ಉಪ್ಪಡುಲಯಿದಾ ಪುರಿತ ಲಕ್ಕ........ !

ಎಂಕುಲು ದುಂಬು  ಶಾಲೆ ಬುಡ್ಡು  ಇಲ್ಲಡೆ  ಬನ್ನಗ  ಅಲ್ಪನೆ  ಒಂಜಿ  ತೋಡು  ತಿಕ್ಕು . ಶಾಲೆಡ್  ಪುರುಸೊತ್ತು ಮಲ್ತೊಂದು ( ಮಾಸ್ಟ್ರೆನ  ಕಣ್  ತಪ್ಪಾದ್ )   ಮಲ್ದಿನ  ದೋಣಿನ್  ತೋಡುಡ್  ಬುಡ್ರೆ  ಸಂಕೊಡು  ಬಗ್ಗುದು ತೂವನಗ  ಅಲ್ಪ   ಒಂಜಿ  ತಪ್ಪಲೆಡ್  ಕೆಲೆವೆರ್  ಮಣ್ಣು  ದೆಕ್ಕೊಂದು  ಇಪ್ಪುನ ತೋಜುಂಡು . ಅಗುಲು  ಬಂಗಾರ್  ದೆಕ್ಕುನಕುಲುಗೆ !. ಬಂಗಾರ್ದಂಗಡಿದ   ಎದುರ್ದ  ಮಣ್ಣು ನ್ ಒಟ್ಟು ಮಲ್ತು  ಅವ್ವೆನ್ ದೆಕುದು  ಬಂಗಾರ್ ನಾಡುನ್ ! ಅಗ್ಲೆಗ್  ದಾದ ಬಂಗಾರ್  ತಿಕ್ಕುಂಡ  'ಮಣ್ '  ದೇವೆರೆಗೇ  ಗೊತ್ತು.......?. ಬಂಗಾರ್  ಬಿರ್ಕುನಂಚಿನ   ಅಗ್ಗದ ಸಾಮನಾ?...  

ಅಂಡಲ  ಅಗುಲು   ಬಂಗಾರ್ ದೆಕ್ಕುನ  ಬುಡ್ಪುಜೆರ್. ಅಗಲೆಗ್ ಅವ್ವೇ  ಜೀವನ , ಅವ್ವೆ ಒಂಜಿ ಬದುಕ್ !

ಅಂದ್ 

ಬದುಕ್  ..... 

ಮಾತೆರೆಗ್ಲಾ  ಒಂಜೇ  ನಮುನೆಡ್  ಸರಿ -ಸಮ -ಸರಿಕೆ   ಇಪ್ಪಾಂದ್. 

ಕೆಲೆವೆರೆಗ್  ಪುಟ್ಟನಗನೆ    ಬೋಡಾಯಿನಾತ್  ಸೌಭಾಗ್ಯ  ಇಪ್ಪು ...ಮುಟ್ಟಿನ ಮಾತಾ ಮಣ್ಣಾದ್  ಬೊಕ್ಕ  ಕರ್ಪೂರದಲಕ್ಕ ಕರವೊಂದು   ಪೋವು

ನನ ಕೆಲವರೆಗ್ ಪುಟ್ಟನಗ  ಮಣ್ಣುದ ಬಟ್ಟಲಾಂಡಲ  ಕೈ ಪಾಡಿನಲ್ಪ   ಕೈ ಸೇರ್ದು , ಬುಲೆಯಿಲಕ್ಕ  ಬಂಗಾರ್ದ  ಬಟ್ಟಲಾವು.

ಕೈ ಕಾರ್ ದಾಂತೆ  ನಟ್ಟುನಕುಲು ,ಉನರೆ-ತಿನರೆ-ಜೆಪ್ಪೆರೆ  ಇಪ್ಪಂದೆ  ಪರಡುನಕುಲು  ಒಂಜಿ ಕಡೆ 

ಉನರೆ ಇತ್ತುಂಡಲ  ಉನರೆ ಆವಂದೆ -ಜೆತ್ತುಂಡಲ  ನಿದ್ರೆ ಬರಂದಿನ ಕಾಯಿಲೆ-ಕಸಲೆದ ಕಾಸ್ದಕುಲು  ನನೊಂಜಿ ಕಡೆ.

ಕೆಲವೆರೆಗ್ ಕಾಸ್ ಇತ್ತುಂಡಲಾ   ನೆಮ್ಮದಿ ಇಜ್ಜಿ
ಕೆಲವೆರೆಗ್ ಕಾಸ್ ದಾಂತೆ  ನೆಮ್ಮದಿ ಇಜ್ಜಿ
ಕೆಲೆವೆರೆಗ್ ಕಾಸ್ಲ  ಇಜ್ಜಿ, ನೆಮ್ಮದಿಲಾ ಇಜ್ಜಿ 

ಇಂಚ ಇತ್ತುಂಡಲ  ಒಂಜತ್ - ಒಂಜಿ ನಮುನೆಡ್  ಜೀವನ ನಡತೊಂದೆ ಉಂಡು....ನಡತೊಂದೇ   ಪೋವೊಂದುಂಡು. 

ಐಕ್ಕೆ   ಪನ್ಪಿನಿ..." ಉಪ್ಪಡ್ ದುಲಾಯಿ ಉಪ್ಪುನ ಪುರೀಲಾ......   ಸೈಪುಜಿ.... ಬದುಕುಂಡು" ! 

ತೀಪೆ ಕುಕ್ಕುದುಲಾಯಿ  ಪುರಿ ಆಪಿನ ಮಾತೆರೆಗ್ಲಾ  ಗೊತ್ತಿತಿನ .                                                                                                      ಪುರಿತ  ಕುಕ್ಕು ತಿನ್ಪಿನ ಸೌಭಾಗ್ಯ ತೂಂಡ  ನಂಕ್   ಬಂಜಿ ಉರಿಯುಂಡು ....    ಪಿದಾಯಿಡ್  ಒಂಜಿ ಒಟ್ಟೆಲಾ  ತೋಜುಜಿ.  ಉಲಾಯಿ ರಾಸಿ ರಾಸಿ  ಪುರಿ ..... ಎಂಚ ಪುರಿ ಕುಕ್ಕುದುಲಾಯಿ ಪೋಂಡು  ...? ಮಾತಾ ದೇವೆರ್ನ ಲೀಲೆ!

ಆಂಡ  ಉಪ್ಪಡ್  ಅಂಚ ಅತ್  ಅತೆ ?
ಅಬ್ಬಾ  ಎಂಚಿನ  ಉರಿ -ಖಾರ. 

ಉಪ್ಪಡ್   ಕಣ್ಣುಗ್  ಬೂರುಂಡ  ಕಣ್ ಉರಿಯುನೈಟ್  ಮೂಜಿ ಲೋಕ ತೋಜು!

ಪುರಿಕ್ ಉರಿಯುಜ ?

'ಉರಿತ'  ಒಟ್ಟುಗೆ   ಪುರಿ ಬದುಕುಂಡ ?
ಕಷ್ಟೊದಾಂದಲ ಬದುಕುದು  ತೊಜಾವುನ   ಒರಾಂಟ  ಪುರಿತ ..?
ಪುರಿಕ್ ಉರಿ  'ಅಭ್ಯಾಸ'  ಆದ್  ಪೋಂಡಾ ?
ಅತ್ ಪುರಿಕ್ ಬೇತೆ  ದಾಲ  'ಗತಿ' ಇಜ್ಜ..?
ಏತ್  ಸಮಯ ಪಂಡುದ್    ಈ 'ಉರಿಟೇ'  ಪುರಿ  ಬದುಕು ..?
ಐಕ್ಲ ಒಂಜಿ ದಿನ   ಈ ಬದ್ಕು  'ಯಾರು'  ಪಂದುಡ್ ಎನ್ನಂದ ..?

ಉತ್ತರ ನಾಡೊಂದು ಪೋಲೆ ..ನಿಗಲೆಗೇ   ತೆರಿಯುಂಡು 

ತುಳುನಾಡುದ  ಸಂಸ್ಕೃತಿ  ಪಂಡ  ಕೋಲ - ತಂಬಿಲ -ಕೋರಿದ ಕಟ್ಟ -ಕಂಬಳ  ಈತೆ  ಅತ್ . ತುಳುನಾಡುದ  ಇಂಚಿ ಇಂಚಿಡ್  ಕಲೆ -ಸಂಸ್ಕೃತಿ ಪೇರ್ದೋಟ್ಟು -ನೀರ್ದಲಕ್ಕ  ಬೆರಕೆ ಆದ್  ಸೆರ್ದುಂಡು  . 

ದುಂಬುಡಿಂಚಿ  ನಡೊತೊಂದು ಬತ್ತಿನ ಇಲ್ಲ ಕಸುಬುಲೇನ್ , ಕುಲ ಕಸುಬುಲೇನ್   ಬಜೀ  ಲಾಭದಂಚೇ  ತೂವಂದೆ,ನಮ್ಮ ದುಂಬುದಕ್ಲೆಗ್  ಉಪ್ಪಡ್ ಪಂಡುದ್  ನಡಪಾವೊಂದು  ಬತ್ತಿನಕುಲು ಇನಿಕ್ಲಾ  ತುಂಬ ಜನೊಕುಲು ತುಳುನಾಡುಡ್  ತೂಯರೆ ತಿಕ್ಕೆರ್ . 

ವಾಡರಿಲ್ಲದಕುಲು  ಮಣ್ಣುದ  ಕರ ಮಲ್ತೆರ್ಡ, ಮುರ್ತೆದಕುಲು  ಕಲಿ ಬೆಲ್ಲ ಮಲ್ಪೆರ್ 

ಆಚಾರ್ಲು  ನೊಗ-ನಾವೆರ್  ಗೂರ್ಯೇರಡ,ನಲಿಕೆದಕುಲು   ಬಟ್ಟಿ -ತೆರಿಯ -ತಟ್ಟಿಕುಡ್ಪು   ನೇವೇರ್. 

ಆಟದಕುಲು  ಇಲ್ಲಡ್  ಪೋರ್ತುದ ನುಪ್ಪುಗು  ಕಷ್ಟ ಇತ್ತುಂಡಲಾ    ರಂಗಸ್ಥಳೋಡು  ರಾಜೆ ಆದ್  ಮೆರೆವೇರ್, ಅಲ್ಪನೆ ನಲ್ತೊಂದಿತ್ತಿಲಕ್ಕನೆ   ಪ್ರಾಣ ಬುಡ್ತಿನಕುಲುಲಾ   ಉಲ್ಲೆರ್ 

ಹರಿಕತೆತ  ಭಟ್ರು,ಭಾಗವತೆರ್   ಬಂಜಿ ಕಟುದು,  ದೊಂಡೆ ಕಟ್ಟುದು   ಸ್ವರಲಕ್ಕವೆರ್....
.  

ಮಾತಾ ತಾಪತ್ರಯತ  ನಡುಟ್  ಮಾತವ್ವೆನ್ಲಾ  ಮದತ್  ತೆಲಿತೊಂದೆ ಜೀವನ ದೆಪ್ಪೆರ್ 

ಸಮಾಜದ ಖಾರ -ಪುಲಿ -ಉರಿತ ನಡುಟ್ಲಾ  ಬದುಕ್ದ್  ತೋಜಾವೆರ್ ...

ಉಪ್ಪಡ್ದುಲಯಿದಾ  ಪುರಿತ ಲಕ್ಕ !

ಅಂದ್  ಉಮೆದುಡ್ ಬದುಕುಂಡನೆ  ಜೀವನ ...ಉಮೆದ್  ಕರೀಂಡ  ಬೊಕ್ಕ ದಾದ  ಒರಿಂಡ್?.....     ಒರಿವುನು  ಮರಣ ಮಾತ್ರ. 

ಉಪ್ಪಡ್ ದ  ಪುರಿತ  ಲಕ್ಕ ಜೀವನ ದೆಪ್ಪುನಕ್ಲೆನ್  ನಾಡುದ್  ಪತ್ತುದು  ಅಗಲೆನ ಜೀವನ   ಆ   ಕಲೆಡಾತ್ರನೆ ತೆಗುರ್ಲಕ್ಕ, ಮಿತ್  ಬರ್ಪಿಲಕ್ಕ  ಮಲ್ಪುನ  ತುಳುವೆರ್ನ ಉಡಲ್ದುಲಯಿದ  ಬೇಲೆ  ಆವೊಡು . ಅಂಚಾಂಡ  ಮಾತ್ರ  ಈ ಕಲೆ- ಸಂಸ್ಕೃತಿ  ನಮ್ಮ ದುಂಬುದ  ಜೋಕ್ಲೆಗ್ ತೂಯರೇ ತಿಕ್ಕು

ಇಜ್ಜಾಂಡ   youtube,  cd  ಇಂಚಿನೈಟ್  ಮಾತ್ರ ತೂವೊಡಾಪುಂಡು

ಅಂಚ ಆವೆರೆ ಬಲ್ಲಿ ಪನ್ಪಿನ  ನಿಜ ತುಳುವೆರ್ನ ಸಂಕಲ್ಪ!.


ಬರವು :ಶಾಂತಾರಾಮ್ ಶೆಟ್ಟಿ .
ಚಿತ್ರ : ಸಂಗ್ರಹ