ಭೂಮಿ ಅಪ್ಪೆನ ಮಾನಾದಿಗೆದ ಪರ್ಬ ಕೆಡ್ಡಸ..

ಭೂಮಿ ಅಪ್ಪೆನ ಮಾನಾದಿಗೆದ ಪರ್ಬ ಕೆಡ್ಡಸ..

ಭೂಮಿಡ್ ಆಪಿನ ಬದಲಾವಣೆ ಕಾಂಡೆ-ಬೈಯ್ಯ, ಪಗೆಲ್ ರಾತ್ರೆ , ದೊಂಬು-ಬರ್ಸ, ಚಳಿ-ಗಾಳಿ ಉಂದು ನರಮಾನ್ಯ ಮೈ ಬೊಕ್ಕ ಮನಸ್‌ಗ್ ತಾಗುನ, ಮೈ ಮನಸ್ ಬದಲಾಪಿನ ಇರ್ಮೆನ ಆಪಿನ ಸಂದರಪ್ಪು ಪಂಡ ರಡ್ಡ್ ಪಾತೆರ ಇಜ್ಜಿ. ಅಂಚೆನೇ ಸಂಕ್ರಾಂದಿಡ್ದ್ ಅಮಾಸೆ ಪುಣ್ಣಮೆ, ಋತು ಬದಲಾಪಿನಿ ಪಂಡ ಪ್ರಕೃತಿ ಬದಲಾಪಿನಿ. ತುಳುವೆರ್ ಈ ಪಿಜುರು ಪೊರ್ತುಲೆಡ್ ಒಂಜೊಂಜಿ ಆಚರಣೆಲೆನ್ ಮಲ್ತೊಂದು ಬಯಿದೆರ್.

ಅಂಚಿತ್ತಿನ ಒಂಜಿ ತುಳುವೆರೆನ ಅಪೂರ್ಪದ ಆಚರಣೆ ಕೆಡ್ಡಸ. ತುಳುವೆರ್ ಪೊಣ್ಣಗ್ ಮಾನಾದಿಗೆದ ಮಣೆ ದೀತೆರ್. ಅಂಚೆನೇ ಭೂಮಿನ್ ಅಕುಲು ಪೊಣ್ಣುಂದು ನಂಬುದೆರ್. ಭೂಮಿ ಅಪ್ಪೆಂದ್ ಲೆಯಿದೆರ್. ಆ ಅರ್ಥೊಡು ಕೆಡ್ಡಸದ ಪೊರ್ತುಡು ಭೂಮಿ ಮದ್ಮಲಾಪೊಲು ಪನ್ಪಿ ನಂಬೊಲಿಗೆ. ಮದ್ಮಲಾಪಿನಿ ಪಂಡ ಪೊಣ್ಣು ಸೃಷ್ಟಿ ಕ್ರಿಯೆಕ್ಕ್ ಅನು ಆಯೊಲುಂದು ಲೆಕ್ಕ. ಮಾಯಿ ಬರ‌್ಪಿ ಸಂಕ್ರಾಂದಿಡ್ದ್ ಮೂಜಿ ದಿನೊಡ್ದು ದುಂಬು ಕೆಡ್ಡಸ ಸುರು ಆಪುಂಡು. ಫೆಬ್ರವರಿ ತಿಂಗೊಲ್ದ ನಡುಟ್ಟು ಬರ‌್ಪುಂಡು. ತುಳುವೆರೆ ಲೆಕ್ಕ ಪುಯಿಂತೆಲ್‌ಡ್ ಇರುವತ್ತೇಳ್ ಪೋಪಿನಾನಿ ಸುರು ಕೆಡ್ಡಸ. ಮನದಾನಿ ನಡು ಕೆಡ್ಡಸ, ಮೂಜಿನಾನಿ ಕಡೆ ಕೆಡ್ಡಸ.

ಕೆಡ್ಡಸದ ಪೊರ್ತುಡು ಕೆಡ್ಡಸದ ಅಲ್ಮದ ಗಾಳಿ ಬೀಜುಂಡು ಪೆಲ, ಪೆಜ, ಕುಕ್ಕು, ಗೋಕು ಫಲ ಪೈರುಲು ನಿನೆ ಬೂರುದು ತನೆ ದಿಂಜುವ. ಕೃಷಿ ಬದ್‌ಕ್‌ಡ್ ಸಂಸ್ಕೃತಿದ ಮೂಲೊಡು ಜನ ಪೊಕ್ಕಡೆ ಒವೆನ್‌ಲಾ ಮಲ್ದ್‌ಜೆರ್. ಅಯಿಕ್ಕೊಂಜಿ ವೈಜ್ಞಾನಿಕ ಕಾರಣಲಾ ನಂಕ್ ತೋಜುಂಡು. ಕೆಡ್ಡಸದ ಬೋಂಟೆ ಪಂಡ ಬಾರೀ ವಿಶೇಷ. ಊರು ಕೂಡುದು ಕಾಡ್ ಪೊಗ್ಗುದು ಬೋಂಟೆ ದೇರುನವು ಜನಪದ ಜಗತ್ತ್‌ದ ಮಾಮಲ್ಲ ಪೆರ್ಮೆ. ಪಂಪನ ಕಾವ್ಯೊಲೆಡ್ದ್ ಪತಿನ ಕೋಟಿ ಚೆನ್ನಯೆರ‌್ನ ಕತೆ ಮುಟ್ಟಲಾ ನಮ ಬೋಂಟೆದ ಮರ್ಲ್‌ನ್ ತೂಪ.

ಕೆಡ್ಡಸೊಗು ಪಂಜಿ ಬೋಂಟೆ, ಬೊಕ್ಕ ಪುಂಡದ ಬೋಂಟೆ ಮಲ್ಪುವೆರ್. ಒಂಜಿ ಕಡೆಟ್ಟ್ ಕೃಷಿತ್ತ ರಕ್ಷಣೆಗ್, ಬೊಕ್ಕೊಂಜಿ ಕಡೆಟ್ಟ್ ಮನರಂಜನೆಗ್, ಕುಡೊಂಜಿ ಅರ್ಥೊಡು ಊರುದ ಎಡ್ಡೆಗ್ ಬೋಡಾದ್ ಬೋಂಟೆ ದೇರುನು. ಕೆಡ್ಡಸದ ಪೊರ್ತುಡು ಪುಂಡದಗ್ ಜರ ಬರ‌್ಪುಂಡುಗೆ. ಪುಂಡದ ಪಂಡ ಕುಂಡ ಕೋರಿ ಪನ್ಪೆರ್. ಅಯಿಟ್ಟ್ ಉಪ್ಪುನು ಒಂಜಿ ಪುಂಡಿ ಮಾಸ. ಆಂಡ ಕೆಡ್ಡಸದ ಪೊರ್ತುಡು ಪುಂಡದನ ಮಾಸ ತಿಂದ್‌ಂಡ ನರಮಾನ್ಯ ಎಲು ಗಟ್ಟಿ ಆಪುಂಡುಗೆ. ದುಂಬುದ ಕಾಲೊಡು ಕಾಡ್ ತೋಕೆಲೆಡ್ ಪುಂಡದೆ ದೇರ್ದ್‌, ಪತ್‌ದ್ ಇಲ್‌ಲ್ ಇಲ್‌ಲ್ ತಾರಯಿ, ಅರಿ, ಮುಂಚಿ ದೆತೊಂದು ಪೋದು ರಾತ್ರೆ ಕಂಡೊಡು ಕರಂಚಾದ್ ಅಲ್ಪನೆ ಕಜಿಪು ಮಲ್ತ್‌ದ್ ತೂಟೆ ದರ ಗೊಬ್ಬುದು ಮಾತೆರಪ್ಪ ಸೇರ್ದ್‌ ತಿಂದೊಂದಿತ್ತೆರ್.

ಅತ್ತಾಂದೆ ಬೋಂಟೆ ದೇರುನಿ ಪನ್ಪಿನನೇ ಪುರುಷತ್ವೊನು ಪ್ರದರ್ಶನ ಮಲ್ಪುನ ಒಂಜಿ ಸಂಕೇತಂದ್‌ಲಾ ಪನೊಲಿ. ಕೆಡ್ಡಸೊಗು ರುಟ್ಟಿ ಪಾಯಸ, ಕುಡು ಅರಿ (ನನ್ನೆರಿ) ಕಜಿಪುಡು ನುರ್ಗೆ ಬದನೆ ಬಾರೀ ಗರ್ದ್. ಉರ್ದು, ಕುಡು, ಕಡಲೆ, ಎಡ್ಮೆ, ಅರಿ, ಆವಡೆ, ಪದೆಂಗಿ ಇಂಚ ಏಳ್ ಬಗೆತ ದಲ ಧಾನ್ಯ ಪೊತ್ತುದು ಮಲ್ಪುನನೇ ನನ್ನೆರಿ ಅತ್ತ್‌ಡ ಕುಡು ಅರಿ. ಉಂದು ಜೂವೊಗು ಸತು ಕೊರ‌್ಪುಂಡು. ನುರ್ಗೆ ಬೊಕ್ಕ ಬದನೆಲಾ ಅಂಚೆನೆ. ಪೊಣ್ಣು ಎಂಚ ಪಿದಯಿ ಆಯೊಲ್ಡ ಮೂಜಿ ನೀರ್ ಮೀಬೊಕ್ಕ ಆಲ್ ಕೊಟ್ಯಡ್ದುಲಯಿ ಬರ‌್ಪೊಲಾ ಅಂಚೆನೇ ಸುರು ಕೆಡ್ಡಸದಾನಿ ಭೂಮಿಗ್ ಎಣ್ಣೆ ನೀರ್ ದೀಪಿನ ಕಿರ್ಮ ಉಂಡು.

ಇಲ್ಲ ಯಜಮಾನೆ ತರೆಕ್ಕ್ ಮೈಕ್ ಮೀದ್ ತುಲಸಿಕಟ್ಟೆದಲ್ಪ ಗಿಂಡೆಡ್ ನೀರ್, ಕತ್ತಿ, ಎಣ್ಣೆ, ಸೀಗೆ, ಮಂಜೊಲು, ಪೇರ್ ದೀದ್ ಕೈ ಮುಗ್ಯೊಡು. ಇನಿಡ್ದ್ ಮೂಜಿ ದಿನ ಭೂಮಿಗ್ ನಾಯೆರ್ ಕುತ್ತುಜಿ, ಕತ್ತಿ ದೀಪುಜಿ. ಕೃಷಿತ್ತ ವಾ ಕೆಲಸಲಾ ಮಲ್ಪರೆ ಇಜ್ಜಿ. ಅಕೇರಿದಾನಿ ನೀರ್, ಪೇರ್, ಎಣ್ಣೆ ಭೂಮಿಗ್ ಬುಡ್ದು, ಸೀಗೆ ಮಂಜೊಲು ಪಾಡ್ದ್ ಕೈ ಮುಗ್ಯುವೆರ್. ಪಂಡ ಭೂಮ್ಯಪ್ಪೆ ನೀರ್ ಮೀದ್ ಮಯಿಲೆ ಮಾತ್‌ದ್ ಸುದ್ಧ ಆಯೊಲು ಪನ್ಪಿನ ಅರ್ಥ. ಭೂಮಿದ ಫಲವಂತಿಕೆ, ಶ್ರೀಮಂತಿಕೆ, ಸಮೃದ್ಧಿನ್ ಎಚ್ಚಾವರೆ ತುಳುವೆರ್ ಮಲ್ಪುನ ಪ್ರಯತ್ನನೇ ಈ ಆಚರಣೆಲು. ಭೂಮಿದ ಕೇಡ್‌ನ್, ದುಷ್ಟ ಕಳೆನ್ ದೆಪ್ಪುನಲಾ ಮುಲ್ಪ ತೋಜುಂಡು.

, ಪರ್ಬದ ತುಡರ್ ಆವಡ್, ಕೆಡ್ಡಸ ಆವಡ್ ಈ ಪರ್ವೊಲು ಪೊಕ್ಕಡೆ ಪುಟುದುಜಿ.
ಅಯಿಕ್ಕೊಂಜಿ ಅರ್ಥ ಉಂಡು. ತಿಂಗೊಲುಗೊರ, ಸಂಕ್ರಾಂದಿಗ್, ಅಮಾಸೆಗ್ ತುಳುವೆರ್ ಭೂಮಿಗ್ ನಾಯೆರ್ ಕುತ್ತರೆ ಬಲ್ಲಿಂದ್ ಪಂತಿನಲಾ ಉಂದೇ ಕಾರಣೊಗು. ಬೊಕ್ಕ ಕೃಷಿಕೆರ್ ವರ್ಸದ ಪದರಾಡ್ ತಿಂಗೊಲ್ಲಾ ಬೆಂದ್‌ದೇ ಸೈಯರೆ. ಈ ಕಾರಣೊಡಾಂಡಲಾ ಒಂಜಿ ದಿನ ಪುರ್ಸತ್ತ್ ಉಪ್ಪಡ್ ಪಂಡ್‌ದ್‌ಲಾ ಈ ಪರ್ಬೊಲು ನಡತೊಂದು ಬೈದ್‌ಂಡ್.

(c) TuLuNaDa NeNaPu