ಶಬ್ದ ಪನ್ಪಿನ ನಾದ.........ದುಷ್ಟ ಶಕ್ತಿಲೆನ್ ದೂರ ಮಲ್ಪಂದಾ ..?

 

ದೀಪಾವಲಿ  ಪರ್ಬ ಖಾಲಿ  ಬಲೀಂದ್ರನ್  ಲೆಪ್ಪುನು  ,ಉನ್ಪಿನಿ ,ತಿನ್ಪಿನಿ,ಜೆಪ್ಪುನು  .....ಅಡೆಗೆ ಮುಗಿಯುಜಿ
ದಿನಕೊಂಜಿ,ಬಗೆಕೊಂಜಿ   ವಿಶೇಷ  ಅರ್ತ ಇತ್ತಿನ  ಮಾಮರ್ಮದ  ಪರ್ಬ.  ಸುರುತ  ದಿನ  ಎಣ್ಣೆ  ಪೂಜಿದ್ ಮೀಯೊಡು      ರಡ್ಡ ನೇ  ದಿನ  ಬಲೀಂದ್ರಗ್  ದೀಪ  ದೀಯೋಡು  ಮೂಜಿನೆ  ದಿನ  ಗೋಪೂಜೆ ,ಅಂಗಡಿ ಪೂಜೆ ,ಪಾಡ್ಯೋಗು  ಕೋರಿದ ಕಟ್ಟ ...ಮುಗಿಯರೇ ಇಜ್ಜಿ ...ಅಂಚಾದೆ  ದೀಪಾವಳಿ ಪಂಡ   ಪರ್ಬ !

                                                                       ಗೂಡು ದೀಪ

ನೀರ್ ದಿಂಜಾವುನ  ದಿನ  ಗುವೆಲ್ಗು  ಪೂಜೆ ( ಚಿತ್ರ ಕಮಲೇಶ್ )

ಉಂದೆತ  ನಡುಟ್  ದಿನಾ  ಬೈಯ್ಯಗ್  ಮೂಜಿ ದಿನಾಲ     ದಿನತ ಆಚರಣೆ ಮುಗಿಬೊಕ್ಕ  "ಪರ್ಬ ತುಡರ್"  ತೊಜಾವುನ,   ಪೊರ್ಲುದ ಸೊಲ್ಮೆ ಸಂದಾವುನ ಒಂಜಿ ಕ್ರಮ ಶಬ್ದ  ದಾಂತೆ  ನಡಪುಂಡು .....

ಶಬ್ದ  ಪನ್ನಗ  ಸುರುಕ್ ನೆನಪಾಪಿನಿ ಪಟಾಕಿ......

ದಾಯೆಗ್ ಪಟಾಕಿ  ಬುಡ್ಪಿನ  ಕ್ರಮ ಮಲ್ತೆರ್ ...?

ಶಾಸ್ತ್ರ -ಪುರಾಣದಲೆಕ್ಕೋಡು  ಅಂಚ ಮಲ್ಪೊಡ್ಗೆ - ಇಂಚ ಮಲ್ಪೊಡ್ಗೆ  ಪನ್ಪಿನ  ಒಂಜಿ ನೀತಿ  ,  ನಿತ್ಯ  ಜೀವನೋದ ಸತ್ಯೋಲು  ಬೇತೇನೆ.

ಸಂಭ್ರಮಾಚರನೆಡ್ ಶಬ್ದೊಗು  ವಿಶೇಷ  ಮಾನಾದಿಗೆ. ಶಬ್ದ  ಬತ್ತಿನಂಚಿ  ತಿರ್ಗ್  ತೂಪಿನ  ಜೀವಿಲೆನ ಗುಣ. ವಿಶೇಷ ವಾಯಿನ  ಕಾರ್ಯ ನಡಪನಗ  ಅಲ್ಪ  ಶಬ್ದ  ಬೋಡೆ .. ಚಂಡೆ ,ಬ್ಯಾಂಡ್ , ದೋಲು, ಕೊಂಬು ,ವಾದ್ಯ , ಗರ್ನಾಲ್ ,ಕದೊನಿ .

ಶಬ್ದೊನು  'ನಾದ'  ಬೊಕ್ಕ 'ನಿನಾದ'  ಪಂಡುದು  ರಡ್  ನಮುನಿಡ್ ಲೆತ್ತೆರ್.

 ಒಂತೆ ಜಾಸ್ತಿ ಶಬ್ಧೋನು  ನಾದ ...ಕಮ್ಮಿದವೆನ್  ನಿನಾದ ಪಂಡುದ್. (ನನಲ ಜಾಸ್ತಿ ಆಂಡ ಅವು ಗಲಾಟೆ...ಕಿರಿ ಕಿರಿ  !)

ಈಶ್ವರನ  ಡಮರುಗದ ನಾದ ,ಚಂಡೆದ  ನಾದ, ಡೋಲುದ  ನಾದ,  ಗಂಟೆದ  ನಾದ ,  ..... ನಾದ  ಕೆಲವು  ದೂರ ಮುಟ  ಕೇನು.
ಪಕ್ಕಿಲೆನ ಕಿಚಿ-ಕಿಚಿ  ,ಮರತೆಡೆಟ್  ಬೀಸುನ  ಸುಂಯಿ-ಸುಂಯಿ  ಗಾಳಿ   ,ನೀರ್ ಪರತೊಂದು ,ಬೂರೊಂದು ಪೋಪಿನ...ಮಾತಾ  ನಿನಾದ...ನಿನಾದ ಅಲ್ಪಲ್ಪನೆ  ಕೇನು .

 ನಾದೊಗು "ಗಿಡಪುನ " ಶಕ್ತಿ  ಇತ್ತುಂಡ ,ನಿನಾದೋಗು "ಕುಲ್ಲ  ದೀಪಿನ ಶಕ್ತಿ"ನ್  ಕೊರಿಯೆರ್ ದೇವೆರ್  .....

 ಅಂಚಾದ್.....

ಮಾರಿ ದೇರನಗ ,ಬೋಂಟೆಗ್  ದೇರ್ನಗ   ಡೋಲು ಗುದ್ದುನು ....

ಕಾಡುದಲ್ಪ ಮರತಡಿಟ್,ತುದೆ  ಬದಿಟ್  ಆಶ್ರಮ  ಕಟ್ಟುದು  ರಿಷಿಕುಲ್ನಕುಲು   ಧ್ಯಾನ  ಮಲ್ಪರೆ  ಕುಲ್ಲುನು  ....

 ಅವು ಉಪ್ಪಡ್....ಇತ್ತೆ  ಪರ್ಬದಂಚಿ  ಬರ್ಕ

ದೀಪಾವಳಿ  ಬೆನ್ನಿದಕ್ಲೆನ  ಪರ್ಬ....

ಕಾರ್ತೆಲ್ ತಿಂಗೊಲ್ದು  ಬೆನ್ನಿದ ಬೇಲೆ  ಮುಗಿದ್ ,  ಆಟಿಡ್  ಕೂರ್ -ಕಟೊಂದು ಇತ್ತಿನಕುಲು,ಸೋನ ಬನ್ನಗ  ಲಕ್ಕುದು  ಉಂತುದು  ಕೊರಲ್  ಕಟುದು, ಪೊಸತ್  ಉಂಡುದು ,  ಜಾಲ್  ಪಿರೆಸೆರೆ-ಪೊಲಿಪೆರೆ   ಸುರು ಮಲ್ಪೆರ್. ನಿರ್ನಾಲ್ ಬೊಂತೆಲ್ಡ್   ಬುಲೆ ಉಲಾಯಿ  ಬರ್ಪಿನ  ಪೊರ್ತು,  ಕೈಟ್ ನಾಲ್  ಪಾಣೆ  ಪಂದುನ  ಗಲಿಗೆ ...

ಅಪಗನೆ  ದೀಪಾವಲಿ!.

ಬಡವೆ ಎಣ್ಣೆ-ನೀರ್ ಮೀಪಿನಿ ವರ್ಶೋಗು ಒರನೆ .ಮೀಯೋಡೇ  ಪನ್ಪಿನ  ಶಾಸ್ತ್ರ ಇತ್ತಿನೈಟ್ ,ಇಜ್ಜಾಂಡ ಆನಿಲ ಖಾಲಿ ತೆಪ್ಪುದ  ಕೂರುಡೆ ಮೀವೆ !

 ಚಿತ್ರ : ಕಮಲೇಶ್ 

ಕೆಸರ್  ಕಂಡೋಡು-ದೊಂಬುದಡಿಟ್   ಬೆಂದಿನ ಜೀವ ..ಚರ್ಮ  ಬರಂಟ್  ಕಟುದು  ಪೋವು ... ಒರ್ಸೋಗೊರ  ಅಂಡಲ ಎಣ್ಣೆ ಪೂಜಿದ್ ಮೀಜಿಡ ಎಂಚ ?.ಕರಂಚಿದಿನ  ಚರ್ಮ ಕೈಟ್  ಬರು.ಅಂಚ  ಮಂಡೆ- ಮೈ-ಕೈ   ನಿಲ್ಕೆ ಎಣ್ಣೆ ಪಾದ್ಡು  ಅರ್ದ ದಿನ ಐಟೆ  ಮುರ್ಕುದು  ಮೀಕ....!


ಚರ್ಮದ  ಕುರೆ ಪೋದು   ಪಳ  ಪಳ ಮೆಂಚು ...ಮೈ ಕೈ ಬೇನೆಲ  ಪೋದು, ಬರ್ಪಿನ   ಬೆನ್ನಿದ  ಬೇಲೆಗ್  ಜೀವ ತಯಾರಾವು...


ಬುಲೆ  ನಮ್ಮ  ತಿಗಲೆ  ಸಮ  ಬುಲೇದು ಉಂತುದುಂಡು .ನನ  ನಾಲ್ ದಿನ  ....ಆತೊರ್ತು  ಕೊಯ್ಯರೇ ಸುರು ಆವು .....
ಅಪಗನೆ  ದುಷ್ಟ  ಶಕ್ತಿಲೆನ  ಕಾಟ!

ಪಂಜಿ ,ಕುದ್ಕೆ  ,ಮುಜ್ಜು, ಆನೆ  ...ರಾತ್ರೆಗಿಡಿ  ಕಂಡ - ತೋಟ  ಸಪಾಯಿ .

ಗಿಡವುನೆಂಚ ..?

ಶಬ್ದ ಮಲ್ತುಂಡ ...? ತೊಂದರೆ  ಕಮ್ಮಿ ಆವಂದ ?

ಗಂಟೆ ಬೊಟಿಯೇರ್,ಕೂ  ಪಾಡ್ಯೇರ್ ,  ..ಪಟಾಕಿ  ಪುಡತೆರ್ ..!

ಪಂಡ್ರೆ  ಪಟಾಕಿ ಅಂಡಲ ....ಅಯಿತುಲಾಯಿ  ಒಂಜಿ ಜೋರುದ   "ಶಬ್ದ"   ಉಂಡು

ನಾದ   ಹಾಳ್ ಮಲ್ಪುನಕ್ಲೆನ್  ದೂರ ಗಿಡ್ದವಂದಾ ..?

ಎಣ್ಣೆ ಪಾದ್ಡು  ಮೀಲೆ,  ಜೀವದ ಪಿದಾಯಿ ಶುದ್ಧ  ಆವು ...

ಮನಸುದುಲಾಯಿ  ಕುರೆ  ಯೋಚನೆಲು-ಹಾಳ್  ಶಕ್ತಿಲು   ಇತ್ತುಂಡ ....?...ಗಿಡ್ದಾಲೆ  ಶಬ್ದ  ಮಲ್ತುದು.

ನರಮಾನಿ ಬಂಜಿದ ಬಡವುದ  ಕರ್ಮೋಡ ,ಜ್ಞಾನದ ಅಭಾವೊಡ , ವ್ಯವದಾನೆದಾಂತೆನ  ಶಾಸ್ತ್ರದ  ಬೇರಿಯೇ  ಪೋವಂದೆ   ಕುಲ್ಯೇಡ್ಲ , ಶಾಸ್ತ್ರ ಮಾತ್ರ  ಒವ್ವಾ ಒಂಜಿ ರೂಪೊಡು   ಆಯನ  ಬೆರಿಯೆನೆ    ಬರು.

ದಾದಾನೋ  ಒಂಜಿ.....
ಒಟ್ಟಾರೆ ಸಂಸಾರ  ಸುಕೋಟು  ಉಪ್ಪೋಡು !
ದೀಪಾವಳಿ  ಗಡ್ದು  ಆವೋಡು ..!

 .........................................................................................................................................................................................................ಶಾಂತಾರಾಮ್ ಶೆಟ್ಟಿ