ಮದಿಮಾಯೆ-ಮದಿಮಾಲ್ ಕೋಣೆ ಪೊಗ್ಗುದು ದಾದ ಮಲ್ಪೊಡು ...!!

ಮದಿಮಾಯೆ  ಮದಿಮಲೆನ್  ಕೋಣೆ ದಿಂಜಾವುನ ಒಂಜಿ ಕ್ರಮೊನು  ಊರುಗ್ ತೆರಿದಿನಾರ್ ಗುತ್ತಿನಾರ್ ನಡಪಕೊರೊಡು :

ಗುತ್ತಿನಾರ್ ದೊಂಡೆ  ಕಾಂಕೆರೊಂದು   ಪಂಡ್ರೆ  ಸುರು ಮಲ್ತೆರ್     :

ಆಣ್ಲಾ -ಪೊಣ್ ಲಾ   ಸಂಸಾರ ದಿಂಜುನ  ಈ  ಅಮೃತ ಗಳಿಗೆಡ್  ಯಾನ್  ಪನ್ಪಿನಿ  ದಾದ ಪಂಡ....

ನಮ  ಮನುಷ್ಯ ಜನ್ಮೊಗು ಬತ್ತಿ ಬೊಕ್ಕ ಬ್ರಹ್ಮಚರ್ಯ   ಗ್ರಹಸ್ಥ , ವಾನಪ್ರಸ್ಥ , ಸನ್ಯಾಸ ಪನ್ಪಿನ  ನಾಲ್ ಆಶ್ರಮದ ಮುಖಾಂತ್ರ ಸಾರ್ಥಕ ಜೀವನ ಮಲ್ತುದು   ಸ್ವರ್ಗ ಸೇರೋಡು  ಪನ್ಪಿನ  ನಮ್ಮ ಹಿರಿಯೆಕ್ಲ್  ದುಂಬುದಿಂಚಿ  ನಡಪಾವೊಂದು  ಬೈದಿನ ಕಟ್ಟ್ .

ಅಂಚನೆ  ಇನಿ ನಮ್ಮ ಆಣಗ್  ಮದಿಮೆದ ಪ್ರಾಯ ಬನ್ನಗ (ಆಯೆ ಅಂಚಿ -ಇಂಚಿದ  ಇಲ್ಲದ ಕಂಡಿ ಬಾಕಿಲ್ನ್ ತೂಯರೇ ಸುರು ಮಲ್ಪುನಗ !) ನಮ್ಮ ಗುರ್ತ ಅರ್ತೊಡು ತೆರಿದಿನ ಇಲ್ಲದ ಒಂಜಿ ಪೊಂಣನ್  ಕನತುಂಡ  ಆಲ್ ನಮ್ಮ ಇಲ್ಲನ್ ಬೋಡಿತ್ತಿಲಕ್ಕ-ಬೊಡಾಯಿಲಕ್ಕ  ಸುಧಾರ್ತೊಂದು  ಕೊನಪೊಲು ಪನ್ಪಿನ  ನಂಬಿಕೆಡ್  ನಮ ಪೊಣ್ಣ  ಇಲ್ಲಗ್ ಪೊಣ್ಣು ಕೇನೆರೆ ಪೋಯಿ ಪೊರ್ತುಡು ...  .

ಅಲ್ನ  ಪೆತ್ತಿ  ಅಪ್ಪೆ ಅಮ್ಮೆಡ  ತಮ್ಮಲೆ - ಮಾಮಿಡ  ಪಲಯೆ- ಮೆಗ್ಯೆಡ   ತಗೆ ತಂಗಡಿಡ  ನಮ್ಮ ಆಣನ ಕೈಕ್  ಅಲೆನ "ಕೈ" ನ್ ಇನೆ ಕೇನಿಯ. ತೆರಿಯಂದಿ  ಪರ ಊರುದ ಸುಭಗಡ್ದು  ತೆರಿದಿನ ಊರ್ದ ಕಲ್ವೆ ಆಂಡಲಾ ಎಡ್ಡೆಗೆ  ಪನ್ಪಿನ ನಮ್ಮ ತುಳುನಾಡುದ ನಂಬುಗೆ .ಕಣ್ಣೆದುರು ಪುಟು ಬಲತಿ ಪೊಣ್ಣು  ಕಣ್ಣೆದುರೆ ಇತ್ತುಂಡ ಕಷ್ಟ ಸುಖೊಕು ಲೆತ್ ಕೇನೆರೆ ಆವೊಲು ಪನ್ಪಿನ ಆಸೆಗ್ ಇಲ್ಲಲ್ಪದ  ಸಂಭಂದ  ಬಯಕೊಂದು ,  ನಮ್ಮ ಆಣನ್ ಇಲ್ಲಗ್  ಬೊಲ್ಪಾಪಿ  ಮರ್ಮಯೆ, ದುಂಬುಗು ಮಗಲಕ್ಕ ಕಷ್ಟೊಗು ಒದಗುದ್ ಬರುವೆ  ಪಂಡುದ್ ಎನ್ ದ್   ಪೊಣ್ಣು  ಕೊರಿಯೆರೆ  ಮಲ್ಲ ಮನಸ್  ಮಲ್ತಿನೆದಾವ್ರ

ಇನಿ ಊರ್ದ - ಪರ ಊರ್ದ   ಹೆರಿಯೆರೆನ್  ಬಂಧುಲೆನ್  ಮಾತಾ  ಒಟ್ಟು ಪಾಡೊಂದು ನಂಬಿನ  ದೈವ ದೇವೆರ್ನ   ಅಭಯೊನು   ದೆತೊನೊಂದು  ಈ ಮದಿಮೆದ ಕಜ್ಜೊಗು  ನಮ ಇತ್ತೆ  ಜತ್ತುದ .

ಅಂಚನೆ  ಬುಡೆಡಿನ್  ಕಾಡುಗ್   ಬುಡಿಯೆರ್ ಪನ್ಪಿನ ಅಪವಾದ ಇತ್ತುಂಡಲಾ   ಕಂಡನೆ ಬುಡೆದಿ ಪನ್ಪಿನ  ಸಂಭಂದೊಗು  ರಾಮ ದೇವೆರ್ಲಾ  ಸೀತಾ ದೇವಿಲಾ  ನಂಕ್  ಮೂರ್ತ ಸಾಕ್ಷಿಲು. ರಾಮ ದೇವೆರ್ ಮೋಕೆ ಎರ್ಕುನಗ ಸೀತಪ್ಪೆಗ್  ಮಾದ್ರೆಂಗಿ ದೀಯೊಂದು ತಂಕ್  ಬುಡೆದಿಡ  ಇತ್ತಿನ ಮೋಕೆದ ರಂಗ್ ನು ತೊಜಾಪಾಯೇರ್ ಪನ್ಪಿನ  ಮೂಲೊನು ದೀಯೊಂದು  ಮದಿಮೆ ಆಪಿನ ಆಣ್  ಪೊಣ್ಣನ  ಬದುಕ್ ಅಂಚನೆ  ಮೋಕೆಡ್  ರಂಗಾವಡ್  ಪಂಡುದ್  ದೊಂಪ  ಏರಾದ್ ಮಾದ್ರೆಂಗಿದ  ಶಾಸ್ತ್ರಲಾ  ಮಲ್ತ .

ಮದಿಮೆದ ದಿನ ಪುಲ್ಯ ಕಾಂಡೆ  ಪಕ್ಕಿ ಗೂಡು ಬುಡ್ಪಿನ ಪೊರ್ತುಡು  ಮಡಿಕ್  ಸಾಕ್ಷಿಯಾದ್  ಮಡ್ಯಾಲ್ದಿ ನ್  ಲೆತ್ತುದ್,ಕ್ಲೇಸಿನ್ ಲೆತ್ತುದು  ಚೌಲ ಶಾಸ್ತ್ರ ಮಲ್ತುದು , ಅಗಲಗಲ ಇಲ್ಲಡ್  ಮದಿಮಾಯಗ್ - ಮದಿಮಾಲೆಗ್  ಮಡಿ ಕುಂಟು ತುತ್ತಾದ್ , ನಂಬಿನ  ಕುಲ ದೇವೆರೆಗ್  ಇಡೆ  ಕಾಣಿಕೆ ದೆಪಡ  ದೀದ್  ನಡಪು ಮಂಗಲ ಕಾರ್ಯೊಗು  ವಾವೊಂಜಿ ರೀತಿದಲಾ ತಡೆಯಾವರೆ ಬಲ್ಲಿ ಪಂಡುದ್  ಸುಮೂರ್ತ ಮಲ್ತ .  ಬೊಕ್ಕ  ದೇವಸ್ತಾನದ ಎದುರು ದೇವಮೂಲೆಡ್  ಮಾಲೆ ಪಗರ್ಪಾದ್  ಅಗ್ನಿ ಮೂಲೆಡ್  ಅಗ್ನಿ ಸ್ಥಾಪನೆ   ಮಲ್ತುದ್  ಅಗ್ನಿ ಸಾಕ್ಷಿಯಾದ್ ,  ಪಂಚ ತುದೆಕ್ಲೆನಾ  ಸಾಕ್ಷಿಯಾದ್  ನೀರನ್ ಧಾರೆ ಮೈತುದ್  ಪೊಣ್ಣನ್  ಆಣಗ್  ಮದಿಮೆ ಮಲ್ತ್ ಕೊರ್ದು ಪೊಣ್ಣನ್  ಆಣನ  ಎಡತ್ತ ಬದಿಟ್  ಕುಲ್ಲದ್  ಬುದೆಡಿ ಸ್ಥಾನೊನು   ಕೊರ್ದು, ನನೊದ್ದಿಂಚಿ  ಆಯನ ಬಲ ಬದಿಟ್ ಉಂತುನ ಮಾತಾ ಪೊಣ್ಣುಲು ಮೆಗ್ದಿ - ಪಲ್ದಿನಕ್ಲೆಗ್ ಸಮ ಪನ್ಪಿ  ಸಂದೇಶ  ಊರುಗು ತೆರಿಪಾದ್ ಕೊರ್ದಾಯಿ ಬೊಕ್ಕ..   

ಇನಿ ಮುಟ್ಟ  ಎಂಕ್ಲೆನ  ಇಲ್ಲಡ್  ಪೇರಾ- ನೀರಾ, ಪರೊಂದು ಗಂಜಿಯ-ತೆಲಿಯ ತಿನೊಂದು, ಗೊಬ್ಬೊಂದು,ತೆಲ್ತೊಂದು ತಿರ್ತ್ ದೀಂಡ ಪಿಜಿನ್  ಕೊನವಾ, ಮಿತ್  ದೀಂಡ ಗಿಡಿ ಕೊನವಾ  ಪನ್ಪಿ ಮೋಕೆಡ್ ತೂವ -ತೂವನೆ  ಮಲ್ಲಾಯಿನ  ಬಾಲೆ , ಆಯಿನಾತ್ ಅಟಿಲ್- ಅಗರಣೆ -ಪದ -ಪಾಡ್ದನ  ಕತೆ- ಎದುರ್ಕತೆಕ್ಲೆನ್ , ಮಲ್ಲಗಲೆಗ್ ಮರ್ಯಾದಿ  ಎಲ್ಯಕ್ಲೆಗ್ ಮೋಕೆ ತೊಜಾವುನ ಮಲ್ಲ ಗುಣೋನ್  ಕಲ್ಪಾದ್  ನಿಗಲ ಮಟ್ಟೇಲ್ಡ್  ಪಾಡುನ ಈ ಪೋರ್ತುಡ್...

ಎನ್ನ ಒಪ್ಪ ಪುಟಿನಕುಲು ಮೊಕುಲತ್  ಪಂಡುದ್ ಆಲ್ ನಿಕ್ಲೇನ್ ದಂಟಂದಿಲಕ್ಕ, ತಪ್ಪು ಮಲ್ತಿನಲ್ಪ ಕೆಡ್ಪಂದೆ  ಬುದ್ದಿ ಪನೊಂದು , ಪಿದಾಯಿಡ್ ಬತ್ತಿ ಪೊಣ್ಣು ಪಂಡುದ್ ಕುಚ್ಚನದ ಪಾತೆರೊಡು  ನಿಕುಲು ಅಲೆನ್ ಸಸಾರ ಮಲ್ಪಂದೆ ಮೋಕೆಡ್ ತೂವೊಂದು , ಪ್ರಾಯೊಡ್  ಬಲತುಂಡಲಾ  ಎಂಕ್ಲೆಗ್ ಇನಿಕ್ಲಾ ಎಲ್ಯಬಾಲೆನೆ ಪನ್ಪಿಲಕ್ಕ ತೊಜೊಂದು ಉಪ್ಪುನ ಎಂಕ್ಲೆನ ಇಲ್ಲದ ಸಿರಿ ಆದಿತ್ತಿನ  ಪೊಣ್ಣನ್  ನಿಗಲಲ್ಪ  ನೈಪೇರುಡೆ ಉನ್ಪಾಲ್
ಪನ್ಪಿನ ಆಸೆಡ್ ಪುಟ್ಟು ಬಲತಿನಕ್ಲೆನ ಒಟ್ಟುಡು ಕನ  ನೀರ್  ಜಪ್ಡಾದ್, ವೊಚ್ಚಿದ್  ಜಪ್ಡಾ ಕೊರ್ದಾಯಿ ಬೊಕ್ಕ... 

ಪೊಣ್ಣನ್ ಜಪ್ದಾವೊಂದು , ಇನಿಡ್ ಬೊಕ್ಕ ನಿಕ್ಲೆನ ನೆಲೆ ಬುಡ್ಡು ಯೆಂಕ್ಲೆನ ಕುಲೊಕು  ಸೇರ್ದಿನ ಸಿರಿದೇವಿ  ಪನ್ಪಿ ಮೋಕೆಡ್  ಕೈ ಪತೊಂದು  ಇಲ್ಲಗ್ ಲೆತೊಂದು ಬತ್ತುದ್, ಆರತಿದೊಟ್ಟುಗು -ಕುರಿನೀರುದ ದೃಷ್ಟಿ  ದೆರ್ತುದ್   ಪಡಿ ಬಾಕಿಲ್ಡ್  ಮಂಡೆ ಬಗ್ಗಾದ್  ಇಲ್ಲದ ಕುಬಲ್ದುಲಾಯಿ ಸೇರ್ದಿನ  ದುಷ್ಟ ಶಕ್ತಿಲೆನ್  ತೊರ್ತು ಗಿಡಪುನ  ಆದಿ ಶಕ್ತಿ ರೂಪೊಡು ಮದಿಮಾಲ್  ಬರೊಂದುಲ್ಲಾಲ್ ಪನ್ಪಿ  ಸಂಕೇತ ವಾದ್ ,ಬೋಳಂತರಿತ  ಸೇರ್ನ್  ತೊರ್ತುದು ಇಲ್ಲದುಲಾಯಿ  ಚೆಲ್ಲಿನ ಮಲ್ಲಿಗೆದಲಕ್ಕಂತಿನ  ಅರಿಟ್  ಇಲ್ಲೊರ್ಮೆ ತೆಲಿಕೆ ದಿಂಜಾವೊಲು ಪನ್ಪಿ ನಂಬಿಕೆಡ್  ಇಲ್ಲದುಲಾಯಿ ದಿಂಜಾಯಿ  ಬೊಕ್ಕ... 


ಬಿನ್ನೆರೆನ್  ಲೆತ್ತುದ್  ಬಿನ್ನಾದಿಗೆದ ವನಸ್ ಮಲ್ತುದ್ , ಮರ್ಮಯಗ್ ಕೊರ್ಪಿ ಮರ್ಯಾದಿನ್ ಮಾಮಿ ಸೆಕೆಟ್ 
ತೋಜಾದ್ ಕೊರ್ದು ತೊಡಮನೆ ಮುಗಿಪಾದ್
ಈ ಮಂಗಳ ಕಾರ್ಯದ ಅಕ್ಹೇರಿದ ಬಾಕಿಲ್ಗ್ ಇತ್ತೆ ನಮ ಬತ್ತುದ್ ಉಂತುದ.....

ಎನ್ನಿ ಸಂಸಾರ ನನ ದುಂಬುಗು ರಡ್ಡ್ ಇತ್ತಿನ ನಾಲಾದ್ -ನಾಲಿತ್ತಿನ ನೂದಾದ್  ಬುಲೆವೊಡು  ಪನ್ಪಿನ  ಉದ್ದೇಶ ದೀದ್  ಮದಿಮಾಯೆ  ಮದಿಮಾಲೆನ್   ಕೋಣೆ  ದಿಂಜಾವುನ  ಕ್ರಮ  ಒಂಜಿ ಬಾಕಿ ............. !

ದುಂಬುದ  ಕಾಲೊಡು   ಪೆತ್ತ ಕಿದೆಕ್  ಬರ್ಪಿ ಪೊರ್ತು  ಕತ್ತೆಲಾಂಡ್ ಪಂಡುದ್  ಅರ್ಥ . (ಇತ್ತೆ  ಜನ ಭೂತ ತಿರಗುನ ಮಧ್ಯ ರಾತ್ರಿದ  ಪೋರ್ತುಗು ಕತ್ತಲೆ ಪನ್ಪೆರ್ ) ಗೋಧೂಳಿ ಮೂರ್ತೊಗು ತಡೆ  ಇಜ್ಜಿಗೆ , ವಿಷ ಅಮೃತದ ಭೇಧ ಇಜ್ಜಿಗೆ
ಅಂಚಾದ್   ಮದಿಮಾಯೆ  ಮದಿಮಾಲ್ ಇಂಚಿ ಬರೋಡು,  ಬತ್ತ್ ದ್ ತುತ್ತುದಿನ ಐತ್ಹದ  ಕುಂಟುನು ಮಾತುದ್, ಬಂಗಾರ್- ಪದ್ದೇಯಿ  ಮಾತಾ ದೆತ್  ದೀದ್ ,ಮಡಿ ಮಲ್ದಿನ  ಕುಂಟುನು ಪಾಡೊಂದು ,  ಮಾತಾ ಹೆರಿಯೆರೆಗ್  ನಮಸ್ಕಾರ ಮಲ್ತುದು , ಕಿದ ಪಣೆಕ್ ಪೋದು  ಗೊಮಾತೆಗ್  ಕೈ ಮುಗಿದ್ ,
ಆಣ್  ಪೊಣ್ಣನ ಅಂಗೈಕ್   ಒಂಜಿ ತಟ್   ತಾರಯ್ದ  ಎಣ್ಣೆನ್, ಅಂಚನೆ ಪೊಣ್  ಆಣನ ಕೈಕ್  ಆತೆ ಎಣ್ಣೆನ್  ಮುಟ್ಟಾದ್...  ,

ಅಲ್ಪನೆ  ಬಲ ಬದಿಟ್   ಉಪ್ಪುನ  ಕೋಣೆಗ್  ಸುರುಕ್ಕು ಪೊಣ್ಣು , ಅಲ್ನ  ಬೆತ್ತಾಡಿ ಆಣ್  ಬಲ ಕಾರ್ ದೀದ್  ತರೆ ತಗ್ಗಾದ್   ಪೊಗ್ಗೊಡು...!


ಕೋಣೆಗ್  ಪೊಗ್ಗುದು  ದಾದ ಮಲ್ಪೊಡು ...!!
.
.
.
.
.
.





ಕೈಕ್ ತಾರಾಯ್ದ  ಎಣ್ಣೆ ಪೂಜೊಂದು  ಬೊಕ್ಕ  ದಾದ  ಮಲ್ಪುನು!!

ಉಲಯಿಡ್  ಅಲ್ಪ ಗುಜ್ಜೆ ಮೂರೊಂದುಲ್ಲೆರ್ ...
ಜನ ದಾಂತೆ  ಸೈಯ್ಯೊಂದುಂಡು,
ಉಪ್ಪಡ್  ಪಚ್ಚಿರ್  ಪಾಡ್ರೆ ಪಚ್ಚಿರ್  ಜಪ್ಪೊಡು   !!!

ಹ್ಹ ಹ್ಹ ಹಹ್ಹ !!!!