ಬೊಗ್ಗುರನ ಕಬತ್ !

ಬೊಗ್ಗುರನ ಕಬತ್  !

 

 

 

ದಾನೆಂಬೆ  ಬೊಗ್ಗುರ   ನಿನ್ನ   ತಾಳೆ ಮದ್ದಲೆ
ಜೋಕುಲೊಟ್ಟು ಸೇರ್ದ್  ದಾದ ಕೊಟ್ಟುಗುದ್ದೊಲಿ?                                            

ದಾನೆಂಬೆ  ಬೊಗ್ಗುರ  ಗೊಬ್ಬರ ತುಂಬ್ಯನ
ಬಟ್ಟಿದಡಿಕ್  ಮಂಡೆ  ನುರ್ತು ಪೊಲ್ತು  ಪಾಡ್ಯನ ?

ದಾನೆಂಬೆ   ಬೊಗ್ಗುರ  ಎರು  ಮೇಪಯನಾ
ಎರುತ ಮಿತ್  ಕುಲ್ಲುದು  ಶೆಟ್ರ  ಕಂಡದ  ನೇಜಿ ತಿನ್ಪಯನಾ
                                                                                       
 ದಾನೆಂಬೆ  ಬೊಗ್ಗುರ  ಗಿದ್ಡೆರುಕು ಕುಡು ಮೈಯ್ತನಾ
ಉಜ್ಜೆರ್ಡ್  ಗುದ್ದುದ್  ಗುರಿತ ಅರು   ಗರ್ತ್  ಪಾಡ್ಯನಾ  ?

ದಾನೆಂಬೆ   ಬೊಗ್ಗುರ  ಕಟ್ಟದ  ಕೊರಿಗ್ ನೀರ್ ದೀಯನಾ
ನೀರ್ ಪರಿಯೆರೆ  ಆಪುಜಿಂದ್   ಕಾರ್ದ  ಬಲ್  ಬುಡಿಯನಾ?
   
ದಾನೆಂಬೆ  ಬೊಗ್ಗುರ   ಪೆತ್ತೊಗು ಬಾಜಲ್  ದೀಯನಾ
ಮುಟ್ಟು ಕಡಿ  ಚರಿಗೆ ದೀದ್ ಪೆತ್ತದ ಮಂಡೆ ತಿಕ್ಕ ಪಾಡ್ಯನಾ ?

ದಾನೆಂಬೆ   ಬೊಗ್ಗುರ  ದತ್ತುದ್  ಬತ್ತನಾ
ಎರುತ  ಕಾರ್ಗ್  ಪನೋರು ತಾಗದ್  ಗಡಿ  ಮಲ್ತನಾ?

ದಾನೆಂಬೆ  ಬೊಗ್ಗುರ   ಬೆಂದುರು ಕೈತನಾ
ಗುರ್ಕೆದುಲಾಯಿ ಮಂಡೆ ಪಾಡ್ದು ದರ್ತ್ ದೆತ್ತನಾ?

ದೇಗುಂಬೆ  ಬೊಗ್ಗುರ    ಇಂಚ ಮಲ್ಪುವಾ
ತೀರಂದಿ  ಕಬತ್   ಮಾತಾ ಒಲ್ತು  ಕಲ್ಪುವಾ ?

ಶಾಲೆಗಿಂದು ಪೋಯಡ  ಕುಕ್ಕು ಪೆಜ್ಜುವ         
ಕಲ್ಪುಲಾಂದ್ ಪಂಡೆರ್ಡ   ಬೀಜ ಗೊಬ್ಬುವ !

ತೂಯರೇತ್ ಉಲ್ಲ ಪೊರ್ಲು ಕಂಟುಲಾ
ಮಂಡೆದುಲಾಯಿ ಬೊಂಡು ಇಜ್ಜಿ ಈತ್ ಚೂರ್ಲಾ

ಪ್ರಾಯ ನಿಕ್ ಅಂಡ್ ಎತ್  ಪರಕಂಬೆರ್ಲೆನ
ಪೆರ್ಚು ಕಟ್ಟುನ ಬುಡ್ಡು  ಈ ಯಾಪ ಸುದರುನಾ ?

ಎಂಚಾಂಡಲ ಆವಡ್ ನಿನ್ನ ಮರ್ಲ್ ಬುಡೋಡು
ಕೋಕೈದೊಂಜಿ  ಪೊಣ್ಣು  ಕನತ್  ನಿಕ್ ಮದ್ಮೆ ಮಲ್ಪೋಡು !

ಬೆರಿ ಬೆರಿಕ್  ನಿಕ್ಕ್  ನಾಲ್ ಜೋಕುಲಾವೊಡು
ಬುಡೆದಿ  ಜೋಕ್ಲು  ಸೇರ್ದು  ನಿನ್ನ ತಿಗಲೆ  ನುರ್ಪೋಡು !