Pattanaje kavi gosti-tulu world radio

ತುಳು ವರ್ಲ್ಡ್  ರೇಡಿಯೋದ ಮಾತಾ  ಶ್ರೋತೃ ತುಳು ಬಂದುಲೆಗ್   ಶಾಂತಾರಾಮ್ ಶೆಟ್ಟಿನ  ಸೊಲ್ಮೆಲು
ಇನಿ ಬೇಷ ತಿಂಗೊಲು  ಪತ್ತನೆ ದಿನ  ಪಂಡ ಪತ್ತನಾಜೆ .
 ತುಳುವೆರ್ನ   ಮಾಯಗಾರನ  ಕೈತಡಿತ  ಬದ್ಕ್ . ದೈವ ದೇವೆರೆನೆ  ದಯೊಟ್ಟು  ಈ   ಬೂಮ್ಯಪ್ಪೆನ ಮಟ್ಟೆಲ್ಡ್  ನಲ್ಪೆರುಂದ್  ಗೆಜ್ಜೆ ಕಟ್ಟೊಂದು ನಮ ಮಾತಾ ಬತ್ತ  . ನಲ್ತ್  ಸಾಕಾಯಿ ಪೆಟ್ಟುಗ್  ಗೆಜ್ಜೆ ಗಿಚ್ಚಾದ್  ದೀದ್  ಆಯನಡೆಗೆ ಪಿದಾಡೊಡ್.  ಉಂದೆ  ಅತ್ತೆ     ಬದ್ಕದ ಪಜ್ಜೆ ಪಂಡಾ , ಉಂಡೆ ಅತ್ತೆ  ತುಳುವೆರೆನ  ಬದ್ಕ್ ದ  ಪತ್ತನಾಜೆ ಪಂಡ .  ಆಟ ನಲ್ತಾ , ಕೋಲಾ ತೂಯ , ಭಜನೆ ಪಂಡ , ಬೆನ್ನಿದ ಜೋಕುಲು  ಬೇಲೆಗ್  ಕಂಡದ  ಪುಣಿ ಬರಿಕ್  ಪಿದಾಡುನ ಪೊರ್ತು ಆಂಡ್ .
ತುಳುವೆ ಬೆಣಂದೆ   ತಿಂದಿನಾಯೆ ಅತ್ತ್

 ಪತ್ತನಾಜೆದ  ಈ ವಿಶೇಷ ದಿನೊನು  ಒಂಜಿ ಪೊಸ ದೇಕಿಡ್    ಸುರು ಮಲ್ಪೊಡು  ಪನ್ಪಿನ ಆಸೆಡ್  ತುಳು ವರ್ಲ್ಡ್ ರೇಡಿಯೋ  ಇನಿ ಆಯೋಜನೆ ಮಲ್ದಿನ  ಪತ್ತನಾಜೆದ ಕಬಿಕೂಟದ   ಈ ವಿಶೇಷ ಕಾರ್ಯಕ್ರಮದ  ಉದಿಪನೊಗು  ಮಾತಾ  ತುಳುವಪ್ಪೆನ ಜೋಕುಲೆನ್  ಮೋಕೆಡ್  ಎದ್ಕೋನೊಂದು   ಉಲ್ಲೆ .  ಬಲೇ ಈ ಕಬಿ ಕೂಟೊಗು  ನಮ ಮಾತಾ ಕೆಬಿಯಾಕ.
-----------------------------------------------------------------------------------------------------

ತುಳು  ಪುಸ್ತಕದುಲಾಯಿ  ಡೆಂಗ್ ದ್  ಕುಲ್ಲುದಿನ ಬಾಸೆ  ಅತ್ತ್. ಉಂದು  ಯಾನ್ ಬರೆತಿನ , ಉಂದು  ಎನ್ನ ಆಸ್ತಿ ಪಂಡುದ್  ನಮ ಅವೆನ್ ಗಂಟ್ ಕಟ್ಟುದು  ಉಲಾಯಿ  ದೆಂಗ ದೀಯೆರೆ ಆಪುಜಿ. ಬಾಸೆ ಬುಲೆವೊಡಾಂಡ  ಅವು ಜನಮಾನಿನ  ಬಾಯಿಡ್ ನಲಿಪೊಡು
 ತುಳು ಸಾಹಿತ್ಯ ಒರಿಯನ   ಪದವಾದ್  ಯಾಪೊಗುಲಾ ಒರಿದಿಜಿ . ತುಳು ಜನೊಕುಲೆನ ಪದವಾದ್ , ಜನಪದವಾದ್  ಇನಿ ಮುಟ್ಟಲಾ ಬಾಯಿಡ್ದ್  ಬಾಯಿಗ್ ಬುಲೆದಿನಿ , ಬಲದಿನಿ  . ಕನ್ನಡದ ಕವಿ  ಬೇಂದ್ರೆ ಪಂಪೆರ್   ಬರೆಯುವ ವರೆಗೆ  ಮಾತ್ರ ಅದು ನನ್ನ ಪದ , ನಾನು ಬರೆದ ಮೇಲೆ ಅದು ಜನಪದ . ಜನಪದ ಆಂಡಾ  ಮಾತ್ರ ಆ ಸಾಹಿತ್ಯ ಜನೊಕುಲೆನ ನಡುಟ್  ಒರಿಯುನು . ತುಲುಲಾ ಅಂಚನೆ . ಬಡವೆ  ಮಲ್ಲಾಯೆ ಯೆ ಪನ್ಪಿ ಬೇದಾ ಇಜ್ಜಾ೦ದೇ   ನರಮಾನಿ ಬಾಯಿಡ್  ಪಾರ್ದನವಾದ್   ನಲಿತುಂಡ್ ,
ಸಂದಿಯಾದ್  ಉಡಿತ್ತುಂಡ್ , ಕ೦ಡದ ಕೇಸರ ನಡುಟ್   ಓ ಬೇಲೆ  ಆಂಡ್  ನೀರ ಒಯ್ಲಿಡ್ , ಸುಲಿಟ್  ಐ ಲೇಸಾ ಆಂಡ್ , ದೈವ ದೇವೆರ್ ಕಾರ್ನಿಕ  ಪುರುಷರ ನಡುಟ್ ಡೆನ್ನಾನ ಡೆನ್ನಾನ  ಆಂಡ್ , ಕೊರ್ರ ನ  ಬಾಯಿಡ್  ಲೇಲೆ ಪಾಡುಂಡ್ , ಏರು ಮಾದಾವೂನಾಯನ , ಬೋರಿ  ದೇರುನಾಯನ  ಬಾಯಿಡ್  ಒರಲಾಂಡ್ . ಏಲ್  ಕಡಲ್  ದಾಂಟಿನ  ಪೇರ ನೀರ್ ದಂಚ ಇನಿಕ್ಲಾ  ಅಲೀದಾಂತೆ  ನಲ್ತ್ತೊಂದುಂಡು.  ನನ  ದುಂಬೊಗುಲಾ  ಇಂಚನೇ ನಲಿತೊಂದುಪ್ಪುಂಡು  ಪನ್ಪಿನ   ತೂವನ ತಿಗಲೆ ದ  ಬೊಟ್ಟು

====================================================================

ಸಾವಿರತ್ತ ಒರಾಂಬಾನುತ್ತ  ಇರ್ವೊಡು  ಸುರುವಾದ್  ಸಾವಿರತ್ತ ಒರಾಂಬನುತ್ತ  ಐವ್ವ  ಮುಟ್ಟದ ಪೊರ್ತುನು  ಕನ್ನಡದ ಕಾವ್ಯ ನವೋದಯದ  ಸುವರ್ಣ ಯುಗ  ಪಂಡುದ್  ಲೆತ್ತೊಂದಿತ್ತೆರ್ .   ಕುವೆಂಪು, ಬೇಂದ್ರೆ ಮಾಸ್ತಿ  ಇಂಚಿತ್ತಿ ಮಲ್ಲ ಬರವುದಾರರೆ  ಇತ್ತಿನ ಪೊರ್ತು ಅವು .  ಅವ್ವೆ ಪೊರ್ತುಡು  ತುಳು ಸಾಹಿತ್ಯ ಲೋಕಲಾ  ಬಾರಿ  ಸುದ್ದಿಡ್  ಇತ್ತುಂಡ್ . ಸ್ವಾತಂತ್ರ್ಯದ  ಪೊರ್ತುಡು  ಜವನೆರೆನ್ ಕೂಡುಕಟ್ಟುನ , ದೇಶಭಕ್ತಿ ಪುಟ್ಟಾವುನ   ಕಬಿತೆಲೆನ್ ಬೋಡಾಯಿನಾತ್  ಬರೆಯೆರ್ .    ನರ್ಕಳ ಮಾರಪ್ಪ ಶೆಟ್ರ್ , ಕೆಂತೂರು  ದೊಡ್ಡಣ್ಣ ಶೆಟ್ರು , ನಾರಾಯಣ ಕಿಲ್ಲೆರ್ , ಸೀತಾರಾಮ್ ಕೆಳಂಜೆ ,ಎಸ್ ಯು  ಪಣಿಯಾಡಿ , ಮೋನಪ್ಪ ತಿಂಗಳಾಯ , ದೂಮಪ್ಪ ಮಾಸ್ಟ್ರು  ,  ಇಂಚಿನ  ಮಲ್ಲ ಬರವುದಕುಲು  ಬೋಡಾಯಿನಾತ್  ಎಡ್ಡೆಡ್ದೆ  ಬರವು ಬರೆಯೆರ್ .  ಆಂಡ  ತುಳುವಪ್ಪೆ ಜೋಕುಲೆಗ್ ತಿಕ್ಕೋಡಾಯಿನ  ಮಾನಾದಿಗೆ ಅಪಗ ತಿಕ್ಕಂದೆ ಪೋಂಡು. ಮಾನಾದಿಗೆ  ತಿಕ್ಕಂದಿ  ಪೊರ್ತುಡು    ಗೋವಿಂದ ಪೈ , ಪಂಜೆ ಮಂಗೇಶ ರಾಯೆರ್ , ಕಿಣ್ಯಣ್ಣ ರೈಕುಲು  ಇಂಚಿನ  ಬಿರ್ಸುದ   ಬರವುದಕಲೆನ್ ನಮ  ಕನ್ನಡೊಗು ಬುಡು ಕೊರೊಡಾಂಡ್ .   ಅಕೇರಿದ ಪ್ರಯತ್ನ  ಮಲ್ತಿನ  ಡಾ, ವಿವೇಕ್ ರೈಕುಲು , ಡಾ. ಅಮೃತ ಸೋಮೇಶ್ವರ್ , ಡಾ. ಸೀತಾರಾಮ್ ಕುಲಾಲ್ , ವಾಮನ ನಂದಾವರ, ಡಾ. ಚಿನ್ನಪ್ಪ ಗೌಡ  ಡಾ. ಡಿ ಕೆ ಚೌಟೆರೆನ್ ಅಂಚನೆ ಕೆ ಎನ್ ಟೈಲಾರ್  ಈ ಪೊರ್ತುಡು  ನಮ  ನೆನೆಪೊಡು.  ಅವೆಡ್ದು  ದುಂಬುಗು   ತುಳು ಸಾಹಿತ್ಯದ ಬೂಡುಡು ಪಾಕ ಸಮಯ ಬರಗಾಲದ    ಬೆಚ್ಚ ಗಾಳಿ ಬೀಜಿಂಡ್.  ತುಳು ಸಾಹಿತ್ಯ ಅಡಿಪತ್ತ್  ಕರೆಂಚಿ ಪೋಂಡು.
ಇಂಚಪ್ಪ ಇಂಚಪ್ಪ  ಒಂಜಿ ತಲ್ಮೆನದ ತಂಪು  ಗಾಲಿ ಕುಡೋರ   ಬೀಜೊಂದುಂಡು. ಪೋಸ  ಮೋನೆಲು   ತುಳುವಪ್ಪೆನ  ಪರ ಕುಂಟು  ಮಾತುದ್    ಜರಿ  ಸೀರೆ  ತುತ್ತಾವುನ   ಬೇಲೆಗ್ ಜೈದೆರ್ .
ಇತ್ತೆದ  ತುಳುತ ಹೆರಿಯೆರ್  ಪಿರಾವುದ   ಐವ್ವ  ವರ್ಷದ   ತುಳುತ ಅನುಭವೋನು  ದುಂಬುದ ಐವ್ವ  ಒರ್ಷೋಗು  ಕೊನಪಿನಕ್ಕ  ಜವನೆರೆಗ್ ಸಂಕೊಳಿಗೆ ಆವೊಡು . ಹೇರಿಯೆರ್ - ಕಿರಿಯೆರ್ನ ನಡುಟ್   ಅನುಭವದ  ನುಡಿ ತಾದಿ  ಜೋಡಿಸಾವುನ  ಸಂಕ  ನಮ ಕಟ್ಟೊಡು .  ಅಂಚಾಂಡ  ಮಾತ್ರಾ ತುಳುವಪ್ಪೆನ  ಜಾಲುಡ್   ನನಾತ್  ನಲಿಕೆಲು  ನಲಿಪು
------------------------------------------------------------------------------------------------

 ತುಳುವಪ್ಪೆಗ್ ಇತ್ತೇ ದಾಲ ಬಡಪತ್ತ್  ಇಜ್ಜಿ .   ಈ ಬೂಮಿಯಪ್ಪೆನ  ಉಡಲಿಡೀ   ಅಲ್ನ ಜೋಕುಲು
ಪಸರ್ದೆರ್ . ಗಟ್ಟಿಡ್ ಬೆಂದುದ್   ಬೇರ್ ಜಪುಡಾದೆರ್ .  ಗೋಲಿದ ಮರತಲಕ್ಕ   ತನ್ನಡಿಕ್   ಬತ್ತಿನಕ್ಲೆಗ್ ಮಾತಾ  ನೆರೆಲಾವೊಂದುಲ್ಲೆರ್ . ಆಂಡ ತಣ್ಣಪ್ಪೆನ  ಜಕ್ಕೆಲ್ಡ್  ಕಲ್ದಿ  ಪಾತೆರೊನೆಲ್ , ಮರ್ಯಾದಿಲೆನ್   ಮದದಿಜೆರ್ .   ತುಳು ವರ್ಲ್ಡ್  ರೇಡಿಯೋ  ನಡಪಾದ್  ಕೊರ್ಪಿನ  ಈ ಪತ್ತನಾಜೆದ  ಗೌಜಿ  ಉಂದು  ಮೂಜಿನೆದ  ಲೇಸ್ . ಇದಮುಟ್ಟ  ತುಳುನಾಡುದ  ಉಲಾಯಿದುಲಾಯಿದ   ಸಾಹಿತಿಲು  ಒಟ್ಟಾವೊಂದಿತ್ತೆರ್ . ಆಂಡ ಈ ಸಲ  ಪಿದಾಯಿ ಊರುದ , ಬೊಂಬಾಯಿದ  ಮಲ್ಲ  ರಂಗಕರ್ಮಿ  ನಂದಳಿಕೆ ನಾರಾಯಣ ಶೆಟ್ರು , ಡಾ. ಪೂರ್ಣಿಮಾ ಶೆಟ್ಟಿ , ಪೇತ್ರಿ ವಿಶ್ವನಾಥ್  ಶೆಟ್ಟಿ   ರಂಗ ಕಲಾವಿದೆ   ಸುರೇಂದ್ರ ಮಾರ್ನಾಡ್ , ಗಾಯಕಿ ಸಾಹಿತಿ ಸ್ವಷ್ಮಿ ಸತೀಶ್ ಶೆಟ್ಟಿ , ಸುಜಾತಾ ಉಮೇಶ್ ಶೆಟ್ಟಿ  ಲೀಲಾ ಗಣೇಶ್  ಇಂಚಿನ ಮಲ್ಲ ಮಲ್ಲ  ಬರವುದಕುಲು   ತಮ್ಮ ಇಷ್ಟದ  ಕಬಿತೆಲೆನ್ ಪೊರ್ಲುಡು ಓದುದೆರ್ .  ತುಳು  ಬಾಸೆ ಇತ್ತೇ ಘಟ್ಟದ ಮಿತ್ತುಲಾ  ಸುದ್ದಿ ಆವೊಂದುಂಡು  ಪನ್ಪಿನೈಕ್   ತುಳುವೆರೆಂಕುಲು ಬೆಂಗಳೂರುದ  ಕಾರ್ಯದರ್ಶಿ  ಪಳ್ಳಿ ವಿಶ್ವನಾಥ್ ಶೆಟ್ಟಿ , ಯಾದವ ಕಲ್ಲಾಪು   ಮೊಕಾಲ ಕಬಿತೆಳು ಸಾಕ್ಷಿ . ಸಕಲೇಶ್ ಪುರದ  ಪ್ರಶಾಂತ್ ಪನ್ಪಿನ  ಜವನೆ  ಎದ್ದೆ ಪದ ಪನ್ಪಿನಾರ್   ನರ್ಕಳ ಮಾರಪ್ಪ ಶೆಟ್ರೆನ  ಒಂಜಿ ಕಬಿತೆನ್ ಓದುದೇರ್ .
 ಎಲ್ಯ ಜೋಕುಲೆಗ್  ಸಾಹಿತ್ಯದ ಆಸಕ್ತಿ ಪುಟ್ಟಂಡ  ಮಾತ್ರ   ತುಳು ದುಂಬುಗು ಬುಳೆವು  ಪನ್ಪಿನ  ನಿತ್ಯ ಸತ್ಯ . ಬೊಂಬಾಯಿದ  ರಡ್ಡ್ ಎಲ್ಯ ಜೋಕುಲು ಸುವಿದ್ ಮಾರ್ನಾಡ್ , ಬೊಕ್ಕ ವಿವಾನ್ ಶೆಟ್ಟಿ  ಪೊರ್ಲುಡೇ  ತುಳು ಕಬಿತೆಲೆನ್ ಓದುದೇರ್ . ಬೆಂಗಳೂರುದ  ಭುವನ್ ಶೆಟ್ಟಿ  ಒಂಜಿ ಪದೋನು  ಪೊರ್ಲುದ ರಾಗೋಡು ಪಂತೆರ್.

 ಈ ಸಲ  ಜವನೆರ್ನ ಒಟ್ಟುಗು  ಸೇರೊಂದು  ಹೇರಿಯೆರ್ ಆಯಿನ  ಪುಗಾರ್ತೆದ ಕವಿ ಮುದ್ದು ಮೂಡು ಬೆಳ್ಳೆ  ಬೊಕ್ಕ   ಸದಾನಂದ ನಾರಾವಿ  ಮೊಕುಲುಲಾ  ಈ ಕಬಿಕೂಟೊಗು ಬೆರಿಸಾಯದ್ ಉಂತುದೆರ್ . ತುಳುನಾಡುದ ಮಲ್ಲ  ಬರವುದಾರೆರ್ ಆಯಿನ  ಭಾಸ್ಕರ್  ರಾಯ್ ಕುಕ್ಕುವಳ್ಳಿ , ಮಹೇಂದ್ರ ನಾಥ  ಸಾಲೆತ್ತೂರ್ , ವೀಣಾ ಶೆಟ್ಟಿ ,ವಿಜಯ ಶೆಟ್ಟಿ ಸಾಲೆತೂರ್ , ಕುಶಾಲಾಕ್ಷಿ ಕುಲಾಲ್ ಕಣ್ವ ತೀರ್ಥ , ವಿಜಯಲಕ್ಷ್ಮಿ ಕಟೀಲ್  ತೋನ್ಸೆ ಪುಸ್ಕಳಕುಮಾರ್ , ಅಕ್ಷತರಾಜ್ ಪೆರ್ಲಾ  , ಲತೀಶ್  ಸಂಕೊಳಿಗೆ  ಯತೀಶ್ ಕಾಮಾಜೆ , ತುಳು ಲಿಪಿ ತಾ  ಶಿಕ್ಷಕಿ  ವಿದ್ಯಾಶ್ರೀ  ಸುಧಾಕರ್ ಉಳ್ಳಾಲ್, ಶೋಭಾ ವಾಲ್ತಾಜೆ , ಪ್ರೊಫೆಸರ್ ಪುರುಷೋತ್ತಮ್ ಬಲ್ಯಾಯ   ಮಲ್ಲಿಕಾ ಜೆ ರೈ ,  ನೈಜೀರಿಯಡ್  ಉಪ್ಪುನು ಶರತ್ ಶೆಟ್ಟಿ ಪಡುಪಲ್ಲಿ , ಜಯ ಪ್ರಕಾಶ್ ಶೆಟ್ಟಿ ಅಂಗಡಿದಾರು , ಕುಸುಮ ಸಾಲಿಯಾನ್ ಪುಣೆ , ರತ್ನಾಕರ್ ಎಸ್  ಓಡಂಗಲ್ಲು , ಸನ್ನಿದಿ ಟಿ.  ರೈ   ಮೊಕುಲು ಮಾತಾ   ಪುಗ್ಗೆಲ್ ಕೊರ್ತೆರ್ .  ತುಳುವರ್ಲ್ಡ್ ರೇಡಿಯೋ ದ  ಪರವಾದ್  ಮಾತೆರೆಗ್ಲಾ  ಉಡಲ್ ದಿಂಜಿನ  ಸೊಲ್ಮೆಲೆನ್  ಸಂದಾಯ್ತಾ ಮಲತ್ತೊಂದುಲ್ಲೆ

================================================xxxxxxxx




ನಮ ತಾಳ ಮದ್ದಳೆದ  ಸಂಸ್ಕ್ರಿತಿಡ್  ಬತ್ತಿನಕುಲು . ಎದುರಾ ಎದುರು  ಕುಲ್ಲೊಂದು  ಕೃಷ್ಣ ನ್  ಕಪಟಿ ಪಂದ್ದು  ಲೆತ್ತಿನ ದುರ್ಯೋಧನೇ ,  ದುಸ್ರ್ಯೋಧನಂ ದುಷ್ಟ  ಪಂಡುದ್ ಲೆತ್ತಿನ ಕೃಷ್ಣೆ   ತಾಳ ಮದ್ದಳೆ  ಮುಗಿಬೊಕ್ಕ   ಮಿತ್ತರ್ಮ್ ಜತ್ತುದು  ಒಟ್ಟುಗು  ಓರಿಯಾಗೋರಿ ಪುಗ್ಗೆಲ್ಗ್ ಕೈ ಪಾಡೊಂದು ಪೋಪಿನವೇನ್ ನಮ ತೂಪ . ಸಾಹಿತ್ಯ ಕ್ಷೇತ್ರಲಾ  ಇಂಚನೇ ಇಪ್ಪೊಡು . ಪೊಸ ಜವನೆರ್   ತನ್ಕುಲೆನ ತಪ್ಪುಲೆನ್  ಒತ್ತೊಂದು  ಕೇನೊಂದು ಸರಿ ಮಲ್ತೊನೋಡು . ಹೆರಿಯೆರ್  ಪೊಸ ಬರವುದ ಜವನೆರೆನೆ ತಪ್ಪುಲೆನ್    ಮೋಕೆಡ್ ತ ತಿದ್ದ್ ದ್  ಬೆರಿ ಬೊಟ್ಟೋಡು.  ಅಂಚಾಂಡ ಮಾತ್ರ  ದುಂಬುಗು  ನನಾತ್ ಎಡ್ಡೆ ಬರವುದಕುಲು   ಈ ತುಳುನಾಡುಡ್  ಪುಟ್ಟುವೆರ್ .  ಪ್ರಶಸ್ತಿಗೋಸ್ಕರ ಬರೆಪಿನ ಅಭ್ಯಾಸ ಉಂತಾವೊಡು .  ಬರವು ಜನಮಾನಿಲೆನ್  ಮನಸ್ ಮುಟ್ಟೊಡು . ಅವ್ವೆ ನಂಕ್ ಬಿರ್ದ್  ಬೀರ್ದಾವಳಿಲು.   ಮಾತಾ ಗೊತ್ತಿತ್ತಿ ಕವಿ ಸರ್ವಜ್ಞಗ್ , ನಾಲ್ ಲಕ್ಷ ಎಲ್ಪತ್ತೈನ್  ಸಾವಿರ ಪದ ಬರೆಯಿನ  ಪುರಂದರ ದಾಸೇರ್ಲೆಗ್  , ಕನಕದಾಸರೆಗ್   ಓಳು ಪ್ರಶಸ್ತಿಲು  ತಿಕ್ಡುಂಡ್ .

ಕವಿ ಡಾ. ದೊಡ್ಡ ರಂಗೇ ಗೌಡೆರ್  ಪನ್ಪರ್
ಕವಿತೆ   ಬರೆಯುವಾಗ  ಅಣಕಿ ಬರೆಯಬಾರದು  ಇಣುಕಿ ಬರೆಯ ಬಾರದು , ತಿಣುಕಿ ಬರೆಯಬಾರದು , ಕೆಣಕಿ ಬರೆಯಬಾರದು  .
 ಬರವು ತುಳುವೆ ಪೆಲಕಾಯಿದ ಪಚ್ಚಿರ್ಡ್ ಲಕ್ಕ  ಉಪ್ಪೋಡುಗೆ . ಕಷ್ಟ ಬೂರ್ದು  ಬರೆಯರೇ ಬಲ್ಲಿಗೆ , ನಿಲ್ಕದ್  ಕಂಡುದ್  ಬರೆಯರೇ ಬಲ್ಲಿಗೆ , ಬೇತೆಗಳ  ಮನಸ್ಸುಗ್  ಬೇನೆ ಮಲ್ತು ಬರೆಯರೇ ಬಲ್ಲಿಗೆ , ಅಗಲೆನ್ ಕೂಂಕವರೆ ಬಲ್ಲಿಗೆ .

ಸುರೇಂದ್ರ ಮಾರ್ನಾಡ್   ಓದಿನ  ಮಣ್ಣ  ಬಾಜನದ ಕವಿತೆ  ಕರಿಯಜ್ಜರ್ ತೀರಿಯೇರ್   ಪನ್ಪಿನೈಟ್  ಯಾನ್ ಉಂದೆನ್ ಬರೆತೆ.  .
 ಬಂಗಾರ್  ಕರಿಯಜ್ಜರ್  ಎಂಚ ಇತ್ತೆರ್  ಪಂಡಾ  ಆರ್ ಕಾಂಕಾಯೆರ್  ಕೂಂಕಾಯೆರ್  ಕೇಂಕಾಯೆರ್  ಕೊಂಕಾಯೆರ್. ನಡಪನಗ  ಕಾರಡಿಟ್  ಪಿಜಿನುಂಡಾ  ತೂವೆರ್ !
 ನಮ್ಮ ಬರವು   ಓದುನಕ್ಲೆಗ್  ಖುಷಿ ಕೊರಂಡಂ  ಅವ್ವೆ  ನಂಕ್ ಮಲ್ಲ ಪ್ರಶಸ್ತಿ .
 ================================================================


ಕವಿ ಎಚ್  ಎಸ್ ವೆಂಕಟೇಶ್ ಮೂರ್ತಿ  ಪಂಪೆರ್

ಬಾಷೆಯನ್ನು ಬೆಳೆಸುವುದು ಬೇಡ,   ಬಳಸಿದರೆ ಸಾಕು  !  ತುಳು ಭಾಸೆ ಬುಲೆವೊಡಾಂಡ  ನಮ ಇಲ್ಲಡ್  ಜೋಕುಲೆಡ  ಅವೆನ್ ಪಾತೆರೊಡು . ತುಳುತ ನುಡಿಕಟ್ಟ್  ಪೊರ್ಲಾ ಬಾಸೆನ್  ಜೋಕುಲೆ ಬಾಯಿಡ್  ನಲಿಪಾವುಲೆಕ್ಕ ತೂವೊಡು .   ನಮ್ಮ ಹೆರಿಯೆರ್ನ  ತುಳುವೇ ಸಾಹಿತ್ಯ ಬಾಸೆ.  ಅವ್ವೆನ್ ಇತ್ತೇ ನಮ್ಮ   ಜೋಕುಲೆಡ ಪಾತೆರೊಂದು ಇಜ್ಜ . ಎಂಕುಲು ಎಲ್ಯ ಉಪ್ಪನಗ   ಇಲ್ಲದ ಹೆರಿಯೆರ್  ಜೋಕುಲೆಡ  ನುಡಿಗಟ್ಟುದ , ಗಾದೆದ  ಪಾತೆರದ  ಮುಕಾಂತ್ರ  ಪಾತೆರೊಂದಿತ್ತೆರ್ . ಅವು ಕೇನೇರೆಗ್ಲಾ  ಪೊರ್ಲು ,  ನೆನಪುಡುಲಾ ದೀಯೊಂಡ್ರೆಲಾ  ಸುಲಭ
ಉದಾಹರಣೆಗ್  ಕಲ್ವೆರೆ ಕುರೆ ಕುಂಟು ಆರ್ದು ನಾಯೆ ಪಂಡ  ಉದಾಸೀನದಾಯೆ , ಚಕ್ಕ ಕುದೊಂಡು ಚೌರಿ ಬೀಜವುನು ಪಂಡ  ಬೇಲೆ  ದಾಂತಿನಾಯೆ , ಬೂತ  ಒಂಜಿ ಗಿಂಡೆ ಪೇರ್  ಪರೋಡು   ಪಂದ್ದು  ಕೇಂಡ  ಕೋಲಾ ಕೆನೊಡುಂಡು ,  ರಡ್ಡ್ ಬಂಜಿಡ್  ಮೂಜಿ  ಜೋಕುಲು  ಪಂಡುದ್  ಅಂಡಿಮೆ ಆತಿನ ಪೊಂಜೊವು ಪಂಡಾಲ್ಡ   ಒಂಜಿ ಅಮರ್  ಬಾಲೆಲು   ಪಂಡುದ್  ತೆರಿಯೊನೊಡು , ನಾಯಿನ್  ನೀರ್ಗ್ ನೂಕಿಲಕ್ಕ ಪಂಡ  ಇಷ್ಟ ಇಜ್ಜಿ ಪಂದ್ದು ಲೆಕ್ಕ  ಇಂಚ  ಉಳಾಯಿ ಅರ್ಥ ಕೊರ್ಪಿನ  ಸಾಹಿತ್ಯ ಬಾಸೆಲೆನ್ ನಮ್ಮ ಪರ ತುಳುವೆರ್ ಪಾತೆರೊಂದಿತ್ತೆರ್ . ನಮಲ  ನಮ್ಮ ಜೋಕುಲೆಡ ಇಂಚಿನನೇ ಪೊರ್ಲಾ ನುಡಿಕಟ್ಟ್  ಪಾತೆರ ಪಾತೆರೋದು.   ಅಂಚಾಂಡ ಅವು ನನ ದುಂಬುದ ಜೋಕುಲೆಗ್  ಬಾಸೆದ ತಿರ್ಲಾದ್   ಒರಿಯುಂಡು . ಬಾಸೆ  ಪೊರ್ಲುಡೇ ಬುಲೆವುಂಡು , ಸಾಹಿತ್ಯ ಪಾತೆರ ಪಾತೆರೊಡೆ   ನಲಿತೊಂದು ಉಪ್ಪುಂಡು .

ತುಳುವ ಬಾಸೆದ  ಪೊರ್ಲುನು  ದಿನ ನಿತ್ಯದ   ಬೇಲೆಡ್  ಗಲಸೊಂದು ಅವೆನ್ ಒರಿಪಾವರೆ ನಮ ಮಾತಾ ಪುಣೇರೋಡು  ಪನ್ಪಿನ  ತುಳು ವರ್ಲ್ಡ್  ರೇಡಿಯೋದಾ  ಇನಿತ  ಪತ್ತನಾಜೆ ಕಬಿ ಗೊಸ್ಟಿದ ಮುಖ್ಯ ಉದ್ದೇಶ!
======================================================


ಪತ್ತನಾಜೆದ ದಿನ ಪತ್ತ್ ಪನಿಯಾಂಡಲಾ  ಬರ್ಸ  ಪನಿ ಕುಡ್ಪೊಡುಗೆ . ಇನಿ ಪತ್ತನಾಜೆದ ಕಬಿ ಗೊಸ್ಟಿಡ್  ಪತ್ತೆಡ್ದ್ ಮಿತ್ತೆ  ಕಬಿತೆಲೆನ  ಬರ್ಸ ಪಣಿ  ಕುಡ್ದುಂಡು.  ದುಂಬುದ ಕಾಲದ ಪೆರ್ಮೆದ  ಬರವುದಾರೆರೇನ್  ನೆಂಪುಡು  ದೀಯೊಡುಂದು  ಇನಿ ನಮ ಆಯಿನಾತ್ ಪರ ಕಬಿತೆಲೆನ್ ಓದರೆ  ಕೇನೇರೆ  ಪ್ರಯತ್ನ ಮಲ್ತ . ಆ ಮುಕಾಂತ್ರ  ಅಕಲೆಗ್ ಪತ್ತನಾಜೆದ  ಮಾನಾದಿಗೆ ಮಲ್ತ .  ನನ ದುಂಬುಗುಲಾ   ಈ ಬೇಲೆ  ಪೊರ್ಲುಡೇ ನಡಪೊಡು ಪನ್ಪಿನ  ಮಾತಾ ತುಳುವೆರೆನ  ಅಂಗಲಾಪು .   ಬರವುದ ಕಲೊಕ್ಕು ಜತ್ತಿನ ಪೊಸ ಬರವುದಕುಲು  ಆಯಿನಾತ್  ತುಳು  ಬಾಸೆಗ್ ಪುದರ್ ಕೊನಪಿನ  ಸಾಹಿತ್ಯ ರಚನೆ ಮಲ್ಪೊಡು , ಅಂಚಿನಕ್ಲೆಗ್  ಒಂಜಿ ಮಲ್ಲ ಮಟ್ಟುದ  ಮಿತ್ತರ್ಮ್ ತಿಕ್ಕೊಡು ಪಂಪಿನ ತುಳು ವರ್ಲ್ಡ್ ರೇಡಿಯೋದ  ಉದ್ದೇಶ . ಬಾರಿ ಉಮೇದ್ ಡ್  ಊರುದ ಪರಊರುದ  ದೂರದ ಪರವೂರುದ  ತುಳುವಪ್ಪೆನ ಬಾಲೆಲು  ಖುಷಿ ಕುಷಿಟ್  ಪಾಲ್ ಪಡೆಯರ್ . ಬತ್ತಿನ  ಮಾತಾ ಬಿನ್ನೆರೆಗ್    ಅಂಚನೆ   ತುಳುವರ್ಲ್ಡ್ ರೇಡಿಯೋಡಾ ಡಾ. ರಾಜೇಶ್ ಅಲ್ವಾ ಬದಿಯಡ್ಕ  ಬೊಕ್ಕ ಶ್ರೀನಿವಾಸ್ ಅಲ್ವ ಕಳತ್ತೂರ್ , ಅಂಚನೆ ಮಾತಾ  ತಾಂತ್ರಿಕ ಸಿಬ್ಬಂದಿಲೆಗ್  ಸೊಲ್ಮೆ ಸಂದಾಯ್ತಾ  ಮಲ್ತೊ೦ದು , ಪತ್ತನಾಜೆದ  ಕವಿಗೋಷ್ಟಿದ  ಗುರ್ಕಾರೆ ಸ್ಥಾನದ  ಮರ್ಯಾದಿಗೊಂಜಿ ಅಡ್ಡ ಬೂರೊಂದು  ಅಗಪೆರೆಗ್   ಅನುವು ಕೇನೊಂದುಲ್ಲೆ .
ಅಗಾಪೋಡು ದುಂಬು  ಮಾತಾ ತುಳುವೆರೆಡ  ಒಂಜಿ ಬಿನ್ನಯ   ತುಳು ವರ್ಲ್ಡ್ ರೇಡಿಯೋ ಆಪ್   ಡೌನ್ಲೋಡ್ ಮಲ್ತೊ೦ದು ದಿನಾಲಾ  ತುಳು ಬಾಸೆದ ಪೊರ್ಲುನು ಕೆಬಿ ದಿಂಜಾವೊಂದು  ತುಳುವಪ್ಪೆನ   ಬುಲೆಚ್ಚಿಲ್ಗ್  ಬೆರಿ ಸಾಯಾ  ಆವೊಡಿನ್ಪಿನ  ಅರಿಕೆ ಮಳ್ತೊಂದುಲ್ಲೆ .    ಪತ್ತನಾಜೆಡ್  ತುಳುವೆರೆನ ಉಡಲ್ಡ್  ಮೋಕೆದ ಬಿತ್ತ್  ಕೊಡಿಯಡ್ ಮಾತೆರೆಗ್ಲಾ  ನನೊರ ಸೊಲ್ಮೆಲು.
=========================================================


ಪತ್ತನಾಜೆ ಪಂಡ ಆರಾಧನೆಗ್  ಕಟ್ಟ್ ದಿ  ಗೆಜ್ಜೆ ಗಿರ್ತ್ ದೀಪಿನ ದಿನ. ಈ  ಕಬಿ ಕಜ್ಜದ ಸುರುಟೆ ಪಂಡಿಲೆಕ್ಕ  ನಮ ಮಾತಾ ಗೆಜ್ಜೆ ಕಟ್ಟ್ ದ್  ಬೂಮ್ಯಪ್ಪೆನ ಮಟ್ಟೆಲ್ಡ್   ನಾಲ್ ದಿನ  ತೆಲ್ತ್ ನಲ್ತ್  ಪೋಯೆರ್ ೦ದ್  ಬೈದಿನಕುಲು . ಒವ್ವಾ ಒಂಜಿ ಕಣ್ಣುಗ್  ತೋಜಂದಿ ಪುರಿ ಇನಿ ನಮನ್ ಮಾತಾ ಇಲ್ಲದುಲಾಯಿ ಕುಲ್ಲ  ದೀದ್  ಬೊಡಿಪಾದ್  ಪೊರ್ಲು ತೂವೊಂದು ಉಂಡು . ಈ  ಕಷ್ಟದ ಪೊರ್ತುಡು   ತುಳುವಪ್ಪೆಗ್ ಒಂಜಿ ಅಕ್ಲೇಶದ   ಸಂಗತಿ  ತೋಜಿದ್ ಬೈದುಂಡ್ . ತುಳು ಬಾಸೆದ ಬುಲೆಚ್ಚಿಲ್ಗ್  ಉಡಲ್ಡಿಂಜಿ   ಸಾಯ  ಕೊರೊಂದಿತ್ತಿನ   ಕಾಶಿ  ಕಾಲ ಭೈರವೇಶ್ವರ  ಸಿಲಾಂಜನ ಕ್ಷೇತ್ರದ  ಪರಮಪೂಜ್ಯ  ಸಿದ್ದಿ ಸದ್ಗುರು  ಶ್ರೀ ಶ್ರೀ  ಶಶಿಕಾಂತ ಮಣಿ ಸ್ವಾಮೀಜಿ  ಕಾಯ ಬುದ್ದು ಮಾಯಾ ಸೇರ್ದೆರ್ . ಬಡೆವೆರೆನ್   ಸ್ವಾಮಿಳು ಪಂಡುದ್  ಪುದರಾಯಿನ  ಶಶಿಕಾಂತ ಮಣಿ ಸ್ವಾಮಿಲ್ನ ನೆನಪುಗು ಇನಿತ ಈ ಪತ್ತನಾಜೆ ಕಬಿ ಗೋಸ್ಟಿನ್  ಪೂರಾ  ಬಿರ್ದ್  ಮಾನದಿಗೆಡ್  ಅರೆಗ್ ಅರ್ಪಣೆ ಮಳ್ತೊಂದುಲ್ಲ . ಸ್ವಮಿಳು ಈ ಪುಣ್ಯದ  ಬೂದು ತುಳುನಾಡುಡ್   ನನೊರ  ಪುಟುದು ಬರಡ್  ಪಂಡುದ್  ಪುಡ್ಯನೊಡು  ನಟ್ಟೊನುವ