ಭಾಗ್ಯವಂತೆದಿ ಸಿನಿಮಾದ ಮದಪೆರಾವಂದಿ ಪದ - ಎನ್ನ ನಿನ್ನ ಪ್ರೀತಿ ನಮ್ಮ ಜನ್ಮ ಜನ್ಮೋಗೂ ಒರಿಯೋಡು ನಮ್ಮ ....

 ಭಾಗ್ಯವಂತೆದಿ  ಸಿನಿಮಾದ ಮದಪೆರಾವಂದಿ ಪದ - ಎನ್ನ ನಿನ್ನ  ಪ್ರೀತಿ ನಮ್ಮ ಜನ್ಮ ಜನ್ಮೋಗೂ ಒರಿಯೋಡು  ನಮ್ಮ .... 

 ಆನಿದ ಕಾಲೊಡು   ಪ್ರಾಯೊಡು  ಹೇರಿಯೆರ್ನ ಪುದರ್ ಪನರೆ ಬಲ್ಲಿ  , ಮರ್ಯಾದಿಗ್  ಕಮ್ಮಿ   ಪನ್ಪಿನ  ತುಳುನಾಡುದ ಒಂಜಿ ಕಟ್ಟ್ !   ಅವೆಟ್ಲಾ ಕಂಡನನ  ಪುದರ್ ಪಂಡ   ಆಯುಷ್ಯ ಕಮ್ಮಿ ಆಪುಂಡು ಪನ್ಪಿನ  ಪೋಡಿಗೆಡ್  ಪುದರೇ ಪನಯೆರ್ ! 

ಬುಡೆದಿನ ಪುದರ್ ಪನರೆ ಬಲ್ಲಿಂದ್ ಕಟ್ಟಳೆ  ದಾಲಇಜ್ಜಿ  ಆಂಡಲಾ ಬುಡೆದಿನ್ ಇಂದಯಾ....  ಪಂಡುದೇ ಲೆಪ್ಪುನು .   
ಮಾತೆರೆಗ್  ತಿಕ್ಕುನ ಮರ್ಯಾದಿ ಕಷ್ಟ ಸುಖೋನು ಪಟ್ಟೊಂದು  ಪುಗ್ಗೆಲ್ಗ್ ಪುಗೆಲ್ ಕೊರ್ತಿನ  ಬುಡೆದಿಗ್ಲಾ  ತಿಕ್ಕೊಡು ಪನ್ಪಿನ ಇರಾದೆ ಆದಿಪ್ಪು !

ಇಲ್ಲಡ್ ಏತೇ ಜನ ಉಪ್ಪಡ್  ಇಂದಯಾ ಇಡೆ  ಬಲ್ಲ .. ಪಂಡುದ್   ಇಲ್ಲದ ಗುರ್ಕಾರೆ ಲೆತ್ತೆರ್ಡ  ಅಡಿಪಿಲ್ಲದ  ಬಾಕಿಲ್ಡ್  ಮುಂಡೆ ಪಿದಾಯಿ ಪಾಡ್ದು ಇಂದೇ ಇತ್ತೇ ಬತ್ತೆ...   ಪಂದ್  ಓಕುನುನಾಲ್  ಬುಡೆದಿ ಮಾತ್ರ !
ಬುಡೆದಿನ್ ಇಲ್ಲದ ಪಡಸಾಲೆಗ್ ಲೆತ್ತುದ್  ಬತ್ತಿನ ಬಿನ್ನೆರೆಗ್  ಅಲೆನ ಪುದರ್ ಪನಂದೆ  ಮಾನಾದಿಗೆಡ್  ಎನ್ನ ಸಂಸಾರ   ಪಂದ್  ಪರಿಚಯ ಮಲ್ತು ಕೊರ್ಪಿನ ಅಪಗದ ಸಂಸಾರದ ಪೊರ್ಲೆ ಪೊರ್ಲು !

ಕತ್ತೆಲೆದ  ಬದುಕುಗ್ ಬೊಲ್ಪಾವೆರೆಂದೇ ಇಲ್ಲದ ತುಡರಾದ್ ಬತ್ತಿನ ಬುಡೆದಿ ! ಕಂಡನಗ್ ಪೇರ್  ಕೊರ್ದು ತಾನ್ ನೀರ್ ಪರ್ದ್ ಗೊತ್ತವಂದಿಲೆಕ್ಕ ಮೆದಲೆದರುಟ್  ಮೋನೆ ಒಚ್ಹೊಂದು ಕಂಡನೆ ಮನಸಿಡೆಣ್ಣಿನವೇನ್ ಮಂಡೆಡ್ ದೀದ್ ಕೈಟ್ ಮಲ್ತ್ ತೋಜಾವುನಾಲ್, ರಾತ್ರೆ ಪಗೆಲ್ ಇಲ್ಲದ ಮರ್ಯಾದಿಗ್ ಪುಣೆಯಿನಾಲ್ ಪೊರಂಬಿನಾಲ್  ಜತೆಟ್ ಒಂಜಿ ದಿನ ಇಜ್ಜೊಲುಡ್ಲಾ  ಬದ್ಕ್ ದಾಯೆಗ್ ಪನ್ಪಿನ ಮನಸ್ಥಿತಿಗ್ ಬತ್ತುದ್  ಅಪ್ಪೆ ಇಲ್ಲಗ್ ವರ್ಷೋಗೊರಲಾ ಪೋಯೆರೆ ಬುಡಂದಿನ ಕಂಡನನಕುಲು ಅಪಗ  ಏತ್  ಬೋಡು! 

ಒರಿಯನ ಸುಖೋಕು ಒರಿ ಜೂವ ತೇದಿನಕುಲು ! ಒರಿಯಗಾದ್ ಒರಿ ಜೂವ ಕೊರ್ತಿನಕುಲು . ನಂಬುದು ಒಟ್ಟಾತಿನಕುಲು ಮದಿಮೆದ ದಿನತ್ತಾನಿ  ಗೋಡಿನ  ನಮ್ಮ ಬ್ರಹ್ಮ ಗಂಟ್  ಜನ್ಮಾಂತರೊಗು ಬಿರಿಯಂದಿನ  ಪನ್ಪಿ ಕಟ್ಟಲೆದ  ಅಡಿಟ್ ನಡತಿನಕುಲು ನಮ್ಮ ಹೆರಿಯೆರ್ ! ಅವು ಸತ್ಯೋದ  ಕಾಲ  ಸಂಸಾರ  ಆಲೀದಾಂತೆ  ಒರಿಯೊಂದಿತ್ತುಂಡ್ !

1981ಡು ಕೆ.  ಎನ್.  ಟೈಲರ್ ತನ್ನ ಕ೦ಡನೆ ಬುಡೆದಿ ಪನ್ಪಿನ  ಪುದರ್ ಪೋಯಿನ ನಾಟೊಕೊನು  ಭಾಗ್ಯವಂತೆದಿ ಪನ್ಪಿ ಪುದರ್ಡ್  ಸಿನಿಮಾ ಮಲ್ತೆರ್ !  ಕೂಡು ಕುಟುಮದ  ಪೊರ್ಲುನು ಕಣ್ಣಾರೆ ತೂತಿನ ಟೈಲರ್ ಬೊಕ್ಕ ಮಚ್ಚೇ೦ದ್ರನಾತೆ ರ್ನ   ಸಾಹಿತ್ಯೋಡು  ಮೂಡುದು ಬತ್ತಿನ  ಈ ಸಿನಿಮಾದ ಪದ ಅಪಗದ  ಸಂಸಾರ  ಜೀವನದ ಪೊರ್ಲುನು ಮೈ ನಿಲಿಕೆ ದಿಂಜಾವೊಂದು ಫುದರಾಂಡ್ ! ಎಸ್ ಪಿ ಬಾಲ ಸುಬ್ರಮಣ್ಯ೦  ಬೊಕ್ಕ ವಾಣಿ ಜಯರಾಂ ಮೊಕುಲು   ಸಂಸಾರ ಸಾಗರದುಲಾಯಿ ಮೋಕೆಡ್ ತನ್ಕುಲೆ ಮುರ್ಕುದು ಲಕ್ಕುದಿಲಕ್ಕ   ಸ್ವರಗೋಡ್ಸಾದ್  ಪಂಡಿನ ಪದ    ಎನ್ನ ನಿನ್ನ  ಪ್ರೀತಿ ನಮ್ಮ ಜನ್ಮ ಜನ್ಮೋಗೂ ಒರಿಯೋಡು  ನಮ್ಮ .... ಅಪಗದ  ಕಾಲದ  ಏತೋ ಬಿದಿರ್ದಿ  ಮನಸುಲೆನ್  ಒಂಜಿ ಮಲ್ಪಾಯನಾ  ದೇವೆರೆಗೇ  ಗೊತ್ತು !


ಕಾಲ ಬದ್ಲಾ೦ಡ್  ...
ಕಲ್ಜಿಗ ಬತ್ತುಂಡ್
ನಾಲಕ್ಷರ ಕಲ್ತಿನಕಲ ನಡುಟ್  ಇತ್ತೇ  ಕಾನೂನು ಪಾತೆರೊಂದುಂಡು  !

ಆಯೆ ಗೂಂಜಿಡ್  ಬುಡಯೆ  ಮೋಲು  ರಚ್ಚೋಡು  ಬುಡಯಲ್  ಪನೊಂದು ದಿನಾ ಕಂಟ್ಯುನ ಕಂಡನೆ ಬುಡೆದಿಕಲೆನ್ ತೂವೊಡಾಂಡ ಇತ್ತೇ ದೂರ ಪೋವೊಡುಂದು  ಇಜ್ಜಿ . ಇಲ್ಲದ  ಕಂಡಿಡ್  ನಿಲ್ಕಯರ್ಡ  ಬೋಡಾಯಿನಾತ್ ತಿಕ್ಕುವೆರ್! ಇಂಚಪ್ಪ ಇಂಚಪ್ಪ ಕಂಡನೆ ಬುಡೆದಿನ  ದುಂಬುದಂಚಿನ  ಮೋಕೆ ನಾಡೊಡಾಂಡ   ಅರೆಗಾಲದ ಬಚ್ಚಿದಿ  ಗುವೆಲ್  ನಿಲ್ಕಾವುಲಕ್ಕ ಅತುಂಡು ! ಮದಿಮೆ ಆದ್  ಆಜಿ-ಮೂಜಿ ತಿಂಗೊಲುಡು ಬೊಕ್ಕ,ಅಡೀಟ್  ವಂತೆ ಕುರೆ ನೀರ್ ಇತ್ತುಂಡ ಅವ್ವೆ ಮಲ್ಲೆ!

ಸಂತಾನ ಸಂತೈಸಿ  ತೂದು ಆಣ್-ಪೊಣ್ಣು ಕೊನಪಿನ  ಕಟ್ಟ್  ಪೊಲಿದುಂಡು ! ಮೋನೆದ  ರಂಗ್, ಕಣ್ಣುದ  ಮೆಂಚಿಗ್ ಮರ್ಲಾದ್ ಮದಿಮೆ ಆಯಿನಕುಲು ಇಲ್ಲದ ಒಂಜೇ ಕುಬಲ್ದುಲಾಯಿ ತೆರಿಯಂದಿ  ನಾಲ್ ಬಾಸೆಲೆನ್ ಪಾತೆರೊಂದು ಒರಿಯಗ್ಲಾ  ಅರ್ಥ ಆವಂದಿಲೆಕ್ಕ ಬದುಕೊಂದುಲ್ಲೆರ್ ! ಮದಿಮೆ ಆಯಿ ನಾಲೇ ತಿಂಗೊಲುಡು ಮನಸ್ ತುಂಡಾದ್  ಮೊಂಡಾದ್ ಎಂಕ್ ನಿನ್ನ ರೋಟಿ-ಪರೋಟ ಬೋಡ್ಚಿ  ನಿಕ್ಕ್ ಎನ್ನ ಉಪ್ಪಡ್ ಪಚ್ಚಿರ್ ಅಜವರೆ ಬರ್ಪುಜಿ   ಪನೊಂದು  ಜೊಟ್ಟುಡು -ಮುಟ್ಟುಡು ಪತೊಂದು  ಉರ್ದೊಂದು ಉಲ್ಲೆರ್ !

ಆಯಿನ ಮಾತಾ ಆಂಡ್ .....

ಇನಿಕ್ಲಾ ತುಳುನಾಡುದ ಮಣ್ಣುದ  ಕಮ್ಮೆನೆದ  ಗುರ್ತ ಇತ್ತಿನಕುಲಾಂಡ, ಸಿರಿಯಪ್ಪೆನ ಜಾಲ್ದ ಗುವೆಲ್ದ ನೀರ್ ಪರ್ತಿನಕುಲಾಂಡ     ಬುಡೆದಿಡ /ಕಂಡನಡ  ಲಡಾಯಿ ಮಲ್ತ್  ಈ ಜನ್ಮೋಡು  ನಿನ್ನ ಮುಸುಂಟು ತೂವಯೆ  ಪನ್ಪಿನ ರಡ್ಡ್ ಮನಸ್ ಮಲ್ತಿನಕುಲಾಂಡ  ಇಲ್ಲದ ತೋಟದ ಸುರಗೆದ ಮರತಡಿತ ನೆರೆಲ್ಡ್ ಕುಲ್ಲೊಂದು ಅರಾಲ್ದಿನ ಸುರೆಗೆದ ಪೂತ ಕಮ್ಮೆನೊನು ಮೂಕೊರ್ಮೆ  ದಿಂಜಾವೊಂದು  ಈ ಪದೊನು  ಒರಾ-ನನೊರ-ಬೊಕೊರ   ಕೇನ್  ತೂಲೆ !
ಸುರೆಗೆದ  ಪೂತ ಕಮ್ಮೆನದಲಕ್ಕನೆ ನಿಕಲ ಕಲಂಕಿನ ಮನಸ್ ನ್  ತಲ್ಮನೆ ಮಲ್ತ್  ಒಪ್ಪ ಒರ್ಮನೇ ಮಲ್ತು ಕೊರು .....

ಬೇತೆ  ಬೇತೆ   ಆವೊಡುಂದು  ನಿಗಂಟ್ ಮಲ್ತಿತ್ತರ್ಡ  ಮನಸ್ ಬದ್ಲಾವೆರೆಲಾ  ಯಾವು !!