bolli kate parichaya

ಕತೆ ಓದೊಂದು ಪೋಯಿಲಕ್ಕ  ಉಂದು  ಎನ್ನನೇ ಕತೆ, ಉಂದು  ಎನ್ನ ಇಲ್ಲ ಬರಿತ ಕತೆ , ಉಂದು ಎನ್ನ ಊರುದನೇ  ಕತೆ  ಇಂಚ  ಎನ್ನೊಡುಗೆ . ಅಪಗ  ಕತೆ ಓದಿನ ಮುಗಿನನೆ  ಗೊತ್ತಾಪುಜಿ.   ಮುಗಿ ಬೊಕ್ಕ ಅಂಚ ಆತುಂಡ ಏತ್ ಎಡ್ಡೆ ಇತ್ತುಂಡ್ , ಇಂಚಾತುಂಡ  ಖುಷಿಯಾತು,    ಉಡಾಲ್ದುಲಾಯಿ ಇಂಚ  ಕತೆತ ಕಾಯಿ ಕಡೆಯೆರೆ ಸುರುವಾಂಡ   ಆ ಕತೆ ಗೆಂದ್೦ಡ್    ಪಂಡ್ದ್ ಲೆಕ್ಕ . ಅಕ್ಷತರಾಜ್  ಪೆರ್ಲ ಮೆರೆನ ಬೊಳ್ಳಿ ಕತೆಲಾ  ಓದುನಾಯಗ್ ಇಂಚಿನನೇ ಕಾಯಿ ಕಡೆಪಾವುಂಡು .

ಬೊಲ್ಲಿನ್ ಒಂದೊಂದು ಪೋವನಗ  ಒಂತೆ ಉ೦ತಾಗ , ಬೊಕ್ಕ ಓದುಗ  ಪಂದಾಪುಜಿ . ಬಡಪತ್ ದ  ಬೇನೆ ಬೇಸರ್ , ಇತ್ತಿನವೇನ್ ಪಟ್ಟ್ ತಿಂದ್  ಜೆತ್ತಿನ  ನೆಂಪುದ  ಒಸರ್ , ಕೈ ಕಾರ್ ನೀಡುನಾತ್  ಪಜೆ ಇಜ್ಜಿಡ , ಮೊರಂಪು ಮಡ್ತು ಪಜೆತುಲಾಯೇ  ಮುರುಂಟುನ ಬದುಕುದುಲಾಯಿಲಾ  ಜವ್ವನ ಅರ್ಲುನ ಪೊರ್ತುದ  ಕನಕುಲೆಗ್ ದಾಲಾ  ಕಮ್ಮಿ ಇಜ್ಜಿ.  ನರಮಾನಿ ಬದ್ಕೇ ಅಂಚನೆ ಅತ್ತೆ  ''ಇನಿ ತತ್ತ್ ೦ಡ,   ಎಲ್ಲೆ   ಬೊಲ್ಲಿ  ಮೂಡು "   ಪನ್ಪಿನ  ಕನೋಟೇ ಇನಿ  ಇರ್ಲಾಪಿನಿ!.   ಬಡವೆರ್ನ  ಈ ಕನತ  ಬದ್ಕ್  ಕೆಲವು   ಅರಲುವ, ಕೆಲವು ತಾಲುವ!.
''ಬೊಲ್ಲಿ'' ಕತೆಲಾ ಅಂಚನೆ , ಅಲ್ಪಲ್ಪ  ಬಿಮ್ಮ  ಬಿಚ್ಚದ್  ತೆಲ್ಪಾದ್  ಕೆಲವಲ್ಪ ಕಣ್ಣ ಕೊಡಿಯಲಂಕೆಡ್  ಬೆಪ್ಪು ನೀರ್ ಉರ್ಕಾರುಂಡು !    ಕತೆ ಮಾತ್ರ  ಓಲುಲಾ ಉಂತಂದೆ ಬೆಪ್ಪುಡೇ  ಒದಗೊಂದು  ಸಾಗುಂಡು !.

ಬಡೆವೆರ್ನ  ಬದ್ಕೇ ಅಂಚನೆ , ಪನರೆಗೊಂಜಿ ಕತೆ , ಕೇನರೆಗೊಂಜಿ ಕತೆ , ಆಂಡ ನಡಕೆಗ್ ಬನ್ನಗ  ಅವು ನಡಪಂದಿ ಕತೆ .  ಅಂಚಿಂಚಿದಕಲ ಕುಚ್ಚೇನಾ  ಕೇನೊಂದು , ಕೋಂಗಿ ನಿಂಗೊಂದು , ಆದ್  ಪೋಯಿನಕ್ಕೆ ಮುರಿಯ ದೀಯೊಂದು  ಬದುಕುನ ಆತ್  ಸುಲಭ ಅತ್ತ್ .  ಅಂಚಾದ್  ಸೀನಣ್ಣೆ  ಮಗಕ್ಕ್ ಕತೆಟ್ ಪಂಡಿ   ಜಾತಿ  ಸುಧಾರಿಕೆನ್ ತನ್ನ ಕಾರಡಿತ ನಿರೆಲಾದ್  ದೆತೊನೆರೆ  ತಯಾರಾಜೆರ್ .
ಬಾಲೆಡಿಂಚೆ    ನುರ್ತೆಗ್- ಅನರ್ತೆಗ್  ಸತ್ಯದ ಸುರಿಯೊಡು ಸಾದಿ ತೋಜಾಯಿನ  ಕೋಟಿ ಚೆನ್ನೆಯೆರೆನ ಬೀರ ಸಂದಿ ಪದ ಕೇನಿನ   ಬೊಲ್ಲಿನ ಮನಸ್   ಜಾತಿದ ಗಡು  ದಾಂಟುದ್  ನೀತಿದ ನೆಲೆ ಸೇರ್ದಾದಿತ್ತುಂಡ್.  ಆ ಸಾದಿಡ್ ನಡಪರೆ  ಆಯೆ ಅಪಗನೆ  ಪಜ್ಜೆ ದೀದಾತ್೦ಡ್. ಮೀಸೆ ಬತ್ತಿ ಜವನನ ತಾದಿ ತಿರ್ಗಾವೂನಾಯೆ ನನ ಏರ್ ? ಆವಂದಿ ಪಾತೆರ . ಸೀನಣ್ಣೆ ಮೆಲ್ಲಾನೆ  ಸೋಪೆರೆ ಕಲ್ಪುವೆರ್ !.

ಅಕ್ಷತರಾಜ್  ನಂಕ್ ಇಷ್ಟ ಆಪಿನಿ ಆರ್ ಕತೆ ನೇಯುನ ಪೊರ್ಲುಗು !.  .  ಪನ್ಪಿನವೇನ್ ಸಲೀಸ್ಡ್  ಆರ್ ಪನಯೆರ್ , ಅವು ಮಂಜೊಲ್ದಿರೆತ ಗಟ್ಟಿದುಲಾಯಿ  ಬೆಲ್ಲ ತಾರಾಯಿ  ಮೊರೆತ್  ದಿಂಜಾದಿಲಕ್ಕ  . ಅಗ್ಗಿ ತಿಂದಿನಾಯಗ್ ಮಾತ್ರ ತೀಪೆ ತೆರಿಯು .  ಜೋಸೆಫ್ ಬೊಕ್ಕ ಚೆನ್ನುನ ಮೋಕೆನ್   ''ಚೆನ್ನುನ  ಮೋನೆಡಿತ್ತೆ  ಜೋಸೆಫನ ತೆಲಿಕೆ!'' ಪನ್ಪಿ ಒಂಜೇ ಸಾಲ್ ಡ್  ರೂಪು ದಿಂಜಾದ್ ತೆರಿಪ ಕೊರ್ಪೆರ್ !. ಇಲ್ಲಡ್ ಉಣರೇ ದಾಲಾ  ಇಜ್ಜಿ  ಪನ್ನಗ  ''ನುಪ್ಪು ನೀಂದ್ ದ್  ಬೊಡಿನ  ತೆಲಿಯುಂಡು''  ಪನ್ಪೆರ್ , ಜೋಸೆಪ್ಪೆ ಇಲ್ಲರುಟು  ಆಂಜೂನವೆನ್  ''ಬೇಲಿ ಬರಿತ ಸೆಂಟ್ ದ  ಕಮ್ಮೆನ ''   ಪಂಡುದ್  ಲೆಪ್ಪುವೆರ್  ಇಂಚಿನ ಬೋಡಾಯಿನಾತ್  ಪೊರ್ಲ ತುಳು ರೂಪುಲು  ಕತೆತ ಮೆಯ್ ತುಂಬಾ ತೋಜಿದ್ ಬರ್ಪ.  ಉಂದು   ಅಕ್ಷತಾಗ್ ಮಾತ್ರ   ಬ್ರಮ್ಮೆ  ಬರೇತಿ ಬರವು . ಬೇತಗಲೆಗ್ ಈತ್  ಸಲೀಸಾವಂದ್ !.

ಕತೆ ಬಡಪತ್ತ್  ಪನ್ಪುಂಡು , ಪೊಣ್ಣ ಬೇನೆನ್ ಪನ್ಪುಂಡು, ಅಪ್ಪೆ ಸಂಕಡೊನು ಪನ್ಪುಂಡು, ಜವ್ವನದ  ಮರ್ಲ್ ನ್ ಪನ್ಪುಂಡು,  ಎದುರುಂತುನ  ಪೊಟ್ಟು  ಪೊಡಿ ದೈರೊನು ಪನ್ಪುಂಡು, ಗೆಂದುದುಂತುನ  ನಂಬೋಲಿಗೆನ್ ಪನ್ಪುಂಡು, ಕಡ್ಡಿ ತುಂಡು ಮಲ್ತಿಲಕ್ಕ ಅಡ್ಡ ತುಂಡು ಕಡ್ಪುನ ಆಂಕೋರುನು , ಪಿಸುರ್ನ್ ಪನ್ಪುಂಡು, ಮೆಲ್ಲಾನೆ  ಸೋಪುನವೆನ್  ಪನ್ಪುಂಡು, ಸೋತುದು ಗೆಂದುನವೆನ್ಲಾ  ಪನ್ಪುಂಡು. ಬೀರ ಪನ್ಪುಂಡು, ಸಂದಿ ಪನ್ಪುಂಡು,    ಕತೆ ಓದುದು ಮುಗಿದಾವನಗ  ಪನಂದಿನ  ದಾಲ  ಇಜ್ಜೋಡೋ ನನ  ಪನ್ಪಿನವೆನ್ಲಾ ಪನ್ಪುಂಡು !.

ಮೂಡಾಯಿಡ್  ಬಾನ ದೇವೆರೆನ ಪುಲ್ಯದ ಇನೆ  ದೊಂಬು  ಮೆಯ್ ಬೆಪ್ಪು ಮಲ್ತಿಲಕ್ಕ , ಪಡ್ಡಾಯಿಡ್  ಸಿಮ ಗಾಲಿ ತಂಪಾಯಿಲಕ್ಕ  , ಮುಗಲ ಮದೆಟ್ ಪನಿ ಬರ್ಸ  ಕೊಡಿಯಿಲಕ್ಕ , ಪುಣ್ಣಮೆದ  ಇರ್ಲುದ ತಿಂಗೊಲ್ದ ಬೊಲ್ಪು ಪರಡಿಲಕ್ಕ ,  ಸೊರಗೆದ  ಮರಟ್ ಪೂ ಅರಲ್ದ್  ಸುತ್ತ ಕಮ್ಮೆನ ಬತ್ತಿಲಕ್ಕ , ಸೇಲೆಡ್  ತುದೆ ನೀರ್   ಪರತಿಲಕ್ಕ  ಅಕ್ಷತಾ ರಾಜ್  ಪೆರ್ಲ ಮೆರೆನ ಕತೆತ ಪರಪು  ಗೊತ್ತಾಂತಿಲಕ್ಕ  ಉಡಲ್ದ ಉಲಾಯಿ ಪರಪುಂಡು, ತನು ತಲ್ಮನೆ   ಮಲ್ಪುಂಡು!.   

 ಅಂಚ೦ದ್  ಕತೆಟ್   ಮಿಸಿ  ಇಜ್ಜೇ ಪಂಡ್ದ್ ಪನೆರಾಪುಜಿ. ಬೊಳ್ಳಿ ಪನ್ಪಿ  ಪುದರ್ ಕೇನ್ನಗನೆ  ಕತೆತ  ಕಡೆ ತೆರಿಲಕ್ಕ ತೋಜುಂಡು . ಬೊಳ್ಳಿ ಬಾನೊಡು ಮೆನ್ಕರೆನೆ  ಪುಟುದೆನಾ ಪನ್ಪಿ  ಸಂಶಯ  ಮದೆಟ್  ನಿಲ್ಕು೦ಡು. ಆಯೆ ಮಿಲಿಟ್ರಿ ಸೇರಿಯೇ ಪನ್ನಗ ಅವು ನಿಗಂಟ್ ಆಪುಂಡು . ಕಡೆಕ್ಲಾ ಬೊಳ್ಳಿ ತೀರ್ಯೆರೆ  ಬಲ್ಲಿತ್ತ್೦ಡ್  ಪನ್ಪಿ   ಬೆಚ್ಚ ಸುಯಿಲ್ ಬೋಡುಂದೆ  ಬುಡ್ಪಯೆರಾ
ದಾನ್ಯ ಪನ್ಪಿನ  ಸಂಶಯ ಪುಟ್ಟು೦ಡು ?.

ಒಟ್ರಾಸಿ  ಪಣಿಯಾಡಿಯೆರೆನ ಪುದರ್ಗೊಂಜಿ  ಪುದರಾಪಿ  ಮಸ್ತಿರೆನ್ ಬರೆತೆರ್ .    ಬೊಳ್ಳಿ ಕಾದಂಬರಿಡ್  ಬೋಡ್ ಬೋಡಾಯಿನಾತ್  ಗೋರ್ ದಿಂಜಾದ್   ದೀಪಿನ   ಸತು ಉಂಡು . ಬರೆತಿನ ಅಕ್ಷತಾ ರಾಜ್ ಪೆರ್ಲ ಮೆರೆಗ್ಲಾ ತುಳುನಾಡ  ಬಾನೊಡು   ''ತುಳುಬೊಳ್ಳಿ'' ಯಾದ್ ಮೆಣ್ಕುನ ತನುಸಕ್ತಿ  ಉಂಡುಂದು  ಕತೆ ಓದಿನಕಲೆಗ್ ತನ್ನಾತೆಗೆ  ಅಕಲ್ ಗ್  ತೋಜಿದ್ ಬರ್ಪಿನ  ಸುಳ್ಳತ್ತ್ . ಅಕ್ಷತಾ ರಾಜ್ ಮೆರೆಗ್ ತುಳುನಾಡುದ  ದೈವ ದೇವೆರ್ ಎಡ್ಡೆ  ಮದಿಪು ಮಟ್ಟೆಲ್ ದಿಂಜಾವಡ್!.