ಜನ್ಮ !

ಜನ್ಮ  !

ಯಾನ್

ಮಣ್ಣಾವೊಡು  ತುಳುನಾಡುದ

ಈ ಪುಣ್ಯ ಬೂಡುಡು,

ಕಂಗು ತಾರೆ ಬಾರೆದ

ಗೋಂಕು ಕುಕ್ಕು ಪೆಲಕಾಯಿದ 

ನಾಡಿಡ್ ಸೇರೊಂದು

ಜನಮಾನಿಗ್

ತೀಪೆ  ತಿನ್ಪಾವೊಡು !

ಯಾನ್

ಸಿಮ ಗಾಲಿಯಾದ್  ಬೀಜೊಡು

ಕಡಲುಡ್ದು  ಪಡಿಲಿಗ್,

ಧಗೆಕ್  ಬೆಂದಿ ಜೀವೊಲೆಗ್ 

ಮಲ್ಲಿಗೆದ -ಸಂಪಿಗೆದ 

ಕಮ್ಮೆನೊನು ಕಂತ್ ಮುಟ್ಟದ್ 

ತಂಪಾವೊಡು !

ಯಾನ್ 

ಮರಿಯಲದ ಬರ್ಸದ ನೀರಾದ್ 

ಅಕ್ಕಸೊಡ್ದು ಪನಿಯಾದ್ ಜಪ್ಪೊಡು,

ಪಚ್ಚೆ ಪಗುರುದ ಬೈಲ ಕಂಡೊಡು 

ಅತಿಕಾರಿದ ಪೊಟ್ಟೆಡ್ 

ಅರಿ ಬಾರಾದ್ ಪುಟ್ಟೋಡು

ಸಿರಿಯಪ್ಪೆ ಜೋಕುಲೆನ

ಬಂಜಿದ ಬಡವು ಸಣಿಪೊಡು !

ಯಾನ್

ತೂವಾದ್

ಬೆಪ್ಪುಡುಪ್ಪೊಡು , 

ದೈವ ದೇವೆರೆನ ಗುಂಡದ

ತೂಟೆ-ಜೀಟಿಕೆಡ್ ಮೆರೆದ್

ಕತ್ತೆಲೆದ ಕರಿಟುಪ್ಪುನ

ಬೇನೆ ಸಂಕೊಡ  ಕಲೆದ್

ಬೊಲ್ಪಾವೊಡ್

ಮೋನೆದ

ಮುಗುರು ತೆಲಿಕೆದ ಜಲಕಾವೊಡ್

ಯಾನ್  

ಭರಮುದ ರಂಗೊಡು , 

ಮದ್ದೆಲೆದ ನಡುತ 

ಚಂಡೆದ ರಣ ಪೆಟ್ಟಾದ್ 

ತುಳುವನ ತಿಗಲೆದ  ಬೊಟ್ಟಾದ್  

ಕೆಬಿತಟ್ಟುಗೇ  ಕೇನೊಡು   

ಕುಲ್ಲಿನಲ್ಪನೆ ಕಾರ ಪಜ್ಜೆನ್  

ಒಪ್ಪೊಡು ನಲಿಪಾವುನ 

ನಲಿಕೆದಾಯೆ..

ಯಾನಾವೊಡು !  

 ಜನ್ಮ

ವೋವ್ವಂಡಲಾವು,

ವೋಲಾಂಡಲಾವಂದ್  !

ಪುಟ್ಟುನಾಂಡ  ಮೂಲೆ,

ತುಳುನಾಡುದ ಜಾಲೆ

ಜೂವ  

ಈ ಗಾಲಿ ಮಣ್

ನೀರುನ್  ಬುಡ್ಡು 

ಪಾಕ ದಿನ

ಬದುಕಂದ್   !!.

=========