ತುಳಸಿಗ್ ನೀರ್ ಮೈಪೆರೆ- ಕೈ ಮುಗಿಯರೆ ಸುರು ಮಲ್ಪಿ !
ಭಾಗ -2
ಒಂಜಿ ಕಾಲ ಇತ್ತುಂಡ್...........
ಬಯ್ಯಗ್ 7ಗಂಟೆಗ್ ಉಂಡುದ್ ಜೆತ್ತೆರ್ಡ ಕಾಂಡೆ ಸೂರ್ಯೇ ಮೂಡುನ ದುಂಬೆ ಲಕ್ಕುದು ಇಲ್ಲ ಎದುರ್ಗು ಅಂಬಿ ನೀರ್ ತೇತುದ್ ಶುದ್ದ ಮಲ್ತುದು ,ಮೀದ್ ,ಇಲ್ಲ ಯೆದುರ್ದ ತುಳಸಿ ಕಟ್ಟೆಗ್ ಒಂಜಿ ಚೊಂಬು ಶುದ್ದ ನೀರ್ ಮೈತುದು ದಿನತ ಬೇಲೆಲು ಸಲೀಸಾದ ನಡಪೊಡು ಪಂಡುದ್ ದೇವೆರ್ಡ ನಟೊಂದು ಬೊಕ್ಕನೆ ಬಂಜಿಗ್ ದಾಲ ತಿನುವೆರ್.....ಬೇಲೆ ಬೆನುವೆರ್...
]
ಬಯ್ಯಡ್ ಬೇಲೆ ಮಾತಾ ಮುಗಿದಾಯಿ ಬೊಕ್ಕ, ಸೂರ್ಯೆ ಕಂತುನ ಪೋರ್ತುಡು ಎಡ್ಮೆದ ಎಣ್ಣೆ ದ ಒಂಜಿ ನಿನೆ ದೀಪ ಮಲ್ತುದು ತುಳಸಿ ಕಟ್ಟೆದ ಎದುರು ಕುಲ್ಲುದು ದೇವೆರ್ನ ನಾಲ್ ಭಜನೆ ಪಂಡುದ್ ,ದೇವೆರೆಗ್ ಸೊಲ್ಮೆ ಸಂದಾವದ್ ವನಸ್ ಮಲ್ತುದು ಜೆತ್ತೆರ್ಡ ಆನಿದ ದಿನ ಪೋರ್ಲುಡು ಮುಗಿಂಡು ಪಂಡುದೆ ಲೆಕ್ಕ ...
ಕಾಂಡೆದ ಪೊರ್ತುಲ- ಬೈಯ್ಯದ ಪೊರ್ತುಲ ತುಳಸಿ ಕಟ್ಟೆದ ಸುತ್ತ ಕುಲ್ಲುಂಡ ತುಳಸಿ ಗಿಡತ ವಿಶೇಷ ಗುಣವಾಯಿನ ಯಥೆಚ್ಹ ಆಮ್ಲಜನಕ ಪಸರನೆದಾವ್ರ ಅರೋಗ್ಯ ವೃದ್ಧಿ ಆಪುಂಡು ಪನ್ಪಿನ ನಮ್ಮ ಹಿರಿಯೆರ್ನ ಅನುಭವದ ನಂಬಿಕೆ .....
ಜ್ಞಾನ ವೃಕ್ಷ
ತುಳಸಿ, ಅಶ್ವತ್ಥ ಬೋಧಿ ಈ ಮೂಜಿ "ಜ್ಞಾನ ವೃಕ್ಷ" ಜಾತಿಗ್ ಸೇರುವ .ಅಂಚಾದ್ ದುಂಬುದ ಕಾಲೋಡು ನ್ಯಾಯ ಪಂಚಾತಿಕೆ ಅಶ್ವಥ ಕಟ್ಟೆಡ್ ನಡತೊಂದು ಇತ್ತುಂಡ್, ಬುದ್ಧ ದೇವೆರೆಗ್ ಬೋಧಿ ಮರತ ಅಡಿಟ್ ಜ್ಞಾನೋದಯ ಅಂಡ್ ಪನ್ಪೆರ್,ಅಂಚನೆ ತುಳಸಿ ಕಟ್ಟೆದಲ್ಪ ಕುಲ್ಲುದು ಓದಿನಾಂಡ ಜೋಕ್ಲೆಗ್ ಸೋಕುಡು ತರೆಕ್ ಪತ್ತುಂಡು ಪನ್ಪೆರ್.ಯೆಂಕುಲು ಎಲ್ಯ ಉಪ್ಪುನಗ ತುಳಸಿ ಕಟ್ಟೆದ ಬದಿಟ್ ಕುಲ್ಲೊಂದು ಗುಂಪಾದ್ ಗಟ್ಟಿ ಸ್ವರೋಟು ಓದೊಂದಿತ್ತ...
ತುಳಸಿನ ಕತೆ
ತುಳಸಿನ ನನೊಂಜಿ ಪುದರ್ "ವೃಂದಾ". ಅಂಚಾದ್ ತುಳಸಿಕಟ್ಟೆಗ್ ವೃಂದಾವನ ಪಂಡುದುಲ ಲೆಪ್ಪುವೆರ್. ತುಳಸಿನ ಮದಿಮೆ ಆಯಿನ ಜಲಂಧರನ ಅನ್ಯಾಯ ಸಹಿಸರೆ ಅವಂದೇ ವಿಷ್ಣು ದೇವೆರ್ ಆಯಾನ್ ವಧೆ ಮಲ್ಪುವೆರ್ .ಅಪಗ ಪತಿವ್ರತೆ ತುಳಸಿ ವಿಷ್ಣುಗು ಕಲ್ಲಾದ್ ಪೋಪಿನ ಶಾಪ ಕೊರ್ಪಲ್ .ಅಂಚ ವಿಷ್ಣುದೇವೆರ್ "ಶಾಲಗ್ರಾಮ" ಕಲ್ಲಾದ್ ತುಳಸಿನೋಟ್ಟುಗು ಉಪ್ಪುವೆರ್ . ಅಂಚನೆ ತುಳಸಿನ ಪೂಜೆ-ಶಾಲಗ್ರಾಮ ದೊಟ್ಟುಗು ಮಲ್ತಿನಕ್ಲೆಗ್ ವಿಷ್ಣು ದೇವೆರ್ನ ಸಾನಿಧ್ಯ ತಿಕ್ಕಡ್ ಪಂಡುದ್ ವರ ಕೊರ್ಪೆರ್ .ದುಂಬುಡು ಕೃಷ್ಣ ದೇವೆರ್ ತುಳಸಿ ಎಸಳುಡ್ ಪೂಜೆ ಮಲ್ತುಂಡಲ ಯಾನ್ ಒಲಿದು ಬರ್ಪೆ ಪಂಡುದ್ ತುಳಸಿನ ಮಿತ್ತ್ ಪ್ರೀತಿ ತೊಜಾವೆರ್.ಈತ್ ಮಾತಾ ಮಹಾತ್ಮೆದ ಗಿಡ ಈ ತುಳಸಿ.
ಮರ್ದುದ ಗುಣ
ಗಾಯದ ಜಾಗೆಗ್ ತುಲಸಿದ ಒಂಜಿ ಎಸಲ್ದ ನೀರ್ ತಾಗಯರ್ಡ ಮನದಾನಿ ಗಾಯ ಮಾಯ. ಕಫೋಕು ,ತೆಮ್ಮಗ್ ತುಲಸಿದ ರಸ ರಾಮ ಬಾಣ. ಪಂಚ ಪತ್ರೆ -ತುಲಸಿ -ಉಪ್ಪು ಒಟ್ಟುಗೂ ಜೋಕ್ಲೆಗ್ ಅಗ್ಯರೆ ಕೊರಿಯರ್ಡ ಬಂಜಿ ಬೇನೆ ಉಪ್ಪಂದ್ , ವೀರ್ಯ ನಾಶಿನಿ ಗುಣ ಇತ್ತಿನೈಟಾವ್ರ ಸನ್ಯಾಸಿಲು ದಿನಾಲ ಕಾಂಡೆ ತುಳಸಿ ಎಸಲ್ ತಿನುವೆರ್ ...ಇಂಚಿನ ಆಯುರ್ವೇದ ಗುಣ ವಿಶೇಷ ದೈ ಈ ತುಲಸಿ .
ಇತ್ತೆದ ಕಾಲೋಡು
3ಸೆಂಟ್ಸ್ ಜಾಗೆಡ್ ಇಲ್ ಕಟ್ಟುನ ಪರಿಸ್ಥಿತಿ ಬೈದುಂಡ್ ..ಅಂಚಾದ್ ತುಳಸಿ ಕಟ್ಟೆ ಕಟ್ಟೆರೆ ಜಾಗೆ ಒಲುಂಡು? .
ಇತ್ತಿನಲ್ಪಲ ಜನೊಕುಲು ಪಾಪಸ್ ಕಳ್ಳಿದ ,ಕ್ರಟೋನ್ ಬೇಲಿದ ಗಿಡಕುಲೆನ್ ಪೋರ್ಲುಗಾದ್ ದೀಪೆರ್...
ತುಳಸಿ ಗಿಡ ನಮಡ್ದು ದೂರ ಆವೊಂದುಂಡು ....
ಅಂಚ ಆವೆರೆ ಬಲ್ಲಿ ಆತೇ ?....
ತುಳಸಿದಳ ಮಾತ್ರೆನ
ಜಲಸ್ಯ ಕುಲುಕೇನ ವಾ
ವಿಕ್ರಿನೈತೆ ಸ್ವಯಂ ಆತ್ಮನಂ
ಭಕ್ಥ್ಯೋಬ್ಯೋ ಭಕ್ತವತ್ಸಲ!.
ಶ್ರೀ ಕೃಷ್ಣ ದೇವೆರ್ ಒಂಜಿ ಎಸಲ್ ತುಳಸಿದ ಒಟ್ಟುಗು ನೀರ್ ತಲ್ತರ್ಡಲ ತನನ್ ತಾನೇ ಭಕ್ತಗ್ ಮಾರೊಂಬೆರ್ಗೆ!!
ಅಪಂಡ ಇನಿಡ್ಡಿನ್ಚೆ ಕಾಂಡೆ ಲಕ್ಕುದ್ ತುಳಸಿಗ್ ನೀರ್ ಮೈಪೆರೆ- ಕೈ ಮುಗಿಯರೆ ಸುರು ಮಲ್ಪಿ !
.....................................................................................................ಶಾಂತಾರಾಮ್ ಶೆಟ್ಟಿ
Comments
Post a Comment