ನಲಿಕೆದಾಯೆ ದೋಗು
ಕೋಲ ಕಟ್ ದಿನ
ನಳಿಕೆದಾಯೆ ದೋಗು
ಎಚ್ಚಿಗುಂತುದು
ಮೂಜಿ ಮುಕ್ಕಾಲ್ ಗಲಿಗೆ
ವಸಯಾಯೆ !
ಬಾರೆ ಬೈಲ ತಂತ್ರಿಲು
ದೇರ ಬೈಲ ಭಟ್ರು
ಗುತ್ತಿನಾರ್ರು , ಅತ್ತಾರ್ರು
ಅರೆಜಾತಿ ಪರಜಾತಿ
ಅನ್ಯಜಾತಿ
ಮಾತೆರೆನ್ಲಾ ಲೆತ್ತೊಂದು
ಲೋಪ ಬರಂದೆ ಕಾಪುವೆಂದ್
ಅಭಯ ಕೊರಿಯೆ !
ಒರಿಯಗ್ ಅಂದುಂದ್
ಒರಿಯಗ್ ಅತ್ತುಂದ್
ಇತ್ತಿನಾಯನ್ ಬತ್ತಿನಾಯನ್
ಲೆತ್ತ್ ಕೇನುಜಿ ಪಂದ್
ಕುಂದು ಬರಾಂದಿ ದೈವನಡೆ
ಅದ್ದೆರ್ ಪೊದ್ದೆರ್
ನಾಲೂರು ನಾಲ್ ಗುತ್ತುದಕುಲು
ಅನ್ಯಮನ್ಯೋಡು ಉಪ್ಪೊಡುಂದು
ದೈವದ ಅಪ್ಪಣೆ ಆಂಡ್ !
ಕಾಲದ ಕಟ್ ವರ್ಷದ ನೇಮ
ನಡತ್ ತೋಜಿಡ ಅನರ್ಥ ಒದಗು
ಮದ ಮಚ್ಚರದ ಜನಮಾನಿ ತೂದು
ದೈವದ ದಿವ್ಯ ನಡೆಕ್ ಗೋಚಾರಾದ್
ಪದಿನಾಜಿ ಕಟ್ ಪದಿನಾಜಿ ನೆಲೆಟ್
ಮಿರೆಯಿನಂಚಿನ ದೈವದ
ಬೆರಿ ತೂಯರಾಂಡ
ಇಶ ಗಲಿಗೆ ಬರುವುಂದು
ಎಚ್ಚರ್ಮೆ ಲಕ್ಕಾ೦ಡ್ !
ಕಬೇತಿ ಪೆತ್ತಲಾ ಪಿಲಿಲಾ
ಒಟ್ಟಾರ್ಮೆಡ್ ಇತ್ತಿ ಬೂಡುಡು
ಮನ ಮಚ್ಚರೊಗು ಜನ
ತೀರ್ಥ ತಲ್ಪೊಡು
ನಿಕಲ ಚಿತ್ತ ಎನ್ನ ಸುತ್ತ
ಬೆರಿಕ್ ಬೆರಿಯಾದ್
ಅರ್ತಿಪಿರ್ತಿಡ್ ಕೂಡುದುಪ್ಪೊಡು
ಅಪ್ಪಣೆ ಕೊರಿತಟ್ಟುಗು ಎದುರಿಜ್ಜಿ
ತರೆ ತಗ್ಗಾದ್ ಕೈ ಮುಗಿದ್
ಬತ್ತಿ ಜನ ಕಣ್ ಬುಲಾದ್
ದೈವ ನುಡಿನ್ ಮುಂಡೆದುಂಬಿಯೆರ್
ಮೊರಂಪು ಬಗ್ಗಾದ್ ಅಡ್ಡ ಬೂರ್ಯೆರ್ !
ಅಣಿಯೇರ್ದಿನ ದೇವೆರ್
ಅಣಿಜಾರಾಯೆರ್
ಮನೆ ಮಂಚಡ್ ನೆಲೆಯಾಯೆರ್
ನಲಿಕೆದಾಯೆ ಇತ್ತೆ
ಬಂಜಿಡ್ ಜನನ ಬೆರಿಟ್ ಮರಣದ
ಚಟ್ ನರಮಾನಿ
ಏರ್ ನನ ಪುಡಾಡುವೆರ್
ದೈವ ಪಿರಿನಾಯಗ್ ?
ಬಡವು ಬಂಜಿಗ್
ನಿತ್ಯ ಬೂತದ ಯಾಸ ಕಟ್ಟಿನಾಯಗ್ !
ದೈವವಾದ್ ದೋಗು ನಲಿತೆ
ದೇವೆರಾದ್ ಅಭಯನುದಿತೆ
ಕೋಲ ಪಿರಿದ್ ಜಾಲ್ ಜಪ್ಪನಗ
ಬೇನೆ ಪಂಡುದ್ ಬಾರಿ ಬುಲಿತೆ
ತನ್ನ ಅಕ್ಲೇಶೊಗು ದೇವೆರಿಜ್ಜಿ
ಕೋಲ ಕಟಿನಾಯಗ್
ದೈವದೊಟ್ಟುಗು ಪನೆರಾಪುಜಿ
ಮಿತ್ ಕುಲ್ಲಿನ ಗತ್ತುದಕಲೆಡ
ಪಂಡಿ ಪಾತೆರ ಒಂಜಲಾ ಬೇಯುಜಿ !
ಗ್ರಾಮದಾಯಗ್ ಕಟ್ಟ್ ದ ಪೆಟ್ಟ್
ಕೇಕದಾಯಗ್ ಬೈಲು ಕಮ್ಮಿ ತಟ್ಟು
ಕೋಲ ಕಠಿಣ ಕಾಸ್ ನೊಂತೆ
ಏರ್ಸ ಕೊರ್ಪಿನ ಮನಸ್ ದಾಂತೆ
ಕಡ್ತುರ್ಲು ಖಡಕ್ ಪಾತೆರೊಡು ಕಡ್ತ್ ದಕ್ಕ್ದ್
ತೂಯೆರ್ ಮೋನೆನೊಂತೆ !
ಅಣಿ ಏರ್ನಗ ಏರಿ ಮಂಡೆ
ಪಣವು ಕೇನ್ನಗ ತಗ್ಗೊಡಾಂಡೆ
ತೆಂಬರೆದ ಬೆರಿಕ್
ಜೋರು ಬೊಟುದು
ಬಾನದಂಚಿ ಮೋನೆ ಪಾಡ್ದೆ
ಅಗಪು ಪಾರ್ದನ ದೋಗು ಸಂದದೆ !
ದೈವ ಪಿರಿನ
ನಲಿಕೆದಾಯನ ಮೋನೆಡ್ ತೆಲಿಕೆ ಇಜ್ಜಿ
ನಲ್ತ್ ನಲ್ತ್ ಸೇವೆ ಮಲ್ತಿನಾಯನ
ನರಲ್ ದೇವೆರೆ ಕೆಬಿಕ್ಲಾ ಕೇಂಜಿ !!
Comments
Post a Comment