ ಜನೋಕ್ಲೆನ್  ರಾತ್ರೆ  ಪೋರ್ತುಡು   ತೂವೊಂದು ಪೋವೊಲಿ ಪಂಡುದ್ 
ತನ್ನ ಪ್ರಜೆಕುಲೆನ್  ತೂಪಿನ  ಭಾಗ್ಯ  ಕೊರ್ಪೆರ್ . ಮುಲ್ಪಲ   ಬಲೀಂದ್ರನ್  ರಾತ್ರೆ  ಕತ್ತೆಲೆಗ್   ಕಣಿಕ - ಗುವೆಲ್ಗ  ಪಾಡುನ ಅಂದಾಜಿಯ ದಾನ್ಯೋ . ಆಂಡ  ತುಳುನಾಡುದ  ಸ್ವಾಮೀ ಭಕ್ತೆರ್   ಬಲಿಯೆಂದ್ರೆ  ಬರ್ಪೆರ್ಗೆ  ಪಂಡಿನ ಕೇನಿಕೂಡ್ಲೆ ನಿನೆ  ಕೋಲು  ದೀಪ ಮಲ್ತುದು ಕಂಡದ ಮುದೆಲ್ಗ್ ,ಗುವೆಲ್ದಲ್ಪ ,ಗೊಬ್ಬರ ಗುಂಡಿಗ್   ಪೊತ್ತದೀದ್ ಆಯೇ ಬರ್ಪಿನ ಸಾದಿಡ್ ದಾಲ  ತೊಂದ್ರೆ ಆವಂದಿಲಕ್ಕ   ಬೊಲ್ಪು ಮಲ್ಪುವೆರ್,  ಬಜಿಲ್- ತಾರಾಯಿ -ಬಜ್ಜೈ - ಪೂಲು  ದೀದ್ ,ಗಜ್ಜೈ -ಗಟ್ಟಿ  ಮಲ್ತುದು ಬಾರಿ ಮರ್ಯಾದಿಡ್ ಕಾತು  ಕುಲ್ಲುದು  "ಕೂ"  ಪಾಡ್ದು  ಲೆತ್ತೆರ್ ...
ಬಲ್ಲ ಬಲಿಯೇಂದ್ರ ಪಂಡುದ್  ಉಡಲುಡ್ದು  ಲೆತ್ತೆರ್

ಲೆತ್ತೊಂದೆ ಉಲ್ಲೆರ್.....ಇನಿಕ್ಲಾ !

ಇಂದ್ರ ಪದವಿ ತಿಕ್ಕುಜಿಡ್ಲ  ಬಲಿರಾಜೆ   ಇಂದ್ರ ಪದವಿಗ್ ಯೋಗ್ಯೆ ಪಂಡುದ್  ಬಲಿಯೇ ಇಂದ್ರೆ ಪನ್ಪಿಲಕ್ಕ ತುಳುನಾಡುಡ್   "ಬಲಿಯೇಂದ್ರೆ" ಆದ್ ಮೆರೆವೆ.

ಮೂಲ್ಕಿ  ಗಡು  ದಾಂಟ್ ನಗ  ಪುಲ್ಯ ಆಪುಂಡು ..ಬಲೀಂದ್ರೆ  ಎನ್ನ ಜನೋಕ್ಲೆನ್  ಮಾತರೆನ್ಲ   ತೂವಂದೆಪೋವಯೆ  ಪಂಡುದ್ ಗಡುಟ್ ಕುಲ್ಲುದು   ಮರ್ದಿನ  ರಾತ್ರೆಗ್ ಕುಡ  ಸಂಚಾರ  ಪಿದಡುವೆ ..ಜನೊಕುಲು  "ಕೂ"  ಲೆಪ್ಪುನ ಕೇನುವೆ,  ಪೋಲಿ ಕೊರ್ಪೆ ,ಕುಶಿ  ಕೊರ್ಪೆ ತನ್ನ ಮೋಕೆದ  ತುಳುವೆರ್ನ  ನಲಿಕೆ  ತೂಪೆ .....ಕುಶಿಟ್  ಬರ್ಪಿ ವರ್ಷ ನನೋರ   ಬರ್ಪೆ ಪಂಡುದ್ ಮಲಬಾರದ   ಗಡಿತಂಚಿ  ಸೇರ್ದು  ಪಾತಾಳ  ಲೋಕದ  ಸಾದಿ ಪತ್ತುವೆ .

ರಾಜ್ಯ  ದಾಂತಿನ  ಮಹಾರಾಜೆ .........ಬಲೀಂದ್ರ ಗ್  ಉಂದೆಡ್  ಮಲ್ಲ ಭಾಗ್ಯ  ಬೋಡೆ ...?

ಆಂಡಲಾ........ ದೇವೆರ್ಲಾ  ತಪ್ಪು ಮಲ್ಪೋಲಿಯ ..? ದಾಯೆಗಾದ್  ತಪ್ಪು ಮಲ್ಪುವೆರ್.....ಒವ್ವು ಸರಿ......? ಒವ್ವು  ತಪ್ಪು...?

ನಮ್ಮ  ಶ್ರೀ ಕೃಷ್ಣ ದೇವೆರ್  ಮಹಾಭಾರತದ   ಯುದ್ಧದ  ಪೋರ್ತುಗು ಮಲ್ಪಂದಿನ  ಅನ್ಯಾಯೋಲು-ನಾಟಕೊಲು  ಇಜ್ಜ .

 ಧರ್ಮರಾಯಡ ಸುಳ್ಳು ಪನ್ಪಾವುನು, ಗುರುಹತ್ಯೆ,ಹಿರಿಯೆರೆನ ಹತ್ಯೆ,ಮಲ್ಪೆರೆ ಬಲ್ಲಿ  ಪಂಡಿಲಕ್ಕನೆ   ದ್ರೋಣನ್,ಭೀಷ್ಮನ ಕೆರ್ಪಾವುನು,  ರಥದ  ಚಕ್ರ ತಾರಿನ ಕರ್ಣನ್  ಚಕ್ರ ಸರಿ ಆಪಿನಾತ್  ಪೊರ್ತುಲ ಕಾಪಂದೆ  ಕೆರ್ಪಾವುನು... ಅಭಿಮನ್ಯುಗ್ ಚಕ್ರ ವ್ಯೂಹದ ಅರ್ದ ಕತೆ  ಪಂಡುದ್  ಪಜ್ಜಿ  ಪಜ್ಜಿ ಬಾಲೆನ್  ಪಿದಾಯಿ ಬರಂದಿ ಲಕ್ಕ  ಮಲ್ತಿನಿ ,
  
ಒಂಜಾ ... ರಡ್ಡ..?  

ನಮ್ಮ ಲಕ್ಕನೆ ಅರ್ಜುನಗ್ಲಾ  ತರೆ ಮುದೆಲ್ ತೆರಿಯುಜಿ.    ಮಂಡೆ  ಬೆಚ್ಹ ಆದ್  ಕೇನುವೆಗೆ

"ಉಂದು  ದಾದ  ಕೃಷ್ಣ ? ಒರ ಪನ್ಪ  ಅವು ಮಲ್ಪೆರೆ ಬಲ್ಲಿ... ತಪ್ಪು,  ಉಂದು  ಮಲ್ಪರೆ  ಬಲ್ಲಿ....  ತಪ್ಪು

ನನೊರ  ಪನ್ಪ  ಗುರು ಪಂಡುದ್  ತೂವಡ  ಬಂಧು ಪಂಡುದ್   ತೂವಡ  ,ರಥ  ತಾರ್ದಿನ  ಕರ್ಣನ್ ಕೆರಿಯೆರೆ  ಕಾತಡ  ಸೋತ............ ಬುಡು ಬಾಣ........  ಕರ್ಮ ನಿನ್ನ, ಫಲ ದೇವೆರ್ನ ಪನ್ಪ .......ಎಂಕ್ ಒಂಜಲ ತೆರಿಯುಜಿ!"


ಅಪಗ  ಕೃಷ್ಣ  ದೇವೆರ್ ಪನ್ಪೆರ್ಗೆ

"ಅರ್ಜುನ   ಈ ನ್ಯಾಯ -ಅನ್ಯಾಯ ,ಧರ್ಮ- ಅಧರ್ಮ ,ಸತ್ಯ- ಸುಳ್ಳು  ಪನ್ಪಿನ  ಮಾತಾ  ಸಾಂಧರ್ಭಿಕ . ಆ ಪೋರ್ತುಗು ಸರಿಯಾದ  ಸುಳ್ಳು ಸರಿ ಆಪುಂಡು , ಸತ್ಯ  ತಪ್ಪು ಆಪುಂಡು . ಅಂಚನೆ ಧರ್ಮ  ಅಧರ್ಮ ಆವು, ಅಧರ್ಮ ಧರ್ಮ ಆವು

ಒಂಜೆ  ವಾಕ್ಯೋಡು  ನಿಕ್  ಜೀವನಾರ್ತ  ಪನ್ಪೆ  ಕೇನ್ಲ"

ವಾ ಸುಲ್ಲುಡ್  ನಾಲ್ ಜನೋಕ್  ಸುಖ  ತಿಕ್ಕುಂಡ   ಅವು ಸತ್ಯ
ವಾ ಸತ್ಯೋಡು  ನಾಲ್ ಜನಕ್  ತೊಂದರೆ ಆಪುಂಡ  ಅವು  ಸುಳ್ಳು

ವಾ  ಅಧರ್ಮೋಡು ನಾಲ್ ಜನೋಕು  ಎಡ್ಡೆ  ಆಪುಂಡ  ಅವು ಧರ್ಮ
ವಾ ಧರ್ಮೋಡು  ನಾಲ್ ಜನೋಕ್  ತೊಂದ್ರೆ ಆಪುಂಡ  ಅವು  ಅಧರ್ಮ

ವಾ ನ್ಯಾಯೋಡು ನಾಲ್ ಜನೋಕ್  ತೊಂದ್ರೆ ಆಪುಂಡ  ಅವು ಅನ್ಯಾಯ
ವಾ ಅನ್ಯಾಯೋಡು ನಾಲ್ ಜನೋಕ್ ಎಡ್ಡೆ  ತಿಕ್ಕುಂಡ  ಅವು ನ್ಯಾಯ !

 ಉಂದೇ ನ್ಯಾಯ- ನೀತಿದ  ಭಗವದ್ಗೀತೆ..........  ಸಂಧರ್ಬ್ಹೊಗು  ತಕ್ಕ ಕಾರ್ಯ !


ಬಲೀಂದ್ರನ  ವಿಷಯೋಡ್ಲ ಇಂಚನೆ  ಆಯಿನಿ ....

ಬಲ್ಲೀಂದ್ರೆ  ಎಡ್ಡೆನೇ  ...ಆಂಡ ಆಯನ ಕುಲ  ರಕ್ಕಸೆರ್ನ . 

ಎಲ್ಲೆ  "ಇಂದ್ರ"  ಪದವಿ  ರಕ್ಕಸರೆನ  ವಂಶೋಗು ಪೋಯಿನಾಂಡ,ನನ  ಬರ್ಪಿನ ರಕ್ಕಸೆ  ಯೆಂಚಿನಾಯೇನ ?
ಆಯೆ  ಜನೋಕ್ಲೆನ್ ಎಡ್ಡೆಡ್   ತೂವೊಂಬೆ  ಪನ್ಪಿನ ದಾಲ ನಿಗಂಟ್  ಇಜ್ಜಿ .
ಅಧಿಕಾರ,ಪದವಿ  ದುರುಪಯೋಗ  ಆವಂದ ?......ಅಂಚಾದ್  ಕುರ್ಚಿ ,ಅಧಿಕಾರ  ಯಾಪಲ  ರಕ್ಕಸೆರ್ನ  ಕೈಕ್  ಪೋಯರೆ  ಬಲ್ಲಿ ......!

ರಾಜಕೀಯ ಲೆಕ್ಕಾಚಾರ ...!

ಆಡಳಿತ  ವಂಶಪಾರಂಪರ್ಯ ಆದ್ ಹಾಳ್ ಜನೋಕ್ಲೆನ ಕೈಟ್  ಉಪ್ಪರೆ  ಬಲ್ಲಿ ...!  ಅಗಲೈಟ್  ಒರಿ  ಎಡ್ಡೆOದಿನಾಯೇ ಇತ್ತೆಡ  ಯಾವಂದ್  ...ಅಂಚಾದ್  ಬಲಿಯೆಂದ್ರೆ  ಇಂದ್ರ  ಪಟ್ಟದ  ಮಹತ್ಹ್ಕಾಂಕ್ಷೆ ಗ್  ಪೋದು  ಪಾತಾಳದ  ಸಾದಿ ಪತಿಯೇ ....

ಅಧಿಕಾರ ಲಾಲಸೆ  ಅಧಃ ಪತನೋಗು  (ಪಾತಾಳ ) ಪೋವರೆ  ಕಾರಣ ಆಪುಂಡು.

ಇತ್ತಿನ ಅಧಿಕಾರೋನು ಪೋರ್ಲುಡು  ಪಾಲನೆ ಮಲ್ಪುನ ಬುಡ್ಡು ....ಮಿತ್ತ ಲೋಕಲ  ಎನ್ನ ಕೈಟ್ ಉಪ್ಪಡ್  ಪನ್ಪಿನ  ಆಸೆ ....
ಇತ್ತಿನವು  ಯಾರುಜಿ ನನಾತ್ ಬೋಡು  ಪನ್ಪಿನ  ದುರಾಸೆ
ಕಡೆಕ್ ಅವ್ವಲಾ  ಇಜ್ಜಿ...ಉಂದುಲಾ  ಇಜ್ಜಿ ಪಂಡುದ್  ಪಾತಲೋಗು  ಪೋಪಿನಿ.....

ಏತ್  ಮಲ್ಲ ಸತ್ಯ .

ನಮ್ಮ  'ಭೂಮಿ' ಅಪ್ಪೆಡ  ಮಾತಾ ಇತ್ತುಂಡಲ ಅವೆನ್ ಮಾತಾ ಒರಿಪಾವಂದೆ ಮೂಲ್  ಹಾಳ್ ಮಲ್ತುದು  ಮಂಗಳ ಗ್ರಹೊಟು  ಜಾಗೆ ನಾಡುಜನ  ನಮ,  ಅಂಚ ಆಂಡ್  ಬಲಿನ  ಕತೆ .....!


 ಈತಾಂಡಲಾ  ..
 "ಮಂಡೆಡ್  ಜಾಗ ಕೊರುವೆ ..ಪಂಡಿ ಪಾತೆರ  ಬುಡಯೆ"
 ಪಂಡುದ್  ತನನ್  ತಾನೇ ಪಾತಲೋಗು  ನೂಕೊನಿನ  ಬಲೀಂದ್ರಗ್ ....... ಒಂಜಿ ಕೂ......  ಪಾಡೋಡೆ !

ಆಯೇ ಯಾಪೊಗ್ಲ ಇಂದ್ರೇನೆ ....ಬಲಿಯೇಂದ್ರೆನೆ!

ಬಲಿಂದ್ರ
ಬಲಿ  ಬಲ್ಲ
ಪೊಲಿ ಕನಲ
ಪೊಲಿಯೇ
ಕೂ ................

..........................................................................................................................................................................................................
.ಶಾಂತಾರಾಮ್ ಶೆಟ್ಟಿ